ជាទូទៅគ្រូពេទ្យតែងតែលើកទឹកចិត្តឲ្យស្ត្រី សម្រាលកូនតាមបែបធម្មជាតិ ព្រោះផលវិបាកនៃអំឡុងពេល និងក្រោយសម្រាលមានតិចតួចជាងការវះកាត់។ ប៉ុន្តែក្នុងករណីក្រុមគ្រូពេទ្យសម្រេចធ្វើការវះកាត់ លុះត្រាតែការសម្រាលតាមធម្មជាតិអាចមានគ្រោះថ្នាក់ចំពោះម្ដាយ និងកូន។ លោកវេជ្ជបណ្ឌិត ច័ន្ទ រស្មី ឯកទេសសម្ភព និងរោគស្ត្រី បានឲ្យដឹងថា បច្ចុប្បន្ននេះអត្រាអ្នកសម្រាលកូនដោយវះកាត់ មានការកើនឡើងជាលំដាប់គួរឲ្យព្រួយបារម្ភ ជាពិសេសការវះកាត់ដោយគ្មានមូលហេតុត្រឹមត្រូវ។