តាមការណែនាំរបស់សមាគមវេជ្ជបណ្ឌិតឯកទេសផ្នែកកុមារនៅអាមេរិក ប៉ាម៉ាក់មិនគួរឲ្យកូនបៅទឹកដោះគោស្រស់នោះទេ លុះត្រាតែអូនៗមានអាយុលើសពី ១ ឆ្នាំ។ ការពិតទឹកដោះគោធម្មតា បង្កផលវិបាកដល់បេប៊ីដើម្បីរំលាយអាហារបានទាំងស្រុង បើធៀបនឹងទឹកដោះម៉ាក់ ឬម្សៅទឹកដោះគោសម្រាប់ទារក ដោយសារតែទឹកដោះគោស្រស់ មានផ្ទុកកំហាប់ជាតិរ៉ែ និងប្រូតេអ៊ីនខ្ពស់ អាចបង្កគ្រោះថ្នាក់ដល់តម្រងនោមបេប៊ីដែលនៅខ្ចី ក៏ដូចជាប៉ះពាល់ប្រព័ន្ធរំលាយអាហារទៀងផង។
មុនសម្រេចចិត្តឲ្យកូនយើង បៅទឹកដោះគោស្រស់ ត្រូវថ្លឹងថ្លែងឲ្យបានច្បាស់ ព្រោះក្នុងទឹកដោះគោស្រស់ពុំមានជាតិដែក វីតាមីន C និងសារជាតិផ្សេងទៀតគ្រប់គ្រាន់ សម្រាប់ទារកលូតលាស់ប្រកបដោយសុខភាពល្អនោះទេ។ បែបនេះ អាចបង្កឲ្យអូនៗកើតជំងឺកង្វះអាហារូបត្ថម្ភ ដូចជា ជំងឺស្លេកស្លាំង ដោយសារខ្វះជាតិដែកជាដើម។ មិនតែប៉ុណ្ណោះ ទឹកដោះគោស្រស់ ពុំផ្តល់សារជាតិខ្លាញ់ល្អ សម្រាប់ការលូតលាស់សម្រាប់ក្មេងដូចគ្នា។
យ៉ាងណា បើសិនជាកូនអាចទទួលយកទឹកដោះគោធម្មតាបានហើយ ជារឿងល្អ យើងអាចបន្ថែមរបបអាហារ ជាមួយផ្លែឈើ បន្លែ សាច់និងគ្រាប់ធញ្ញជាតិបាន។