ឧបសគ្គមួយក្នុងចំណោមឧបសគ្គច្រើនទៀតរបស់ម៉ាក់ប៉ា គឺភ័យខ្លាចចិញ្ចឹមកូនមិនបានល្អ។ ឪពុកម្ដាយស្ទើរគ្រប់រូបបារម្ភខ្លាចកូនលូតលាស់ធំទៅដើរផ្លូវខុស ពិសេសមិនទទួលបានការអប់រំល្អ។ល។ ហេតុនេះហើយ មានម៉ាក់ប៉ាមួយចំនួននិយមដាក់កូនឲ្យចូលសាលារៀនតាំងពីអាអូនមិនទាន់គ្រប់អាយុ។
មកដឹងពីសារៈសំខាន់នៃអប់រំកូន តាមដំណាក់កាលលូតលាស់ធម្មជាតិរបស់ក្មេងៗ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
“តាមពិត ការដែលឲ្យក្មេងអាយុមិនទាន់គ្រប់៦ឆ្នាំ ពិសេសអូនៗអាយុ ៤ឆ្នាំត្រូវម៉ាក់ប៉ាបង្ខំឲ្យរៀនមុនអាយុ ជារឿងមួយគួរឲ្យអាណិតណាស់។ រៀនមុនអាយុនេះ សំដៅលើការរៀនដែលផ្ដោតទៅលើលេខអក្សរ ឬacademy និង ការឲ្យក្មេងខំសរសេរអក្សរ ប្រឹងទន្ទេញចាំជាដើម។” នេះបើតាមការឲ្យដឹងពី លោកស្រីវេជ្ជបណ្ឌិត កុសល កណិការ ឯកទេសជំងឺកុមារ។
និយាយជុំវិញបញ្ហា លោកស្រីបន្តបកស្រាយឲ្យដឹងថា នៅវ័យក្រោម៦ឆ្នាំ ខួរក្បាលកុមារនឹងអាចចាប់បានរាល់អ្វីដែលគេត្រូវបានបង្រៀនមិនថាអក្សរ ឬគណិតវិទ្យា។ ម៉ាក់ប៉ាអាចនឹងរីករាយនៅពេលឃើញកូនរៀនឆាប់ចាប់បាន ក៏ប៉ុន្តែគេក៏ឆាប់ភ្លេចទៅវិញដែរ។ មូលហេតុដែលក្មេងអាយុ៦ឆ្នាំរៀនថ្នាក់ទី១ ព្រោះខួរក្បាលរបស់គេលូតលាស់ពេញលក្ខណៈ ដើម្បីទទួលយកការសិក្សាកម្រិតថ្នាក់ទី១នេះ។
វេជ្ជបណ្ឌិតទទួលសញ្ញាប័ត្រពីប្រទេសបារាំងរូបនេះថា ពេលដែលកុមាររៀននៅកម្រិតត្រឹមត្រូវទៅតាមការលូតលាស់ពីធម្មជាតិ នោះកូនៗ នឹងអាចរៀនសូត្រដោយមិនមានសម្ពាធ និងរៀនសូត្រដោយភាពរីករាយ។ អ្វីដែលសំខាន់ ពេលដែលកូនចំណាយពេលច្រើនទៅលើការរៀន នោះពេលវេលានៃការលេងរបស់កូននឹងត្រូវកាត់បន្ថយ។ ការលេងរបស់ក្មេងៗ មិនមែនគ្រាន់តែជាការបំបាត់អផ្សុកទេ ការលេងតែម្នាក់ឯង និងការលេងជាមួយមិត្តភ័ក្ដិសុទ្ធតែសំខាន់សម្រាប់ការលូតលាស់របស់កូន ដែលអនុញ្ញាតឲ្យកុមារស្គាល់ខ្លួនឯង មានគំនិតច្នៃប្រឌិត មានភាពឆ្លាតវៃ និងមានភាពជាអ្នកដឹកនាំ។
បើម៉ាក់ប៉ាគ្រប់រូបបង្ខំឲ្យអាអូនចូលរៀនលឿនពេក ឬផ្ដោតតែលើការសិក្សាខ្លាំងពេកនោះកូនអាចគ្មានគំនិតច្នៃប្រឌិតខ្លាំង ខ្វល់តែពីខំរៀនបានពិន្ទុពេញៗ (ធ្វើលំហាត់ ឬប្រឡង ត្រូវតែបានពិន្ទុខ្ពស់លើគេ) ងាយនឹងទទួលផលប៉ះពាល់ពីការបរាជ័យ។ល។ ដូចនេះហើយ មុននឹងសម្រេចដាក់កូនចូលរៀន ម៉ាក់ប៉ាគួរតែជ្រើសរើសសាលាណាមានកម្មវិធីសិក្សា និងគ្រូបង្រៀនដែលយល់ពីការលូតលាស់នៃខួរក្បាលរបស់កុមារ។ ការបង្រៀនតាមរយៈការលេង និងសកម្មភាពផ្សេងៗ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម