ស្បែកកូនតូចមានបញ្ហា ម៉ាក់ប៉ាគួរ និងមិនគួរធ្វើ ៣ យ៉ាងនេះ
ស្បែកកូនតូចមានបញ្ហា ម៉ាក់ប៉ាគួរធ្វើតាមការណែនាំប៉ុន្មានយ៉ាងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ស្បែកទារកទើបកើតនៅខ្ចី ងាយនឹងមានប្រតិកម្មផ្សេងៗដូចជារលាក រោល កន្ទួល រមាស់ ឬក្រហម។ ដូចនេះពេលស្បែកកូនមានបញ្ហាណាមួយ ម៉ាក់ប៉ាគួរ និងមិនគួរធ្វើរឿងទាំងនេះឡើយ ព្រោះអាចនាំឲ្យមានបញ្ហាកាន់តែខ្លាំង។ នេះបើតាមការឲ្យដឹងពីវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ។
១- កុំចេះតែលាបអ្វីផ្ដេសផ្ដាសតាមគ្នា
ប្រាកដណាស់ថាមានម៉ាក់ប៉ាមួយចំនួន គ្រាន់តែឃើញសភាពស្បែកកូនខុសប្រក្រតីច្បាស់ជាភ័យព្រួយដើរសួរគេឯងគ្រប់គ្នា។ តែសុខភាពស្បែកមនុស្សម្នាក់ៗមិនដូចគ្នាទេ មិនថាចាស់ ក្មេង ឬកូនង៉ែតឡើយ ហើយបញ្ហាក៏ខុសគ្នាដែរ។ ដូចនេះត្រូវពិគ្រោះជាមួយគ្រូពេទ្យ ដើម្បីស្វែងរកពីមូលហេតុពិតប្រាកដដែលនាំឲ្យស្បែកកូនមានបញ្ហា នេះទើបជាជម្រើសល្អ។ ម្យ៉ាងវិញទៀតផលិតផលខ្លះដែលអ្នកមិនជំនាញណែនាំ អាចធ្វើឲ្យស្បែកកូនកាន់តែគ្រោះថ្នាក់ ព្រោះផលិតផលខ្លះប្រើសម្រាប់មនុស្សពេញវ័យ ហើយស្បែកក្មេងខ្ចីអាចនឹងប្រតិកម្មលើសដើម។
២- ពិនិត្យមើលរបស់ប្រើប្រាស់ និងបរិស្ថានជុំវិញខ្លួន
ត្រូវដឹងថា សម្លៀកបំពាក់ទាំងរបស់យើង និងរបស់កូន ភួយខ្នើយ កន្សែង និងក៏ជាមូលហេតុធ្វើឲ្យស្បែកកូនមានបញ្ហាដែរ ព្រោះរបស់អស់នោះសុទ្ធតែប៉ះពាល់ផ្ទាល់ជាមួយកូនទាំងអស់។ ចំណែកបរិស្ថានជុំវិញខ្លួនយើងវិញ ប្រសិនបើមានធូលី ឬផ្សែងពុលហោះចេញចូលប៉ះពាល់ នឹងត្រូវរកវិធីដោះស្រាយភ្លាមៗ ព្រោះបើព្យាបាលក៏ជាបានតែមួយភ្លែតដែរ ហើយវានឹងកើតឡើងដដែលៗរហូត។
៣- ពិនិត្យមើលទឹកដោះគោ
បញ្ហាអាលែកហ្ស៊ីទឹកដោះគោ ក៏ធ្វើឲ្យក្មេងមានលេចស្នាមក្រហមនៅលើស្បែកផងដែរ។ ដូចនេះបើប្រាកដថាបើសម្ភារៈ កន្លែងរស់នៅ និងបរិស្ថានស្អាតហើយ ស្បែកកូននៅតែមានបញ្ហាទៀត អាចមកពីទឹកដោះគោ ម៉ាក់ប៉ាត្រូវប្រញាប់ទៅពិគ្រោះជាមួយគ្រូពេទ្យពីការដូរម៉ាកទឹកដោះគោ ឬស្វែងរកម្សៅទឹកដោះគោណាដែលត្រូវជាមួយកូនយើង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម