ប្រាកដហើយថា អ្នកចង់ចាកចេញ?
កូនយើងអាចចូលចិត្តមើលសៀវភៅ បើកមើលម្តង ១ ទំព័រយ៉ាងជក់ចិត្ត ជាមួយរូបភាពដែលមាននៅក្នុងសៀវភៅទាំងនោះ។ ម៉ាក់ប៉ាត្រូវបង្កើតទម្លាប់ឲ្យកូនអានបានច្រើន ដើម្បីអាអូនមានចំណូលចិត្តអានតាំងពីនៅតូច ដោយយកកូនទៅបណ្ណាល័យសម្រាប់កុមារ ឬបង្កើតម៉ោងអាននៅក្នុងផ្ទះ ដោយទៅហាងលក់សៀវភៅ ឬខ្ចីសៀវភៅពីមិត្តភ័ក្ដិ។
នៅសប្តាហ៍ទី ៤៦ កូនយើងអាច៖
– ទះដៃ ឬលើកដៃលា Bye Bye
– ដើរដោយតោងរបស់អ្វីមួយ
– ចង្អុល ឬធ្វើកាយវិការផ្សេងៗ ពេលចង់បានអ្វីមួយ
– ចូលចិត្តមើលសៀវភៅ បើកមើលម្តង ១សន្លឹក។
១- បង្រៀនកូនដោយរបៀបណា?
កូនចាប់ផ្តើមតាមម៉ាក់ហើយ នៅក្នុងវ័យនេះអាចមានបញ្ហាបំបែកអាអូនចេញពីយើង ដោយសារកូនស្រលាញ់ មិនអាចអត់យើងបាន។ ដើម្បីកុំឲ្យពេលរៀបចេញទៅក្រៅម្តងៗពិបាក យើងមិនត្រូវចំណាយពេលយូរពេកលាគ្នា ឬបង្ហូរទឹកភ្នែក ពេលយកកូនទៅដាក់កន្លែងមើលថែក្មេង ព្រោះធ្វើឲ្យកូនពិបាកចិត្ត រឹតតែយំ។ យើងអាចជួយកូនឲ្យមានភាពឯករាជ្យ មិនត្រូវនៅចាំមើលកូនរហូតទេ ទោះកូននៅតែត្រូវការវត្តមាន និងការយកចិត្តទុកដាក់ពីយើងក៏ដោយ។
២- ពិភាក្សាជាមួយពេទ្យរឿងអីខ្លះ?
ការណាត់ជួបជាមួយគ្រូពេទ្យក្នុងខែនេះមិនសូវមានទេ ទោះយ៉ាងណាយើងត្រូវប្រញាប់ទាក់ទងទៅគ្រូពេទ្យបន្ទាន់ បើមានបញ្ហាអ្វីមួយមិនអាចចាំរហូតដល់ការណាត់ជួបលើកក្រោយបាន។
៣- ចំណុចត្រូវដឹង
ម៉ាក់ប៉ាប្រហែលជាបារម្ភពីបញ្ហាផ្តាច់ដោះ និងការបាក់ធ្មេញរបស់កូន។ “Hello គ្រូពេទ្យ” មានគន្លឹះមួយចំនួនជួយដោះស្រាយកង្វល់ទាំងនេះបាន។
ការផ្តាច់ដោះ៖ បើកូនកំពុងបៅដោះ ដូចនេះការផ្តាច់ដោះគឺអាស្រ័យលើយើង និងកូន។ ពេលខ្លះអាអូនអាចបញ្ចេញកាយវិការចង់ឈប់បៅដោះ ឯយើងបារម្ភថាគួរផ្តាច់ ឬមិនគួរ។ ជួនកាលការផ្តាច់ដោះជាក្តីស្រមៃរបស់យើង ប៉ុន្តែចិត្តមួយទៀតមិនចង់ផ្តាច់ទេ ដោយសារការបំបៅដោះគឺជាអារម្មណ៍ល្អមួយរបស់ម្តាយគ្រប់រូបជាមួយកូន។ មានម៉ាក់ៗមួយចំនួនចង់បន្តការបំបៅដោះឲ្យបានយូរ ប៉ុន្តែយកល្អយើងគួរបញ្ឈប់ពេលកូនមានអាយុ ១ ឆ្នាំ។
យើងអាចឈប់បំបៅដោះបន្តិចម្តងៗ ឬឲ្យកូនបៅទឹកដោះគោជំនួស។ បើកូនមិនចូលចិត្តបៅទឹកដោះគោក្នុងដបទេ អាចឲ្យគេប្រើកែវជំនួស។ យើងគួរកាត់បន្ថយរយៈពេលបៅម្តងៗ ដោយអាចសាកល្បងតាមវិធីខាងក្រោមនេះបាន៖
– ប្រលែងលេងជាមួយកូនដើម្បីកុំឲ្យទារបៅ
– បន្លប់កូនពេលចង់បៅ
– អាចឲ្យកូនផឹកទឹកជំនួស
– ឲ្យអ្នកផ្សេងលួងកូនគេង។
ពេលផ្តាច់ដោះដំបូង សុដន់យើងនឹងឡើងរឹង ឈឺ ហៀរទឹកដោះមិនឈប់ ដោះស្រាយបញ្ហានេះយើងអាចប្រើសំឡីត្រជាក់ ឬច្របាច់ទឹកដោះចោល។ បើឈឺខ្លាំងទ្រាំមិនបាន យើងអាចប្រើថ្នាំ Ibuprofen ជួយបំបាត់ការឈឺចាប់។
បាក់ធ្មេញ៖ ដោយសារធ្មេញដំបូងក្មេង ដែលយើងចំណាំហៅថាធ្មេញព្រៃនោះ នឹងជ្រុះចេញនៅថ្ងៃណាមួយ ជំនួសមកវិញនូវធ្មេញថ្មី (ធ្មេញស្រុក) ដូចនេះយើងមិនត្រូវបារម្ភច្រើនពីបញ្ហាទាំងឡាយដែលកើតមានលើធ្មេញដំបូងរបស់កូនទេ លុះត្រាតែយើងចង់បានសម្ផស្សកូនស្អាត។ ដំបូងយើងត្រូវពិនិត្យ និងថែទាំធ្មេញកូនឲ្យបានល្អ ហើយបើឃើញមានបញ្ហាមិនប្រក្រតីណាមួយខាងក្រោមនេះ ត្រូវទាក់ទងទៅពេទ្យធ្មេញ។
– ឈឺចាប់ច្រើនថ្ងៃ
– ធ្មេញវៀច ឬឆ្លងរោគ
– ហើមអញ្ចាញ
– មានពណ៌ផ្កាឈូកនៅកណ្តាលធ្មេញ។
៤- រឿងអីខ្លះត្រូវបារម្ភ?
មកដល់សប្តាហ៍ទី ២ ក្នុងខែទី ១១ នេះ យើងអាចមានកង្វល់ច្រើន។ កង្វល់មួយធំជាងគេនោះគឺបង្រៀនកូនឲ្យចេះប្រើបង្គន់។ បើយើងមិនធ្លាប់មានកូនពីមុនមកទេ យកល្អគួររង់ចាំកូនមានអាយុបាន ១៨-២៤ ខែសិនចាំបង្រៀនកូន ព្រោះនេះជាពេលល្អសម្រាប់កូនយើងចាប់ផ្តើមចេះប្រើប្រាស់បង្គន់។
កាយសម្បទា៖ សញ្ញាដែលបញ្ជាក់ថារាងកាយកូនយើងល្អរួមមាន៖
– បន្ទោរបង់ទៀងទាត់
– អាចទ្រាំអត់នោមបានក្នុងរយៈពេល ២ ម៉ោង
– នោមអស់ទឹកពីក្នុងប្លោក
– ចេះស្លៀក ឬស្រាតខោហើយអាចបន្ទោរបង់លើចានបង្គន់។
ផ្លូវអារម្មណ៍៖ការលូតលាស់ផ្លូវអារម្មណ៍កូនយើងអាចបញ្ចេញកាយវិការ៖
– មិនចង់ស្លៀកខោទឹកនោម ឬរត់ទៅពួនពេលស្លៀកឲ្យ
– មិនសប្បាយចិត្តពេលខោទឹកនោមប្រឡាក់
– ឲ្យកូនរៀនមានទំនួលខុសត្រូវលើខ្លួនឯង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Murkoff, Heidi. What to Expect, The First Year. New York: Workman Publishing Company, 2009. Print version. Page 459 – 470.
Your 11-month-old: Week 3. http://www.babycenter.com/6_your-11-month-old-week-3_1496257.bc. Accessed date June 2, 2015.
