ស្វែងយល់ពីការប្រើប្រាស់
១- ថ្នាំ Triamcinolone ព្យាបាលជំងឺអីខ្លះ?
Triamcinolone ស្ថិតនៅក្នុងក្រុមថ្នាំ Corticosteroids (ប្រឆាំងរលាក) អាចបង្ការកុំឲ្យមានការបញ្ចេញសារធាតុង្កឲ្យមានការរលាកក្នុងរាងកាយ។
Triamcinolone គឺសម្រាប់លេបព្យាបាលជំងឺជាច្រើនដូចជា ជំងឺប្រតិកម្មអាលែកហ្ស៊ី បញ្ហាស្បែក រលាកពោះវៀនធំ ជំងឺរលាកសន្លាក់ ជំងឺ Lupus ជំងឺ Psoriasis (ជំងឺបង្កដោយប្រព័ន្ធភាពស៊ាំបណ្ដាលធ្វើឲ្យរមាស់ និងកន្ទួលក្រហមស្បែក) ឬបញ្ហាដង្ហើម។
យ៉ាងណា ថ្នាំ Triamcinolone អាចប្រើក្នុងករណីផ្សេងទៀតមិនបានរៀបរាប់ខាងលើនេះ។
២- គេប្រើថ្នាំនេះប្រើយ៉ាងម៉េច?
ត្រូវប្រើ Triamcinolone ទៅតាមការណែនាំរបស់វេជ្ជបណ្ឌិត ដោយមិនត្រូវលេបលើស ឬខ្វះកម្រិតថ្នំា ឬយូរជាងការណែនាំនោះឡើង។ ករណីខ្លះវេជ្ជបណ្ឌិត អាចធ្វើការកែតម្រូវបរិមាណថ្នាំដើម្បីទទួលបានលទ្ធផលព្យាបាលល្អជាងមុន។
ត្រូវលេប Triamcinolone ជាមួយអាហារ ដើម្បីការពារកុំឲ្យឈឺក្រពះ។
កម្រិតថ្នាំស្តេរ៉ូអ៊ីត អាចនឹងត្រូវផ្លាស់ប្ដូរ បើយើងមានបញ្ហាធ្ងន់ធ្ងរមួយចំនួនដូចជា មានជំងឺធ្ងន់ធ្ងរ គ្រុនក្ដៅ មានឆ្លងរោគផ្សេងៗ ត្រូវវះកាត់ ឬករណីសង្គ្រោះបន្ទាន់ណាមួយ។ ត្រូវប្រាប់គ្រូពេទ្យ បើយើងមានបញ្ហាយើងកំពុងប្រើថ្នាំប្រភេទនេះ ព្រោះអាចធ្វើឲ្យលទ្ធផលវេជ្ជសាស្រ្តមានភាពមិនប្រក្រតី។
មិនត្រូវឈប់ប្រើថ្នាំ Triamcinolone ភ្លាមៗទេ ព្រោះអាចធ្វើឲ្យជំងឺរើឡើងវិញ។ ក្នុងករណីបន្ទាន់ ត្រូវប្រាប់គ្រូពេទ្យពេលសម្រេចចិត្តឈប់ប្រើថ្នាំ ពាក់កាតសម្គាល់បង្ហាញថាយើងកំពុងប្រើប្រាស់ថ្នាំប្រឆាំងការរលាក។ គ្រូពេទ្យ ពេទ្យធ្មេញ ឬអ្នកផ្ដល់សេវាសង្គ្រោះបន្ទាន់ ទទួលព្យាបាលយើង ចាំបាច់ត្រូវដឹងយើងបានប្រើប្រាស់ថ្នាំនេះ។
៣- ត្រូវរក្សាទុកថ្នាំនេះដោយវិធីណា?
ថ្នាំ Triamcinolone អាចរក្សាទុកបានល្អក្នុងបន្ទប់សីតុណ្ហភាពល្មម ចៀសឆ្ងាយពីពន្លឺថ្ងៃ និងសំណើម។ រក្សាថ្នាំកុំឲ្យខូច មិនត្រូវទុកនៅក្នុងបន្ទប់ទឹក ឬទូទឹកកកទេ។ លើទីផ្សារប្រហែលជាមានថ្នាំម៉ាក Triamcinolone ផ្សេងគ្នា ហើយការរក្សាទុកក៏ខុសគ្នា។ ហេតុនេះសំខាន់ណាស់ ត្រូវពិនិត្យមើលក្រដាសណែនាំផលិតផលពីការរក្សាទុក ឬសួរឱសថការី។ ដើម្បីសុវត្ថិភាពគួរថែរក្សាទុកថ្នាំគ្រប់ប្រភេទឲ្យឆ្ងាយពីដៃក្មេង និងសត្វចិញ្ចឹម។
ពុំគួរចោលថ្នាំតាមបង្គន់ ឬតាមលូបង្ហូរទឹកទេ លើកលែងតែមានការណែនាំពីគ្រូពេទ្យ។ សំខាន់ណាស់ត្រូវកម្ទេចថ្នាំប្រភេទនេះឲ្យបានត្រឹមត្រូវ ពេលហួតកាលកំណត់ ឬលែងប្រើ។ ពិភាក្សាជាមួយឱសថការី សម្រាប់ព័ត៌មានលម្អិតពីរបៀបកម្ទេចថ្នាំ។
កត្តាគួរប្រុងប្រយ័ត្ន
៤- ត្រូវដឹងអ្វីខ្លះមុនប្រើ?
មុនពេលប្រើ Triamcinolone ត្រូវប្រាប់គ្រូពេទ្យប្រសិនបើបញ្ហាប្រតិកម្មជាមួយថ្នាំដូចជា៖
– ប្រតិកម្មអាលែកហ្ស៊ី៖ ត្រូវប្រាប់គ្រូពេទ្យបើធ្លាប់មានអាការៈមិនស្រួល ឬធ្លាប់មានប្រតិកម្មជាមួយថ្នាំនេះ ឬថ្នាំដទៃ។ ប្រាប់គ្រូពេទ្យបើមានប្រតិកម្មផ្សេងៗ ដូចជា ប្រតិកម្មជាមួយអាហារ ជាតិពណ៌ សាធាតុរក្សាគុណភាពអាហារបានយូរ ឬមានប្រតិកម្មជាមួយសត្វ។ សម្រាប់ថ្នាំ គ្មានវេជ្ជបញ្ជាត្រូវអានក្រដាសណែនាំ ឬពិនិត្យរកមើលគ្រឿងផ្សំរបស់ថ្នាំជាមុន។
– សម្រាប់ក្មេង៖ គ្មានការសិក្សាណារកឃើញពីផលប៉ះពាល់លើក្មេងៗ ដោយសារប្រើប្រាស់ថ្នាំនេះនៅឡើយ។ ប៉ុន្តែដោយសារថ្នាំនេះមានសារជាតិពុល ដូច្នេះត្រូវប្រើដោយមានការប្រុងប្រយ័ត្នខ្ពស់។ ក្មេងៗស្រូបយកឪសថនេះតាមស្បែកច្រើនពេក អាចបង្កឲ្យមានផលប៉ះពាល់ធ្ងន់ធ្ងរបាន។ ប្រសិនបើក្មេងៗកំពុងប្រើប្រាស់ថ្នាំ Triamcinolone ត្រូវធ្វើតាមការណែនាំរបស់គ្រូពេទ្យឲ្យបានខ្ជាប់ខ្ជួន។
– សម្រាប់មនុស្សចាស់៖ ការសិក្សាមិនទាន់រកឃើញបញ្ហា ឬផលប៉ះពាក់ព័ន្ធមនុស្សចាស់ ដោយសារប្រើប្រាស់ថ្នាំប្រភេទនេះទេ។
៥–មានសុវត្ថិភាពចំពោះស្រ្តីកំពុងពពោះ និងបំបៅដោះកូនទេ?
មិនមានព័ត៌មានពីសុវត្ថិភាពការប្រើថ្នាំនេះ ទាំងអំឡុងពេលមានផ្ទៃពោះ និងបំបៅដោះបេប៊ីនៅឡើយទេ។ ហេតុនេះពិភាក្សាជាមួយវេជ្ជបណ្ឌិត ពីគុណប្រយោជន៍ និងហានិភ័យមុនពេលប្រើ គឺជារឿងចាំបាច់។
ស្វែងយល់ពីផលរំខាន
៦- ផលរំខានមានអ្វីខ្លះ?
ត្រូវប្រញាប់ទៅជួបគ្រូពេទ្យភា្លមៗ បើប្រទះផលរំខានអំឡុងពេលប្រើថ្នាំនេះ។
ផលប៉ះពាល់ធ្ងន់ធ្ងរ៖
– គំហើញមានបញ្ហា (មើលអត់ច្បាស់)
– ហើម ឡើងគីឡូលឿន មានអារម្មណ៍ហត់
– ជំងឺបាក់ទឹកចិត្តធ្ងន់ធ្ងរ មានគំនិត ឬឥរិយាបថមិនប្រក្រតី ប្រកាច់
– លាមកមានឈាម ឬឡើងខ្មៅ ក្អកឈាម
– រលាកលំពែង៖ ឈឺនៅតំបន់ក្រពះខ្លាំង ហើយចាក់ទៅខ្នង ចង្អោរ និងក្អួត បេះដូងដើរញាប់
– កម្រិតប៉ូតាស្យូមចុះទាប៖ នាំឲ្យ វង្វេង ចង្វាក់បេះដូងមិនប្រក្រតី ស្រេកទឹកខ្លាំង នោមច្រើន ឈឺជើង ខ្សោយសាច់ដុំ ឬជើងលែងមានវិញ្ញាណ
– ឡើងសម្ពាធឈាមធ្ងន់ធ្ងរ៖ ឈឺក្បាលខ្លាំង ព្រិលភ្នែក ហឹងត្រចៀក ស្រឺត វង្វេង ចុកទ្រូង ហត់ បេះដូងមិនប្រក្រតី និងប្រកាច់។
ផលប៉ះពាល់កម្រិតស្រាលមាន៖
– គេងមិនលក់ អារម្មណ៍ប្រែប្រួល
– ឡើងមុន ស្បែកស្ងួត ស្បែកស្តើង ជាំ ឬប្រែពណ៌ស្បែក
– របួសមិនងាយជាសះ
– បែកញើសច្រើន
– ឈឺក្បាល វិលមុខ មានអារម្មណ៍ធេងធោង
– ចង្អោរ ឈឺក្រពះ ប៉ោងពោះ
– ខ្សោយសាច់ដុំ
– ទីតាំងខ្លាញ់លើរាងកាយប្រែប្រួល ពិសេសនៅ ដើមដៃ ជើង មុខ ក សុដន់ និងចង្កេះ។
មនុស្សគ្រប់គ្នា មិនប្រាកដថាមានរោគសញ្ញាដូចគ្នាទាំងអស់ទេ នៅអាចមានរោគសញ្ញាផ្សេងទៀត ហេតុនេះបើមានចម្ងល់ អាចពិភាក្សាជាមួយគ្រូពេទ្យ ឬឱសថការីបន្ថែម។
ស្វែងយល់ពីអន្តរកម្មថ្នាំ
៧- អន្តរកម្មថ្នាំ
ថ្នាំ Triamcinolone អាចមានប្រតិកម្មជាមួយថ្នាំផ្សេងទៀត យើងកំពុងប្រើប្រាស់ ជាហេតុនាំឲ្យផ្លាស់ប្ដូរអំពើរបស់ថ្នាំ បង្កើនគ្រោះថ្នាក់ ផលរំខានដល់យើង។ ដើម្បីចៀសវាងអន្តរកម្មពីថ្នាំនេះ គួររក្សាទុកបញ្ជីឈ្មោះថ្នាំទាំងអស់យើងកំពុងប្រើ ទាំងមាន ឬគ្មានវេជ្ជបញ្ជា និងផលិតផលពីរុក្ខជាតិ យកបញ្ជីនោះទៅឲ្យវេជ្ជបណ្ឌិត ឬឱសថការីពិនិត្យមើល។ ដើម្បីសុវត្ថិភាព កុំចាប់ផ្ដើមប្រើ ឬឈប់ប្រើ ផ្លាស់ប្ដូរកម្រិតថ្នាំដោយគ្មានការណែនាំ និងយល់ព្រមពីវេជ្ជបណ្ឌិតឲ្យសោះ។
៨- អន្តរកម្មជាមួយអាហារ ឬគ្រឿងស្រវឹង
អាហារ និងគ្រឿងស្រវឹងអាចធ្វើឲ្យដំណើរការរបស់ថ្នាំ មានការប្រែប្រួល អាចធ្វើឲ្យមានគ្រោះថ្នាក់ ឬផលប៉ះពាល់កាន់តែធ្ងន់ធ្ងរ។ ត្រូវពិភាក្សាជាមួយគ្រូពេទ្យ ឬឱសថការីដើម្បីដឹងអំពីប្រភេទអាហារ និងគ្រឿងស្រវឹងទាំងនោះ មុនពេលចាប់ផ្តើមប្រើប្រាស់ថ្នាំ។
៩- អន្តរកម្មជាមួយសុខភាព
ថ្នាំ Triamcinolone អាចមានអន្តរកម្មជាមួយសុខភាពយើង នាំឲ្យស្ថានភាពសុខភាពកាន់តែដុនដាប ឬអាចផ្លាស់ប្ដូរអំពើថ្នាំទៀតផង។ សំខាន់បំផុត ត្រូវប្រាប់វេជ្ជបណ្ឌិត និងឱសថការីបានដឹងពីស្ថានភាពសុខភាពយើងបច្ចុប្បន្ន ពិសេសបើយើងមានបញ្ហាសុខភាពដូចជា៖
– Cushing‘s syndrome (ជំងឺក្រពេញលើតម្រងនោម Adrenal)
– ទឹកនោមផ្អែម
– លើសជាតិស្ករក្នុងឈាម
– លើសសម្ពាធឈាមក្នុងខួរក្បាល (ត្រូវប្រុងប្រយ័ត្ន ព្រោះអាចកាន់តែធ្ងន់ធ្ងរបាន)
– ការបង្ករោគលើស្បែកចំកន្លែង ឬជិតកន្លែងលាប
– មានដំបៅធំ របួសស្បែក ឬរលាត់ខ្លាំងនៅកន្លែងដែលលេប (អាចមានផលប៉ះពាល់កាន់តែខ្លាំង)។
ស្វែងយល់ពីកម្រិតថ្នាំ
ព័ត៌មានទាំងនេះ មិនបានរាប់ជាការណែនាំរបស់គ្រូពេទ្យនោះទេ។ ត្រូវតែពិភាក្សាជាមួយគ្រូពេទ្យ ឬឱសថការី មុនពេលចាប់ផ្តើមប្រើប្រាស់ថ្នាំប្រភេទនេះ។
១០- មនុស្សពេញវ័យត្រូវប្រើកម្រិតណា?
ប្រើព្យាបាលមនុស្សពេញវ័យមានជំងឺ Adrenocortical Insufficiency
– ចាប់ពី ៤-១២ មិល្លីក្រាម លេបរាល់ថ្ងៃ រួមជាមួយការព្យាបាលដោយ Mineralocorticoid។
ប្រើព្យាបាលមនុស្សពេញវ័យមានជំងឺ Ankylosing Spondylitis
– កម្រិតដំបូង៖ ៨-១៦ មិល្លីក្រាម លេបរាល់ថ្ងៃ និង ៣-៤៨ មិល្លីក្រាម ចាក់តាមសាច់ ដុំរៀងរាល់ ១២ ម៉ោង។
– ចាក់ចូលសន្លាក់ និងថង់ទឹកសន្លាក់៖ ៥-៤០ មិល្លីក្រាម អាស្រ័យតាមទំហំសន្លាក់ ហើយសម្រាប់ជង្គង់ ជាទូទៅចាក់ ២៥ មិលី្លក្រាម។
កម្រិតអតិបរិមាប្រើមួយសប្តាហ៍ត្រឹមតែ ៧៥ មិលី្លក្រាម។
ប្រើព្យាបាលមនុស្សពេញវ័យមានជំងឺ Bursitis
– កម្រិតដំបូង៖ ៨-១៦ មិល្លីក្រាម លេបរាល់ថ្ងៃ និង ៣-៤៨ មិល្លីក្រាម ចាក់តាមសាច់ដុំ រៀងរាល់ ១២ ម៉ោង។
– ចាក់ចូលសន្លាក់ និងថង់ទឹកសន្លាក់៖ ៥-៤០ មិល្លីក្រាម អាស្រ័យតាមទំហំសន្លាក់ ហើយសម្រាប់ជង្គង់ ជាទូទៅចាក់ ២៥ មិលី្លក្រាម។
កម្រិតអតិបរិមាប្រើមួយសប្តាហ៍ត្រឹមតែ ៧៥ មិលី្លក្រាម។
ប្រើព្យាបាលមនុស្សពេញវ័យមានជំងឺរលាកសន្លាក់ឆ្អឹង (Osteoarthritis)
– កម្រិតដំបូង៖ ៨-១៦ មិល្លីក្រាម លេបរាល់ថ្ងៃ និង ៣-៤៨ មិល្លីក្រាម ចាក់តាមសាច់ដុំ រៀងរាល់ ១២ ម៉ោង។
– ចាក់ចូលសន្លាក់ និងថង់ទឹកសន្លាក់៖ ៥-៤០ មិល្លីក្រាម អាស្រ័យតាមទំហំសន្លាក់ ហើយសម្រាប់ជង្គង់ ជាទូទៅចាក់ ២៥ មិលី្លក្រាម។
កម្រិតអតិបរិមាប្រើមួយសប្តាហ៍ត្រឹមតែ ៧៥ មិលី្លក្រាម។
ប្រើព្យាបាលមនុស្សពេញវ័យមានជំងឺរលាកសន្លាក់ (Rheumatoid Arthritis)
– កម្រិតដំបូង៖ ៨-១៦ មិល្លីក្រាម លេបរាល់ថ្ងៃ និង ៣-៤៨ មិល្លីក្រាម ចាក់តាមសាច់ដុំ រៀងរាល់ ១២ ម៉ោង។
– ចាក់ចូលសន្លាក់ និងថង់ទឹកសន្លាក់៖ ៥-៤០ មិល្លីក្រាម អាស្រ័យតាមទំហំសន្លាក់ ហើយសម្រាប់ជង្គង់ ជាទូទៅចាក់ ២៥ មិល្លីក្រាម។
កម្រិតអតិបរិមាប្រើមួយសប្តាហ៍ត្រឹមតែ ៧៥ មិល្លីក្រាម។
១១- កូនក្មេងត្រូវប្រើកម្រិតណា?
ថ្នាំនេះមិនទាន់មានកម្រិតប្រើប្រាស់ សម្រាប់កូនក្មេងនៅឡើយទេ។ ថ្នាំនេះអាចមិនមានសុវត្ថិភាពសម្រាប់ក្មេង។ ដូចនេះត្រូវដឹងឲ្យបានច្បាស់អំពី សុវត្ថិភាពរបស់ថ្នាំមុនពេលប្រើប្រាស់។ ដើម្បីដឹងពត៌មានបន្ថែម អាចពិភាក្សាជាមួយគ្រូពេទ្យបាន។
១២- ថ្នាំនេះមានទម្រង់បែបណាខ្លះ?
Triamcinolone អាចប្រើបានតាមទម្រង់ និងកម្រិតដូចជា ទម្រង់ចាក់ ៤០ មិល្លីក្រាម/មិល្លីលីត្រ។
១៣- ករណីបន្ទាន់ ឬប្រើថ្នាំលើសកម្រិត
សូមទូរស័ព្ទទៅផ្នែកសង្គ្រោះបន្ទាន់ ១១៩ ឬប្រញាប់ទៅមន្ទីរពេទ្យនៅជិតបំផុត។
១៤- ករណីភ្លេចប្រើថ្នាំ
បើភ្លេចប្រើថ្នាំ សូមប្រើភ្លាម ប៉ុន្តែបើកៀកពេលត្រូវប្រើថ្នាំបន្ទាប់ ត្រូវរំលងថ្នាំភ្លេចនោះ ប្រើថ្នាំតាមពេលត្រូវលេបបន្តបានហើយ កុំលេបថ្នាំពីរកម្រិតក្នុងពេលតែមួយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នកជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យថ្ងៃទី ខែធ្នូ 3, 2018 | កែសម្រួលចុងក្រោយ ខែធ្នូ 19, 2019
