គ្រប់ទារកក្រោយកើតមកហើយ ទាមទារឲ្យចាក់វ៉ាក់សាំងផ្សេងៗ ការពារអាអូនពីការឆ្លងមេរោគកើតជាជំងឺធ្ងន់ធ្ងរ។ ស្របពេលដែលវ៉ាក់សាំងការពារអាអូន តែវាក៏ផ្ដល់ផលប៉ះពាល់តិចតួចដល់អាអូនដែរ ដូចក្ដៅខ្លួនជាដើម។ ក្រោយចាក់វ៉ាក់សាំង យើងគួរផ្ដល់ថ្នាំប៉ារ៉ាសេតាមុលឲ្យកូនភ្លាម ឬទាល់តែកូនក្តៅខ្លួនទើបឲ្យញ៉ាំថ្នាំ
ក្រោយចាក់វ៉ាក់សាំង គួរតែឲ្យកូនញ៉ាំថ្នាំបញ្ចុះកម្តៅភ្លាម ឬទាល់តែកូនក្តៅខ្លួន?
ឆ្លើយតបនឹងចម្ងល់នេះ លោកស្រីវេជ្ជបណ្ឌិត កុសល កណិការ ឯកទេសជំងឺកុមារ បានឲ្យដឹងថា “តាមការសិក្សាវិទ្យាសាស្ត្រនៅមិនទាន់មានការបញ្ជាក់ច្បាស់លាស់នៅឡើយទេ ព្រោះមានការសិក្សាខ្លះយល់ស្របថាអាចឲ្យបាន តែខ្លះទៀតបដិសេធនឹងការផ្ដល់ថ្នាំប៉ារ៉ាសេតាមុលឲ្យកូនមុន។ ដូចនេះហើយ ខាងវិទ្យាសាស្ត្រនៅត្រូវការសិក្សាបន្ថែមទាក់ទងនឹងបញ្ហានេះ”។
ជាធម្មតា ក្រោយពេលទារកចាក់វ៉ាក់សាំងហើយ អាអូននឹងធ្វើឲ្យទារកចេញសញ្ញាផលរំខានតិចតួចដូចជា៖
១. ក្ដៅខ្លួន ដែលជាសញ្ញានៃការឆ្លើយតបរបស់ប្រព័ន្ធភាពស៊ាំទៅនឹងវ៉ាក់សាំង
២. ឈឺនៅកន្លែងចាក់ (ភ្លៅ ស្មា…)
៣. ទារកមិនស្រួលខ្លួន
ទោះជាមិនទាន់មានការសិក្សាណាមួយច្បាស់លាស់ទាក់ទងនឹងការប្រើថ្នាំប៉ារ៉ាសេតាមុល មុននិងក្រោយចាក់វ៉ាក់សាំងភ្លាមយ៉ាងណាក៏ដោយ ម៉ាក់ប៉ាគួររង់ចាំតាមដានកម្ដៅកូនសិន ក្នុងករណីកម្ដៅចាប់ពី ៣៨អង្សារសេ ចាំផ្ដល់ថ្នាំប៉ារ៉ាសេតាមុលឲ្យអាអូន។
បើតាមបទពិសោធន៍របស់លោកស្រីវេជ្ជបណ្ឌិតផ្ទាល់ ប្រសិនអាអូននៅតែក្ដៅខ្លួន យំរករឿង ម៉ាក់ប៉ាអាចឲ្យអាអូនញ៉ាំថ្នាំប៉ារ៉ាសេតាមុលបានដោយមិនចាំបាច់បារម្ភអាអូនកើតបញ្ហាអ្វីទេ ក្នុងករណីដែលម៉ាក់ប៉ាផ្ដល់ថ្នាំទៅតាមការណែនាំត្រឹមត្រូវរបស់គ្រូពេទ្យ (ផ្ដល់ឲ្យកូន១ដូស) មិនមែនចេះតែឲ្យកូនញ៉ាំទេ។ មួយវិញទៀត បើអាអូនក្ដៅខ្លួន ៣៧.៥-៣៧.៩អង្សាសេ ម៉ាក់ប៉ាអាចងូតទឹកក្ដៅឧណ្ហៗឲ្យអាអូនបាន។
បន្ថែមពីលើនេះ ការផ្ដល់ថ្នាំប៉ារ៉ាសេតាមុលក៏អាចកាត់បន្ថយការឈឺចាប់នៅកន្លែងចាក់វ៉ាក់សាំងដល់កូនដែរ ហើយបើមានការហើមកន្លែងមុខម្ជុលចាក់ថ្នាំ ម៉ាក់ប៉ាអាចយកកន្សែងត្រជាក់ស្អាតមានអនាម័យ យកទៅស្អំនៅតំបន់នោះបាន។ ម៉ាក់ៗក៏អាចបំបៅដោះកូនដែរ ព្រោះការបៅទឹកដោះម្ដាយ អាចជួយកាត់បន្ថយអាការៈឈឺចាប់ដល់ទារក។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម