យើងដឹងស្រាប់ហើយថា អាអូនតូចៗឧស្សាហ៍ក្ដៅខ្លួនណាស់ ព្រោះអាអូនងាយនឹងឆ្លងមេរោគបណ្ដាលឲ្យកើតជំងឺផ្សេងៗច្រើន។ មានវិធីសាមញ្ញមួយដែលម៉ាក់ប៉ានិយមប្រើពេលកូនៗក្ដៅខ្លួន គឺយកកន្សែងសើមមកជូតខ្លួន ឬរុំខ្លួនឲ្យកូន ដើម្បីជួយឲ្យកម្ដៅខ្លួនអាអូនចុះ។
ងូតទឹក និងស្អំកន្សែងសើមលើកូនពេលក្ដៅខ្លួនមិនអាចឲ្យទឹកចូលសួតទេ តែមកពីបញ្ហានេះវិញ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ទាក់ទងនឹងបញ្ហានេះ លោកស្រីវេជ្ជបណ្ឌិត កុសល កណិការ ឯកទេសរោគកុមារ សញ្ញាប័ត្រពីប្រទេសបារាំងពន្យល់ឲ្យដឹងថា នៅពេលអាអូនឈឺហើយមានអាការៈក្ដៅខ្លួនខ្លាំង ការដណ្ដប់កន្សែងសើម និងការងូតទឹកក្ដៅឧណ្ហៗ គឺជាមធ្យោបាយមួយដែលជួយបញ្ចុះកម្ដៅកូនបន្ទាប់ពីបានប្រើថ្នាំបញ្ចុះកម្ដៅរួចហើយ។
តើការរុំកន្សែងសើមនេះយូរ អាចធ្វើឲ្យទឹកចូលសួតអាអូនអត់?
បើម៉ាក់ប៉ាបារម្ភពីបញ្ហាទឹកចូលសួតអាអូនដោយសារការរុំកន្សែងនេះ មិនបាច់ព្រួយទេ។ លោកស្រីបន្តថា ការដែលរុំកន្សែងសើមឲ្យកូនពេលក្ដៅខ្លួនមិនមានអ្វីប៉ះពាល់ដល់កូនទេ ព្រោះជាតិទឹកមិនអាចជ្រាបចូលទៅក្នុងស្រោមសួត តាមរយៈរន្ធញើសដូចដែលម៉ាក់ប៉ាធ្លាប់បានគិតនោះទេ។ ចំណែកឯករណីទឹកចូលសួតអាអូននោះ អាចកើតឡើងបណ្ដាលមកពីមូលហេតុច្រើន ដែលក្នុងនោះរួមមាន ជំងឺរលាកសួតធ្ងន់ធ្ងរ និងការព្យួរសេរ៉ូមច្រើនជ្រុលលើសពីតម្រូវការរាងកាយរបស់អាអូនជាដើម។
វេជ្ជបណ្ឌិតជំងឺកុមាររូបនេះ បញ្ជាក់ថា យកល្អ ពេលអាអូនក្ដៅខ្លួន ម៉ាក់ប៉ាត្រូវរកមូលហេតុបង្កឲ្យបានច្បាស់លាស់ ព្រោះជូនកាលវាជាបញ្ហាធម្មតា តែវាក៏អាចជារោគសញ្ញារបស់ជំងឺមួយចំនួនដែរ។ ក្នុងករណីដែលអាអូនក្ដៅខ្លួនធម្មតា ម៉ាក់ប៉ាអាចដោះស្រាយដោយ៖
១.ស្លៀកពាក់ស្ដើងៗឲ្យកូន និងកុំឲ្យកូនឃ្លុំភួយក្រាស់ៗ
២.ឲ្យកូនញ៉ាំទឹកឲ្យបានច្រើន
៣.ផ្ដល់ថ្នាំត្រឹមត្រូវដល់កូន។
បើសិនផ្ដល់ថ្នាំផង ជូតខ្លួនផង កម្ដៅខ្លួនអាអូននៅតែមិនចុះ យកល្អ ម៉ាក់ប៉ាគួរនាំកូនទៅពិនិត្យនៅមន្ទីរពេទ្យភ្លាម កុំទុកយូរ ដើម្បីចៀសវាងអាអូនក្ដៅខ្លួនខ្លាំងរហូតអាចប្រកាច់ គ្រោះថ្នាក់ធ្ងន់បាន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម