ប៉ុន្មានក្បាច់នេះ ជួយសម្រួលបញ្ហាជាប់ស្មាបានដោយខ្លួនឯង

ដោយ ត្រួតពិនិត្យដោយ ជីព ចិត្ត

ការជាប់ស្មា ជាបញ្ហា​មិនប្រក្រតី ដែលបណ្ដាល​ឲ្យ​ឈឺចាប់ រឹង និង​មិនអាច​ធ្វើ​ចលនា​ស្មា​បាន​ដូច​ធម្មតា​ឡើយ។ ពុំទាន់មាន​ការ​បញ្ជាក់​ច្បាស់​នៅឡើយ ពីមូលហេតុ​បង្ក​ឲ្យ​ជាប់ស្មា ប៉ុន្ដែ​ការរលាក​ជាលិកា ត្រូវ​អះអាង​ថា បណ្ដាល​ឲ្យ​មានការ​ឈឺចាប់ និង​ធ្វើឲ្យ​ស្មា មិន​អាច​បត់បែន​បាន​ដូច​ប្រក្រតី។

ការ​ជាប់ស្មា ធ្វើឲ្យ​យើង​នៅមិន​សុខ​ក្នុង​ខ្លួន​ប៉ុន្មាន​ទេ ដោយ​គ្រាន់តែ​យើង​មាន​ចលនា​រាងកាយ​ប៉ះត្រង់​ស្មា​បន្ដិច វាបណ្ដាល​ឲ្យ​យើង​ឈឺភ្លាម។ បញ្ហា​នេះ មិន​អាច​ព្យាបាល​សះស្បើយ​ភ្លាមៗទេ វាត្រូវការ​ពេល​ច្រើន​បន្ដិច ទើប​ត្រឡប់​មកដូច​ប្រក្រតី​វិញ។ ប៉ុន្ដែ​មាន​វិធី​មួយ​ចំនួន ដែល​យើង​អាច​ធ្វើបាន ដើម្បី​ជួយ​សម្រួល និង​ឆាប់ជា​សះស្បើយ។

១. ហាត់ប្រាណ​រាងប៉ោល (Pendulum Stretch)

យើងឈរ និង​អោនបន្ដិច ហើយ​ទម្លាក់ដៃ​ខាង​ស្មាឈឺ ចុះក្រោម ហើយ​យោល​ជា​រាង​រង្វង់។ យោលឲ្យ​បាន ១០​ជុំ ក្នុង​ទិសដៅ​នីមួយៗ។ នៅពេល​រោគសញ្ញា​កាន់តែ​ធូរស្រាល បង្កើន​អង្កត់ផ្ទិត​នៃ​រំយោល ប៉ុន្ដែកុំបង្ខំ​ខ្លាំងពេក។ ពេល​យើង​បាន​ធូរស្រាល​កាន់តែខ្លាំង យើង​អាច​កាន់​របស់​មាន​ទម្ងន់​ស្រាលៗ និង​យោលវា​បាន។

២. ហាត់ប្រាណដោយ​ប្រើ​កន្សែង​ទាញ​ក្រោយខ្នង (Towel Stretch)

យើង​ប្រើ​ដៃទាំង​សងខាង ចាប់​កន្សែង​នៅខាងក្រោយ​ខ្នង​របស់​យើង ដោយ​ធ្វើ​ឲ្យ​កន្សែង​មាន​រាងផ្ដេក។ បន្ទាប់មក ប្រើ​ដៃខាង​ស្មា​គ្មាន​បញ្ហា ទាញ​កន្សែង​ឡើង​លើ ដើម្បី​ឲ្យ​ដៃខាង​ស្មាឈឺ មាន​ចលនា។ បើសិន​យើង​មិន​ឈឺទេ យើង​ក៏ប្រើ​ដៃខាង​ស្មាឈឺ ទាញ​កន្សែង​ចុះក្រោម​វិញ​ផងដែរ ហើយ​អនុវត្ត​ដូច្នេះ ឲ្យ​បាន​ពី ១០-២០​ដង/ថ្ងៃ។

៣. ចលនា​ម្រាមដៃ​លើជញ្ជាំង (Finger Walk)

យើងឈរ​ទល់​មុខ​ជញ្ជាំង ចម្ងាយ ៣/៤ នៃ​ប្រវែង​ដៃរបស់​យើង។ បន្ទាប់​មក ដាក់​ម្រាម​ដៃ​លើ​ជញ្ជាំង កម្ពស់​ត្រឹម​ចង្កេះ​របស់​យើង ហើយ​ធ្វើចលនា​ម្រាម​ដៃ វារ​ឡើង​លើ​ឲ្យ​ដល់​កម្ពស់​ស្មើ​នឹង​ស្មា ឬ​លើស​នេះ​ក៏បាន ប្រសិន​មិន​ឈឺ​នោះទេ។ អនុវត្ត​ដូច្នេះ ឲ្យ​បាន​ពី ១០-២០​ដង/ថ្ងៃ។

៤. ទាញដៃទៅកាន់ខ្លួន (Cross-body Reach)

សម្រាប់​វិធីនេះ យើង​អាច​អង្គុយ​ក៏បាន ឈរក៏បាន ហើយ​ប្រើដៃ​គ្មាន​បញ្ហា លើក​ដៃ​មាន​ស្មាឈឺ ត្រង់​កែងដៃ និង​ទាញទៅ​កាន់​ខ្លួន​របស់​យើង ដោយ​តិចៗ។ ពេល​ទាញ​ទៅ​ដល់​ខ្លួន យើង​ទប់​ឲ្យ​បាន ពី ១៥-២០​វិនាទី និង​អនុវត្ត​ឲ្យ​បាន ពី ១០-២០​ដង/ថ្ងៃ។

៥. ធ្វើចលនា​ក្លៀក (Armpit Stretch)

យើងឈរ និង​ប្រើដៃ​គ្មានបញ្ហា លើកដៃ​មាន​ស្មាឈឺ​ឡើងទៅ​លើ​ធ្នើរ មាន​កម្ពស់​ត្រឹម​ទ្រូង​របស់​យើង។ បន្ទាប់មក បត់ជង្គង់​ចុះក្រោម និង​បើកចំហ​ក្លៀក​ឲ្យ​កាន់តែ​ធំជាង​មុន។ ព្យាយាម​បត់​ជង្គង់ចុះ​ក្រោម​ឲ្យ​កាន់តែ​ខ្លាំងជាងមុន និង​បើកចំហ​ក្លៀក​បន្ថែម​ទៀត។ នៅពេល​យើង​បត់​ជង្គង់​ចុះក្រោម​កាន់តែ​ខ្លាំង ក្លៀក​នឹង​បើក​ចំហ​កាន់តែធំ​ផងដែរ ប៉ុន្ដែ​កុំបង្ខំ​ខ្លាំងពេក។ អនុវត្ត​វិធី​នេះ ឲ្យបាន​ពី ១០-២០​ដង/ថ្ងៃ។

៦. ទាញដៃមាន​ស្មាឈឺចេញក្រៅ (Outward Rotation)

វិធីនេះ និង​វិធី​បន្ទាប់ សម្រាប់​អនុវត្ត ពេល​អាការៈ​ជាប់​ស្មា​របស់​យើង បាន​ធូរស្រាល​ច្រើន​ហើយ។ សម្រាប់​វិធី Outward Rotation យើងត្រូវ​ប្រើដៃ​ទាំងពីរ ចាប់​ចុង​ខ្សែកៅស៊ូ​ទាំង​សងខាង ហើយ​ដាក់​ដៃ​ឲ្យ​កែង​នឹង​កែងដៃ​របស់​យើង​ក្នុង​មុំ ៩០ដឺក្រេ។ បន្ទាប់មក ប្រើដៃ​មាន​ស្មាឈឺ ទាញ​ខ្សែកៅស៊ូ​ឲ្យ​យឺត​ចេញក្រៅ និង​ទប់​ឲ្យ​បាន​ប្រមាណ ២​វិនាទី។ អនុវត្ត​ដូច្នេះ ឲ្យ​បាន ១០-១៥​ដង/ថ្ងៃ។

៧. ទាញដៃមាន​ស្មាឈឺចូលក្នុង (Inward Rotation)

យើងឈរ​ជិតទ្វារបិទ​ជិត​មួយ ហើយ​យកចុងកៅស៊ូម្ខាង ដាក់​ភ្ជាប់​នឹង​គន្លឹះទ្វារ ហើយ​ប្រើដៃ​មាន​ស្មាឈឺ ចាប់​ចុងក្រៅស៊ូ​ម្ខាងទៀត ហើយ​ដាក់​ដៃ​ឲ្យ​កែង​នឹង​កែងដៃ ក្នុងមុំ ៩០ដីក្រេ។ បន្ទាប់មក ទាញ​ខ្សែកៅស៊ូ​ឲ្យ​យឺតចូល​ក្នុង និង​ទប់​ឲ្យបាន ៥​វិនាទី។ អនុវត្ត​ដូច្នេះ ឲ្យ​បាន​ពី ១០-១៥​ដង/ថ្ងៃ។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ចុចស៊ែរឥឡូវនេះ

ត្រួតពិនិត្យថ្ងៃទី ខែ​តុលា 11, 2019 | កែសម្រួលចុងក្រោយ ខែ​តុលា 11, 2019

អ្នកអាចចូលចិត្ត