ទារកមួយចំនួនពេលកើតមកជួបបញ្ហាភ្នែកសើម ស្អិត ហើយមានលាយឡំជាមួយនឹងអាចម៍ភ្នែកទៀត។ តើនេះបណ្តាលមកពីមូលហេតុអី? ធ្វើម៉េចបានបាត់?
នេះជាមូលហេតុធ្វើឲ្យភ្នែកទារកសើមស្អិត មានលាយអាចម៍ភ្នែក
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ការដែលទារកទើបនឹងកើតជួបបញ្ហាភ្នែកសើមស្អិត ជួនកាលមានពណ៌សលាយលឿង ឬក្រហមនេះ បណ្តាលមកពីមូលហេតុសំខាន់ៗ៣យ៉ាងធំៗ ទី១ ម្តាយមានបង្ករោគនៅទ្វារមាស មានជំងឺកាមរោគ ដូចជាស្វាយ ប្រមេះ និងជំងឺកាមរោគដទៃទៀតពេលពពោះ ទី២ ម្តាយបន្តក់ទឹកដោះម្តាយក្នុងភ្នែកកូន និងទី៣ កូនមានជំងឺស្ទះបំពង់ទឹកភ្នែក។ នេះបើតាមការបញ្ជាក់របស់លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ។
១- ម្តាយមានការបង្ករោគនៅទ្វារមាស
ចំពោះស្ត្រីមានផ្ទៃពោះដែលមានការបង្ករោគនៅទ្វារមាសរ៉ាំរ៉ៃ ទៅជាធ្លាក់សច្រើនមានក្លិនមានពណ៌រមាស់ ដោយមិនបានជួបគ្រូពេទ្យដើម្បីព្យាបាល ឬក៏មានជំងឺកាមរោគផ្សេងៗ ពិសេសជំងឺប្រមេះ នោះធ្វើឲ្យមេរោគនោះឆ្លងទៅកូន បណ្តាលឲ្យរលាកភ្នែក ទៅជាសើម ហើមស្អិត។ ចំពោះកូនដែលកើតមានបញ្ហានេះ ត្រូវនាំទៅជួបគ្រូពេទ្យដើម្បីទទួលបានការព្យាបាលត្រឹមត្រូវ។
២- ម្តាយបន្តក់ទឹកដោះដាក់ភ្នែកកូន
ម្តាយមួយចំនួននៅធ្វើតាមទម្លាប់ចាស់បុរាណនៅឡើយ ដោយពេលកូនឈឺភ្នែកតិចតួច តែងតែបន្តក់ទឹកដោះម្តាយដាក់ភ្នែកកូន ព្រោះគិតថា ទឹកដោះម្តាយមានជាតិថ្នាំអាចព្យាបាលជំងឺក្មេងបាន។ ការ ធ្វើបែបនេះភ្នែកដែលឆ្លងរោគស្រាប់កាន់តែរាលដាលធ្ងន់ធ្ងរឡើង និងអាចឈានទៅដល់ពិការភ្នែកក៏មាន។
អត្ថបទពាក់ព័ន្ធ៖
៣- កូនមានជំងឺស្ទះរន្ធទឹកភ្នែក
ទារកដែលមានជំងឺស្ទះបំពង់ទឹកភ្នែក ក៏មានចេញជាសញ្ញាសើម ស្អិតភ្នែកដូចគ្នា។ ទារកខ្លះអាចកើតមានជំងឺបែបនេះនៅភ្នែកមួយចំហៀង ឬទាំងសងខាង ហើយរោគសញ្ញាមានដូចជា ទឹកភ្នែកហូរស្អិត ពព្រៀកអាចម៍ភ្នែកបើកពុំរួច ឬហូរទឹកភ្នែកជាប់រហូត។ ចំពោះការព្យាបាល ប្រសិនបើម៉ាក់ៗឧស្សាហ៍ កូននឹងអាចជាវិញក្នុងរយៈពេល ១ ខែ ក្រោយម៉ាស្សា ដោយយកចង្អុលកូនដៃមកឈ្លីនៅតាមគល់ភ្នែក ហើយអូសចុះមកក្រោមតាមបំពង់បង្ហូរទឹកភ្នែក និងការប្រើថ្នាំដាក់ភ្នែក ឬសេរ៉ូមប្រៃ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម