មានផ្ទៃពោះ ស្រីៗគ្នាយើងប្រឈមការផ្លាស់ប្ដូរជាច្រើនទាំងសតិអារម្មណ៍ និងរូបរាងកាយ។ សូម្បីទម្លាប់ការគិត ជីវភាពរស់នៅប្រចាំថ្ងៃ រាងកាយខាងក្រៅក៏ប្រែប្រួលខុសពីមុនទាំងស្រុង ជាពិសេសអ្វីដែលស្រីៗគ្នាយើងស្អប់បំផុតក្រោយសម្រាលបេប៊ី គឺស្នាមសង្វារតែម្តង។
ទើបកើតកូនហើយ មិនចង់ឃើញស្នាមសង្វារ មានអីពិបាក
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ឈប់បារម្ភ ស្នាមសង្វារមិនមែនព្យាបាលមិនបានឯណា បើចង់គ្មានស្នាមសង្វារ អានលេងសិនទៅ អត្ថបទ “Hello គ្រូពេទ្យ” ប្រាប់ពីមូលហេតុ និងវិធីសាស្ត្រពិសេសបំបាត់ស្នាមសង្វារ។
១- មូលហេតុកើត
ស្នាមសង្វារ ជាការដាច់រហែកតូចៗនៅក្នុងស្រទាប់ជាលិកាសន្ធានក្រោមស្បែក។ ជាធម្មតា កើតឡើងអំឡុងគ្នាយើងពពោះ ឡើងទម្ងន់ចាប់ពី ១៤ គីឡូ/៩ខែ។ ស្នាមសង្វារនេះ លេចឡើង ពេលរាងកាយយើងរីកធំធាត់លឿន ធ្វើឲ្យជាតិសរសៃស្វិតនៅក្រោមផ្ទៃស្បែករហែក។ ស្នាមសង្វារភាគច្រើនមាននៅលើក្បាលពោះ និងសុដន់ ព្រមទាំងនៅតំបន់ណារីកធំលឿន ដូចជា កំភួនជើង ឬភ្លៅជាដើម។ មួយទៀត ករណីមានស្នាមសង្វារ ក៏អាចបណ្ដាលមកពីកត្តាហ្សែន ដែលស្រីៗគ្នាយើងទទួលបានពីអ្នកម៉ាក់តែម្តង។
២- វីធីព្យាបាល
ផ្ដល់សំណើមឲ្យស្បែក៖ លាបសារធាតុអាចផ្ដល់សំណើម ដូចជា កាកាវ ប៊ើរ ឬក្រែមបំបាត់សង្វារផ្សេងទៀត ដើម្បីកាត់បន្ថយភាពស្ងួត និងរមាស់លើស្បែក។
ផ្ដល់សារជាតិចិញ្ចឹមពីខាងក្នុង៖ ញ៉ាំវីតាមីន C ឲ្យបានគ្រប់គ្រាន់ដើម្បីជួយស្បែក មិនងាយមានស្នាមសង្វារ។
រក្សាគីឡូ៖ រក្សាកម្រិតគីឡូឲ្យនៅថេរ ប្រសើរជាងឡើងខ្លាំងហួសកម្រិត ព្យាយាមធ្វើតាមការណែនាំរបស់ពេទ្យ ដើម្បីបង្កើនទម្ងន់ក្នុងកម្រិតត្រឹមត្រូវមួយ។
ព្យាបាលតាមកាំរស្មីឡាស៊ែ ឬប្រើថ្នាំ (Retin-A)៖ ស្រីៗគ្នាយើងអាចព្យាបាល ក្រោយសម្រាលកូនរួច។ ម៉្យាងទៀតវិធីសាស្រ្ដនេះនឹងជួយបង្កើនការលូតលាស់ខូឡេជែននៅក្នុងខ្លួនយើង ជួយបង្រួមសរសៃឈាមដែលបានរីកធំ។
លាបជែលបំបាត់ស្នាម៖ សាស្ត្រាចារ្យជំងឺសើស្បែក Heidi Waldorf នៅសាលាវេជ្ជសាស្ត្រ Mount Sinai ទីក្រុងញូវយ៉ក ណែនាំថា ពេលស័ក្ដិសមបំផុតដើម្បីព្យាបាលស្នាមសង្វារ គឺពេលស្នាមសង្វារនៅពណ៌ក្រហមនៅឡើយ ដោយប្រើជែលមួយចំនួនព្យាបាល ដូចជា ជែលមានផ្ទុកសារជាតិចម្រាញ់ចេញពីខ្ទឹមបារាំង និងអាស៊ីដ ហ៊ីយ៉ាលុយរ៉ូនិក ជាជម្រើសត្រឹមត្រូវ ព្រោះយោងតាមការស្រាវជ្រាវ គ្នាយើងប្រើជែលនេះធ្វើឲ្យស្លាកស្នាមបាត់អស់នៅសប្ដាហ៍ទី១២។ រីឯក្រែមមួយប្រភេទទៀតឈ្មោះ Retinoid អាចជួយបណ្ដុះឡើងវិញនូវកោសិកាងាប់ ក៏ដូចជាភ្ញោចឲ្យរីកលូតលាស់កូឡាជែនផងដែរ ប៉ុន្ដែវាមិនអាចប្រើអំឡុងពេលមានផ្ទៃពោះបានទេ។
Dermabrasion៖ ជាវិធីព្យាបាល ដោយប្រើច្រាសមានសរសៃលួស ឬកង់បង្វិលមានមុខកាត់ជាដុំពេជ្រ ទៅបំផ្លាញស្រទាប់ស្បែកខាងលើ ដើម្បីជួយបង្កើតស្រទាប់ស្បែកថ្មី។ ទោះយ៉ាងណា ព្យាបាលរបៀបនេះមិនសូវមានការប្រែប្រួលខ្លាំងក្លានោះទេ។
៣- វិធីសាស្រ្ដបង្ការស្នាមសង្វារ
បច្ចុប្បន្ន នៅមិនទាន់មានវិធីច្បាស់លាស់បង្ការស្នាមសង្វារក៏ពិតមែន ប៉ុន្តែស្រីៗគ្នាយើងអាចកាត់បន្ថយ តាមរយៈលាបឡេផ្ដល់សំណើមស្បែក និងញ៉ាំទឹកឲ្យបានគ្រប់គ្រាន់ ដើម្បីរក្សារាងកាយមានសុខភាពល្អ។
គ្នាយើងមួយចំនួនជាម៉ាក់ៗសម័យទំនើបក៏ពិតមែន ក៏នៅតែសុខចិត្តទទួលយកនូវស្នាមសង្វារនេះដោយរីករាយ ដើម្បីទុកជាភស្តុតាងបង្ហាញពីក្តីស្រលាញ់ជ្រាលជ្រៅចំពោះបេប៊ី។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម