ម៉ាក់ៗដែលធ្លាប់មានអាអូនទំនងជាដឹងច្រើនហើយពីរបៀបរៀបចំម្សៅទឹកដោះគោឲ្យអូនៗបៅ បើយើងមិនមែនជាអ្នកបំបៅកូនដោយទឹកដោះ។ យ៉ាង សម្រាប់ម៉ាក់ៗថ្មីថ្មោង ឬទើបមានផ្ទៃពោះ គួរស្វែងយល់បន្តិចទៅ បើយើងមានចេតនាចង់ឲ្យកូនបៅម្សៅទឹកដោះគោ បន្ទាប់ពីបានបំបៅដោះកូនមួយរយៈ។ ខាងក្រោមនេះជាជំហ៊ានមួយចំនួនដែលយើងគួរដឹង ដើម្បីរៀបចំទឹកដោះគោឲ្យអូនៗបៅដោយសុវត្ថិភាព និងត្រឹមត្រូវ។
ម៉ាក់ៗ ឆុងម្សៅទឹកដោះគោឲ្យកូនត្រឹមត្រូវ សុវត្ថិភាព ធ្វើម៉េចខ្លះ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. ពិនិត្យសុពលភាពប្រើប្រាស់
ដំបូងឡើងម៉ាក់ៗត្រូវពិនិត្យមើលឲ្យបានច្បាស់ថាម្សៅទឹកដោះគោដែលយើងបម្រុងនឹងឲ្យកូនបៅ ស្ថិតក្នុងសុពលភាពប្រើប្រាស់ឬយ៉ាងណា។ ម៉ាក់ៗត្រូវចៀសវាងដាច់ខាតយកម្សៅទឹកដោះគោហួសកាលកំណត់ប្រើប្រើប្រាស់ឲ្យអូនៗបៅ។
២. លាងសម្អាតដៃ
ជំហ៊ានបន្ទាប់ មុននឹងចាប់កាន់ម្សៅទឹកដោះគោ ឬកំប៉ុងទឹកដោះគោកូន ប៉ាម៉ាក់ត្រូវប្រាដកថាបានលាងសម្អាតដៃជាមួយសាប៊ូនឹងទឹកស្អាត ព្រមទាំងបានសម្ងួតដៃឲ្យបានស្អាតល្អផង។ ចៀសវាងដៃកខ្វក់អាចមានមេរោគតោងជាប់ ធ្វើឲ្យកូនមានបញ្ហាផ្សេងៗពេលបៅ។
៣. រៀបចំកំប៉ុងទឹកដោះគោ
កំប៉ុងទឹកដោះគោកូនត្រូវតែស្អាត និងមានអនាម័យជានិច្ច។ សម្រាប់កំប៉ុងទើបប្រើប្រាស់លើកទីមួយ ម៉ាក់ៗត្រូវសម្លាប់មេរោគជាមុន ដោយអាចស្ងោរក្នុងទឹកដាំពុះប្រហែល៥នាទី។ បន្ទាប់ពីបានប្រើម្ដងហើយ ប៉ាម៉ាក់មិនបាច់ស្ងោរទៀតទេ ដោយគ្រាន់ដុសលាងសម្អាតកំប៉ុងទឹកដោះគោជាមួយសាប៊ូ និងទឹកស្អាត រួចទុកវាឲ្យស្ងួត។ ត្រូវចាំថាមិនត្រឹមតែកំប៉ុងទឹកដោះគោត្រូវតែស្អាត និងមានអនាម័យនោះទេ កន្លែងដែលយើងបម្រុងនឹងដាក់កំប៉ុងទឹកដោះគោឆុងឲ្យកូន ក៏ត្រូវតែស្អាត និងមានអនាម័យដូចគ្នា។
៤. ដាក់ម្សៅទឹកដោះគោតាមកម្រិតណែនាំ
ប៉ាម៉ាក់ ត្រូវរៀបចំម្សៅទឹកដោះគោសម្រាប់កូនបៅម្ដងៗទៅតាមការណែនាំនៅលើសម្បកកំប៉ុង។ ការដាក់ម្សៅទឹកដោះគោតិចពេក ឬច្រើនពេក អាចធ្វើឲ្យកូនយើងឆ្អែតជ្រុល ឬបៅមិនអស់ ឬក៏កូនបៅមិនគ្រប់ទៅវិញ។ មួយវិញទៀត ត្រូវដាក់បរិមាណទឹកស្អាត ឬទឹកដាំពុះ ទៅតាមការណែនាំដូចគ្នា។ ការដាក់ទឹកច្រើនពេកអាចធ្វើឲ្យម្សៅទឹកដោះគោបាត់បង់សារធាតុចិញ្ចឹម ឬមានសារធាតុចិញ្ចឹមមិនគ្រប់ទៅតាមតម្រូវការរបស់កូន ហើយបើដាក់ទឹកតិចពេកអាចធ្វើឲ្យប្រព័ន្ធរំលាយអាហាររបស់កូនយើងត្រូវធ្វើការខ្លាំងជាងធម្មតា នាំឲ្យកូនយើងខ្វះជាតិទឹកក្នុងខ្លួនទៅវិញ។
ចំណុចគួរចងចាំ៖ ម៉ាក់ៗត្រូវដាក់ទឹកទៅតាមការណែនាំចូលក្នុងកំប៉ុងទឹកដោះគោជាមុន រួចចាំដាក់ម្សៅទឹកដោះគោតាមបរិមាណកំណត់តាមក្រោយ។ ក្រោយពីដាក់ម្សៅទឹកដោះគោចូលក្នុងកំប៉ុងហើយ យើងត្រូវដាក់ក្បាលដោះ និងគ្របគម្របឲ្យបានល្អ រួចក្រឡុកតិចៗឲ្យម្សៅរលាយសព្វបានល្អ មុននឹងឲ្យកូនបៅ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម