ប្រាកដហើយថា អ្នកចង់ចាកចេញ?
ការត្រៀមខ្លួនយកកូន និងធ្វើជាម៉ាក់ប៉ាគេ ទាំងដឹងច្បាស់ថា មានកូនក្នុងផ្ទៃហើយ ជារឿងសប្បាយអស្ចារ្យបំផុត។ ដើរក៏ញញឹម គេងក៏ញញឹម ធ្វើអ្វីក៏សប្បាយ។ ប៉ុន្តែរឿងដ៏សោកសៅបំផុតសម្រាប់ជីវិតគូ ពេលហេតុភេទអាក្រក់កើតឡើងដោយចៃដន្យ ឬមិនបានព្រាងទុក គឺ “ការរលូត ឬធ្លាក់កូន”។
នេះជាបទពិសោធន៍ដ៏សែនឈឺចាប់មួយសម្រាប់ស្ត្រីគ្រប់រូប និងក្រុមគ្រួសារ មិនដែលស្រមៃចង់បាន។ ការបាត់បង់មនុស្សជាទីស្រឡាញ់ទាំងមិនទាន់បានឃើញមុខដូច្នេះ ពិតជាដាក់សម្ពាធ ទាំងផ្លូវកាយ និងផ្លូវចិត្ត។ ប៉ុន្តែក៏គួរកុំផ្ដេកផ្ដួលទៅតាមអារម្មណ៍រហូតនោះដែរ ព្រោះអ្វីៗ បានកន្លងផុតទៅហើយ។ យើងគួរត្រៀមខ្លួនសម្រាប់កែខៃ និងទទួលយកអ្វីដែលថ្មី ដើម្បីភាពល្អប្រសើរ។ តើមានវិធីអីខ្លះ អាចជម្នះបញ្ហានេះបាន?
១- អារម្មណ៍ក្រោយបាត់បង់៖ ប្រាកដជាច្របូកច្របល់ច្រើន ប្រែប្រួលឆាប់ (ម្ដងគិតនេះ ម្ដងគិតនោះ) ទទួលស្គាល់ និងដឹងកំហុស សោកសៅ ខឹងសម្បា អស់សង្ឃឹម ឬក៏បាក់ទឹកចិត្ត លែងចង់បានអ្វី ឬអស់កម្លាំងទៅធ្វើអ្វីទាំងអស់ មានបញ្ហាដំណេក (គេងមិនបាន) លែងឃ្លាន ញ៉ាំមិនចូល ចាប់ផ្ដើមអស់កម្លាំង អារម្មណ៍មិនមូល ហើយជួនកាលនៅសុខៗស្រាប់តែយំម្នាក់ឯង ឬអាចមានបញ្ហាមួយចំនួនទៀតអាស្រ័យទៅលើស្ថានភាព ឬលក្ខខណ្ឌបុគ្គលម្នាក់ៗ។ រោគសញ្ញាទាំងនេះ អាចបង្កឲ្យកាន់តែធ្ងន់បាន។
២- អារម្មណ៍ប្រែប្រួលតាមដំណាក់កាល៖ បញ្ហាសតិអារម្មណ៍ ត្រូវបានក្រុមវេជ្ជសាស្ត្របែងចែក ៣ដំណាក់កាល។
ដំណាក់កាលទី១-រន្ធត់ និងមិនគួរឲ្យជឿ៖ ភ្លាមៗពេក ដើម្បីបើកចិត្តទទួលស្គាល់ការពិត ថាកូនសំណព្វមិនមានសំណាងបានឃើញមុខម៉ាក់ប៉ាជារៀងរហូត ស្ត្រីជាម្ដាយ ពិតជាមានអារម្មណ៍បែបនេះ។
ដំណាក់កាលទី២-ខឹង ដឹងកំហុស និង បាក់ទឹកចិត្ត៖ ក្រោយដំណាក់ទទួលស្គាល់ថា អ្វីដែលបានកើតឡើង និងបាត់បង់ មិនអាចវិលត្រឡប់ជារៀងរហូត (ម្ដាយ) ចាប់ផ្ដើមដាក់បន្ទុក និងទម្លាក់កំហុសសព្វបែបយ៉ាងមកលើខ្លួនឯង។ ករណីឈានដល់ដំណាក់កាលបាក់ទឹកចិត្តនឹងកើតឡើង ក្រោយសតិអារម្មណ៍ពេលនេះ មិនបានគិតអ្វីក្រៅពីបន្ទោសខ្លួនឯង និងសោកស្ដាយពីកំហុសមិនអាចមើលថែកូនក្នុងផ្ទៃបានល្អ។
ដំណាក់កាលទី៣-ទទួលស្គាល់ការពិត៖ អាចជាសញ្ញាណល្អការចាប់ផ្ដើម គេចចេញពីភាពសោកសៅ បន្ទាប់ពីឃុំឃាំងខ្លួនមួយរយៈធំ។ ឬអាចចាត់ទុកថា ពេលវេលា ជាអ្នកដោះស្រាយបញ្ហាបានយ៉ាងមានប្រសិទ្ធភាព ហើយការឈឺចាប់ក៏ផ្ដើមសាបរលាបបន្តិចម្ដងៗដោយឯកឯង។ ទោះរឿងនេះ មើលទៅប្រសើរជាងមុន ប៉ុន្តែអារម្មណ៍ស្ថិតក្នុងដំណាក់កាលទី១-២ អាចកើតមានវិញគ្រប់ពេលភ្លាមៗ ក្នុងករណីស្រ្ដីជាម្ដាយ៖
−ឃើញទារក ឬ ស្ត្រីពពោះ
−ឃើញម្ដាយបំបៅដោះកូន
−ជួបជុំក្រុមគ្រួសារសាច់ញាតិ
−ជួប ឬពិគ្រោះជាមួយពេទ្យ(សម្ភព)
−ឃើញ ឬឮព័ត៌មាន ឬ រឿងរ៉ាវទាក់ទងនឹងការបង្កើតកូន
−គិតរឿងមិនគួរគិត (គិតដល់រឿងអំឡុងពពោះ ហើយភាគច្រើនពេលនៅម្នាក់ឯង)។
៣- ដំណោះស្រាយ៖ ប្រុស និងស្រីតែងមានរបៀបខុសគ្នាក្នុងការដោះស្រាយបញ្ហារៀងខ្លួន។ ស្រីៗភាគច្រើនចូលចិត្តបង្ហាញពីភាពសោកសៅចេញមកក្រៅ។ ចំណែកឯប្រុសៗចូលចិត្តលាក់ភាពសោកសៅក្នុងចិត្តតែឯង តាមរយៈធ្វើខ្លួនឲ្យរវល់ខ្លាំង ទាំងការងារ ឬបញ្ហាក្នុងផ្ទះដើម្បីបំភ្លេចរឿងដ៏ឈឺចាប់នេះ។ ចំពោះបុរស មិនមានន័យថា គេមិនស្រលាញ់កូនដែលបាត់បង់ទេ គ្រាន់តែជារបៀបនៃការគ្រប់គ្រងអារម្មណ៍ប៉ុណ្ណោះ។
កុំព្យាយាមនៅម្នាក់ឯង៖ គេចពីមនុស្សធ្លាប់ស្និទ្ធស្នាល ឬមិត្តភ័ក្ដិ ក្រុមការងារ ញាតិមិត្ត…មកបន្តសម្ងំគិតរឿងសោកសៅ កន្លងទៅ ពិតជាមិនអាចជួយស្ដារស្ថានភាពឲ្យកាន់តែល្អទេ។ រកពេលវេលា ជួបជុំ បន្តការជជែក ជួបជុំញ៉ាំអីខាងក្រៅ ហាត់ប្រាណ ដើរលេងបន្លប់ ដែលធ្លាប់តែសប្បាយជាក្រុម។
រកគ្នាប្រឹក្សា ឬពិភាក្សា៖ និយាយចុះ រៀបរាប់ចុះ ទួញសោកចុះ ពីការឈឺចាប់ក្នុងចិត្ត ដើម្បីបានធូរខ្លះ បើមានអ្នកយល់ចិត្ត នៅអង្គុយស្ដាប់ ឬលើកទឹកចិត្ត។ មនុស្សជិតស្និទ្ធបំផុតអាចជា ស្វាមី ពួកម៉ាក ឬមនុស្សក្នុង ក្រុមគ្រួសារ។
ញញឹម ហើយមានវិធីដោះស្រាយជានិច្ច៖ ទោះមានគ្នា មិនមែនមានន័យថា គ្រប់ពេលគេនៅស្ដាប់យើងទេ។ ដូច្នេះ ត្រូវធ្វើខ្លួនជាមនុស្សដោះស្រាយបញ្ហា គិតរកវិធី លើសពីមួយ ឬធ្វើរឿងដែលចូលចិត្តបំផុត ហើយអង្កេតលើប្រសិទ្ធភាព ទោះពេលខ្លះត្រូវធ្វើម្នាក់ឯង (តែកុំធ្វើជាមនុស្សកណ្ដោចកណ្ដែង)ក៏ដោយ។ ការចេះឲ្យឱកាស ឬមានពេលវេលាសម្រាប់ខ្លួនឯង ក៏អាចជាមធ្យោបាយល្អដែរ។
រត់រកពេទ្យ៖ ក្រៅពីមនុស្សដែលស្និទ្ធស្នាលប៉ុន្មាននាក់ ដែលតែងនៅគាំទ្រ ព្យាយាមយល់ និងលើកទឹកចិត្ត ស្ទើរគ្រប់ពេលនោះ គ្រូពេទ្យក៏ជាភាគីសំខាន់ ក្នុងការតំណាលប្រាប់ពីស្ថានភាពសុខភាព (ក្នុងករណីបាត់បង់កូនដោយបញ្ហាសុខភាព) អមដោយដំណោះស្រាយ ដើម្បីបង្ការបញ្ហាចំពោះករណី (ធ្វើម៉េចកុំឲ្យបាត់បង់) ពេលមានកូនក្រោយៗទៀត។
អាណិតដៃគូ(ប្ដី/ប្រពន្ធ)ផង៖ ករណីបាត់បង់មនុស្សជាទីស្រឡាញ់ អ្នកណាក៏សោកសៅដែរ ប៉ុន្តែមនុស្សស្លាប់ហើយ មិនអាចរស់ឡើងវិញបានទេ។ ដូច្នេះ អ្វីដែលត្រូវធ្វើ ដូចបញ្ជាក់ចំណុចខាងលើ (ត្រូវធ្វើខ្លួនជាមនុស្សដោះស្រាយបញ្ហា) ញញឹមញញែម យកចិត្តទុកដាក់ បន្លប់ការពិបាកចិត្តរបស់ប្រពន្ធ/ប្ដី យើង។ ត្រូវធ្វើជាមនុស្សចិត្តធ្ងន់ អត់ធ្មត់ គោរព និងព្យាយាមធ្វើជាមនុស្សយល់ចិត្ត ចំពោះប្រតិកម្ម របស់ម្ខាងទៀត អាចជាអាការៈ សោះអង្គើយ ឬទ្រគោះបោះបោក ឬកាយវិការ មិនសូវខ្វល់នឹងអ្នកជាដើម។
សាកគិតទៅមើល៍ កូនគេកូនយើង តើពិបាកចិត្តកម្រិតណា? អ្នកណាខ្លះយល់អារម្មណ៍នេះ?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ប្រើវិធីគណនានេះ គឺដើម្បីរកថ្ងៃសម្រាលកូន។ វិធីនេះអាចប៉ាន់ស្មានថ្ងៃសម្រាលបាន តែមិនធានាថាត្រឹមត្រូវទាំងស្រុងទេ។ ស្រ្តីភាគច្រើន មិនទាំងអស់ទេ អាចឆ្លងទន្លេមុន ឬក្រោយមួយសប្ដាហ៍ នៃពេលវេលាប៉ាន់ស្មាននេះ។
រយៈពេលវដ្ដរដូវ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
After a Miscarriage: Surviving Emotionally http://americanpregnancy.org/pregnancy-loss/miscarriage-surviving-emotionally/ Accessed April 18, 2017
