ម៉ាក់ៗខ្លះធ្លាប់ឮចាស់ៗនិយាយថា ស្ត្រីដែលពពោះកូនស្រីស្រាលជាងកូនប្រុស មានន័យថាកូនស្រីគ្រប់ខែឆាប់កើតជាងកូនប្រុស។ ឧទាហរណ៍ថា កូនស្រី ៩ ខែគត់ ហើយបើប្រុស ៩ ខែ ១០ ថ្ងៃពេញ ឬលើសខ្វះតិចតួច។ តើនោះជារឿងពិតដែរឬទេ?
ចាស់ៗថា បើម៉ាក់ៗពពោះកូនស្រីឆាប់សម្រាលជាងកូនប្រុស ជារឿងពិតអត់?
វេជ្ជបណ្ឌិត ច័ន្ទ រស្មី ឯកទេសសម្ភព និងរោគស្ត្រី បានបដិសេធការលើកឡើងបែបនោះ ហើយពន្យល់ថា ថ្ងៃឈឺពោះសម្រាលកូន គឺជាថ្ងៃដែលឈឺពោះមានចង្វាក់ឈឺបាត់ឈឺបាត់ (ក្នុងនោះធ្លាក់រម្អិលលាយឈាម) ឈឺរហូតដល់កូនកើតចេញពីផ្ទៃម្ដាយ។
វេជ្ជបណ្ឌិតឯកទេសសម្ភព បានរៀបរាប់ពីពេលវេលាដែលត្រូវសម្រាលកូន ដូចខាងក្រោម៖
– សម្រាលកូនគ្រប់ខែ៖ សម្រាលកូនក្នុងចន្លោះពេលដែលកូនមានអាយុ ៣៧ សប្ដាហ៍ពេញ នៃការបាត់រដូវ ដល់ ៤១ សប្តាហ៍។
– សម្រាលកូនមិនគ្រប់ខែ៖ ក្រោម ៦ ខែ មានន័យថា រលូត បើចាប់ពី ៦ ខែទៅ ៨ខែកន្លះ មានន័យថាសម្រាលមុនខែ។
– សម្រាលកូនលើសខែ៖ គឺចាប់ពី ៤១ សប្ដាហ៍នៃការបាត់រដូវឡើងទៅ មិនទាក់ទងនឹងភេទរបស់កូនឡើយ។
លោកបន្តទៀតថា ការលើសខ្វះថ្ងៃគ្នានោះ ព្រោះតែម៉ាក់ៗរាប់ថ្ងៃមករដូវចុងក្រោយភាន់ច្រឡំ ឬខ្លះទៀតមិនទាំងចងចាំផង ទើបបណ្ដាលឲ្យសម្រាលមុន ឬលើសថ្ងៃកំណត់របស់គ្រូពេទ្យ។ បន្ថែមពីលើនោះវេជ្ជបណ្ឌិត ច័ន្ទ រស្មី បានណែនាំឲ្យស្រ្តីមានផ្ទៃពោះឲ្យធ្វើលំហាត់ប្រាណ ទើបជួយឲ្យសម្រាលកូនបានរហ័ស និងមិនសូវឈឺចាប់។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕