ការពារ​​មហារីក​សុដន់​ ស្រីៗគួរ​ធ្វើ​លំហាត់​ប្រាណ​នៅ​ពេល​ព្រឹក​​​

    ការពារ​​មហារីក​សុដន់​ ស្រីៗគួរ​ធ្វើ​លំហាត់​ប្រាណ​នៅ​ពេល​ព្រឹក​​​

    ការ​ធ្វើ​លំហាត់​ប្រាណ​ មិន​ត្រឹម​តែ​ធ្វើ​ឲ្យ​ស្រី​ៗ​យើង​មាន​រូបរាង​សមសួន​ និង​ស្បែក​ភ្លឺ​ថ្លា​ប៉ុណ្ណោះ​ ទេ​ តែ​វា​ក៏​​​ផ្ដល់​អត្ថប្រយោជន៍​ដល់​សុខភាព​របស់​យើង​នៅ​ក្នុង​ការ​ការពារ​ពី​ជំងឺ​មហារីក​ផ្សេងៗ​ ជាពិសេស​មហារីក​សុដន់ និង​មហារីក​ក្រពេញ​ប្រូស្តាត​ផង​ដែរ​​​។ ​ការ​សិក្សា​ថ្មី​មួយ​បាន​បង្ហាញ​ថា​ ​អ្នក​ដែល​ហាត់ប្រាណ​នៅ​ពេល​ព្រឹក​ចន្លោះ​ពី​ម៉ោង​៨ ដល់​ម៉ោង​១០​ព្រឹក​ ​មាន​អត្រា​វិវត្តទៅ​រក​​ជំងឺ​មហារីក​តិច​ជាង​អ្នក​ដែល​ធ្វើ​លំហាត់​ប្រាណ​នៅ​ពេល​រសៀល​ និង​ពេល​ល្ងាច​។​

    ១.​ការ​គេង​ និង​លំហាត់​ប្រាណ

    ជាក់ស្ដែង​ ​អត្រា​អ្នក​ដែល​វិវត្ត​​ទៅ​ជា​ជំងឺ​មហារីក​ និង​អត្រា​ស្លាប់​ដោយ​សារ​មហារីក​ គឺ​មាន​ចំនួន​ខ្ពស់​​គួរ​ឲ្យ​កត់​សម្គាល់​។ ​មនុស្ស​មួយ​ចំនួន​ប្រហែល​ជា​មិន​​ធ្លាប់​ដឹង​ទេ​ថា​ ការ​ផ្លាស់​ប្ដូរ​ម៉ោង​ហាត់ប្រាណ​​ដ៏​តូចតាច​នេះ​ បាន​ចូលរួម​ចំណែក​យ៉ាង​សំខាន់​ នៅ​ក្នុង​ការ​កាត់បន្ថយ​ផល​ប៉ះពាល់​នៃ​ជំងឺ​មហារីក​ ដែល​ជា​ជំងឺ​ដ៏​កាច​សាហាវ​មួយ​នៅ​ក្នុង​ពេល​បច្ចុប្បន្ន​នេះ​។ ​ការ​បង្កើន​សកម្មភាព​រាងកាយ​​នឹង​ជួយ​កាត់​បន្ថយ​​ប្រេវ៉ាឡង់​មហារីក​បាន​យ៉ាង​ប្រសើរ​។

    ជាមួយ​គ្នា​នេះ​ដែរ​ សង្វាក់​នៃ​សកម្មភាព​ប្រចាំថ្ងៃ​ ​ អាច​មាន​ទំនាក់ទំនង​ជាមួយ​ឱកាស​នៃ​ការវិវត្ត​ទៅ​រក​​ជំងឺ​មហារីក​។ សង្វាក់​នៃ​សកម្មភាព​ប្រចាំថ្ងៃ​ គឺ​សំដៅ​ទៅ​លើ​ដំណើរការ​ជីវសាស្ត្រ​ដែល​ជះឥទ្ធិពល​ដល់​វដ្ដ​នៃ​ការ​គេងភ្ញាក់​របស់​មនុស្ស​ម្នាក់​ៗ​។​ ​ចំពោះ​អ្នក​ដែល​ធ្វើការ​វេន​យប់​​​អាច​នឹង​មាន​ផល​ប៉ះពាល់​ធ្ងន់ធ្ងរ​ដល់​សង្វាក់​នៃ​សកម្មភាព​ប្រចាំថ្ងៃ ដែល​ជា​ហេតុ​ធ្វើ​ឲ្យ​កើន​ឡើង​នូវ​ហានិភ័យ​នៃ​ជំងឺ​មហារីក​សុដន់​។

    ស្រីៗហាត់ប្រាណ

    ២.​លំហាត់​ប្រាណ​ពេល​ព្រឹក​ព្រលឹម​​កាត់​បន្ថយ​​ហានិភ័យ​​​ជំងឺ​មហារីក​​​​

    ក្រុម​អ្នកស្រាវជ្រាវ​បាន​បង្ហាញ​ថា​ ការវិវត្តទៅ​​រក​ជំងឺ​មហារីក​សុដន់​ ត្រូវ​បាន​កាត់​បន្ថយ​ដល់​ទៅ​២៥% ចំពោះ​អ្នក​ដែល​ធ្វើ​លំហាត់​ប្រាណ​នៅ​ពេល​ព្រឹកព្រលឹម​ បើ​ប្រៀបធៀប​ជាមួយ​នឹង​អ្នក​ដែល​មិន​ធ្វើ​លំហាត់​ប្រាណ​ទាល់​តែ​សោះ​។​ ​យ៉ាង​ណា​មិញ​ អត្ថប្រយោជន៍​នៃ​លំហាត់​ប្រាណ​​ពេល​ព្រឹក​​​ចំពោះ​​ជំងឺ​មហារីក​សុដន់​នេះ​ អាច​បណ្ដាល​មកពី​អ័រម៉ូន​អឺស្ត្រូហ្សែន​​ ពីព្រោះ​នៅ​ពេល​ដែល​អ័រម៉ូន​នេះ​ស្ថិត​នៅ​ក្នុង​កម្រិត​ទាប​ យើង​មិន​ចាំបាច់​ព្រួយ​បារម្ភ​អំពី​ការ​កើត​ឡើង​​ជំងឺ​មហារីក​សុដន់​​ឡើយ​។ ការ​ហាត់​ប្រាណ​នៅពេលព្រឹក​ជួយ​បញ្ចុះ​កម្រិត​អ័រម៉ូននេះ ហើយ​អ័រ​ម៉ូន​អឺស្រ្តូហ្សែន​ទៀត​សោត​ត្រូវ​ផលិត​ច្រើន​នៅ​ម៉ោង​៧​ព្រឹក​។​

    ​ម្យ៉ាង​វិញ​ទៀត​ អ័រម៉ូន​មេឡាតូនីន ក៏​អាច​ជា​កត្តា​កាត់​បន្ថយ​នូវ​​ជំងឺ​មហារីក​សុដន់​ផង​ដែរ​ ដោយ​សារ​តែ​វា​អាច​ការពារ​ប្រឆាំង​នឹង​ហានិភ័យ​នៃ​ជំងឺ​មហារីក​ផ្សេងៗ។ ​ការ​ហាត់​ប្រាណ​នៅ​ពេល​ថ្ងៃ​ និង​ពេល​យប់​អាច​ពន្យារពេល​នៃ​ការ​ផលិត​​នូវ​អ័រម៉ូន​ប្រភេទ​នេះ​ដែរ​។

    ពិត​ណាស់​ រាងកាយ​មនុស្ស​យើង​គឺ​ត្រូវ​ការ​ការ​ថែទាំ​ជា​ចាំបាច់​ ដែល​ប្រៀប​ដូចជា​ម៉ាស៊ីន​ដែល​ត្រូវ​ការ​ចាក់​ប្រេង​ដូច្នោះ​ដែរ។ ដូចនេះ​ វា​ទាមទារ​ឲ្យ​យើង​ភ្ញាក់​ពី​គេង​ជា​​រៀងរាល់​ព្រឹក​ ដើម្បី​ធ្វើ​លំហាត់​ប្រាណ​រាងកាយ​ជា​ប្រចាំ។​ ចូរ​ចាប់​ផ្ដើម​​ជាមួយ​នឹង​ការ​រត់​ ហាត់​យូហ្គា ឬ​ទៅ​ក្លឹប​ហាត់ប្រាណ​​ជាដើម​ ដើម្បី​ធានា​ថា​ ​រាងកាយ​យើង​នឹង​ចាក​ផុត​ពី​ជំងឺ​មហារីក​ផ្សេង​ៗ​។

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ ទូច សុខា កែសម្រួល​ចុងក្រោយ 14/12/2020
    ត្រួតពិនិត្យដោយ វេជ្ជ. ចាន់ ស៊ីណេត