ការលូតលាស់ និងអាកប្បកិរិយា
១- កូនចេះអីខ្លះ?
ខែទី ៣៥៖ អារម្មណ៍ច្របូកច្របល់ អាចឲ្យកូននិយាយកុហក
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
កុំចម្លែកអីបើឃើញកូនតាមប៉ាម៉ាក់របស់មិត្តភក្ត្រគេច្រើនជាងយើង ឬក៏ចង់ឲ្យតែប៉ាៗ និទានរឿងមុនចូលគេង មិនចង់ឲ្យម៉ាក់ជំនួស ទាំងនេះអាចបង្កមកពីទម្លាប់។ បើម៉ាក់ទម្លាប់ជូនអូនទៅសាលា នោះបើថ្ងៃណាប៉ាអ្នកជូនម្តង អូននឹងរករឿងហើយ។ អ្នកជួបរឿងនេះច្រើនជាងគេគឺប៉ាម៉ាក់ដែលធ្វើដំណើរឆ្ងាយពីអាអូនមួយរយៈ ពេលមកវិញប្រាកដជាប្លែកភ្នែកហើយ។ នោះជាវិធីដែលកូននិយាយថា “អូននឹកប៉ាម៉ាក់ខ្លាំងណាស់ តែអូនអត់ចូលចិត្តហ្អេ៎។ អូនធ្វើអ៊ីចឹង គឺខ្លាចប៉ាម៉ាក់ទៅចោលអូនទៀត’។
សម្រាប់ក្មេងអាយុនេះគេពុំទាន់ចែកច្បាស់រវាងការពិត និងការស្រមៃនៅឡើយទេ។ អារម្មណ៍ច្របូកច្របល់ទាំងនេះហើយជាមូលហេតុធ្វើឲ្យគេចូលចិត្តនិយាយកុហក តែមិនមែនមានន័យថាគេចង់បោកប៉ាម៉ាក់ទេ។
២- ជួយកូនបែបណា?
ពេលខ្លះធុញដែលត្រូវអង្គុយលេងបាយឡុកបាយឡជាមួយកូន អាចសាកទុកពេលឲ្យគេលេងម្នាក់ឯងម្តងមើល៍។ វាជួយបង្កើនឯកវាជ្យភាពឲ្យកូន ហើយយើងក៏គួររកវិធីណាមួយដែលអាចធ្វើជាមួយគ្នា កុំឲ្យខាតពេលដូចជា ធ្វើម្ហូបជុំគ្នា ថែរសួនច្បារ ដើរលេងក្រៅផ្ទះ -ល-។
ចូរទម្លាប់ឲ្យកូនធ្វើការងារតាម ជាជាងថាឲ្យកូនខ្លាំងៗធ្វើឲ្យគេខ្លាច គួរនិយាយការពិតជាមួយកូន និងកុំឲ្យគេកុហក។ ឧទាហរណ៍ បើកូនប្រកែកថាមិនបានគូរលើជញ្ជាំងទេ (តែតាមពិតគេគូរ) គួរសម្អាតចេញ ហើយពន្យល់កូនថាយើងគួរគូររូបនៅក្នុងសៀវភៅទើបល្អ។ វិធីសាស្ត្រល្អមួយទៀត រករឿងព្រេងនិទានណាស្រដៀងនេះ មកនិទានឲ្យកូនស្ដាប់ ដើម្បីឲ្យគេដឹងខ្លួនថាធ្វើខុស។
នៅអាយុ ២-៣ឆ្នាំ ក្មេងភាគច្រើនចេះជិះកង់ដែលមានកង់សាគួរស្ទាត់ហើយ។ វាទាមទារកម្លាំងជើងគេខ្លាំងណាស់ដើម្បីធាក់កង់ ចូរចាប់ផ្តើមពីកង់ដែលមានកែបទាបដើម្បីកូនមានអារម្មណ៍ថាសុវត្ថិភាព ហើយងាយចេះធាក់។ បន្ទាប់មកយើងអាចលើកកែបខ្ពស់បន្តិចម្តងៗ។ នៅអាយុនេះកូនមិនចាំបាច់ចេះជិះកង់ដែលគ្មានកង់សាគួរនោះទេ ក្មេងខ្លះអាចចេះនៅអាយុនេះបាន តែជាទូទៅទាល់តែអាយុ ៤ ឆ្នាំ។
សុខភាព និងសុវត្ថិភាព
៣- ពិភាក្សាជាមួយពេទ្យរឿងអីខ្លះ?
ក្មេងលេងច្រើនអ៊ីចឹង ចៀសមិនផុតពីការឆ្លងជាមួយបាក់តេរី មេរោគផ្សេងៗនោះទេដែលងាយបង្កជំងឺ ដូចជា ឈឺពោះ ក្អក ឡើងកន្ទួលស្បែក ក្អួត និងក្តៅខ្លួន។ ម៉ាក់ប៉ាអាចស្គាល់សញ្ញាជំងឺទាំងនេះហើយតែមានតែគ្រូពេទ្យទេដែលអាចធ្វើរោគវិនិច្ឆ័យច្បាស់លាស់និងព្យាបាលបានត្រឹមត្រូវ។
៤- ត្រូវដឹងពីអីខ្លះ?
ត្រូវចាក់វ៉ាក់សាំងកូនឲ្យបានគ្រប់គ្រាន់ ឬរើសមុខ(វ៉ាក់សាំង) សំខាន់ៗ។ បើដល់រដូវកាលផ្តាសាយហើយ សូមសួរគ្រូពេទ្យថាកូន គួរចាក់វ៉ាក់សាំងផ្តាសាយធំឬទេ។ ជាទូទៅរដូវផ្តាសាយនេះចាប់ផ្តើមពី ខែតុលា ដល់ខែឧសភា តែវាអាចប្រែប្រួលតាមអាកាសធាតុជាក់ស្តែង។
– ជំងឺផ្តាសាយធំអាចធ្ងន់ធ្ងរជាងផ្តាសាយធម្មតា
– អ្នកមើលថែ និងម៉ាក់ប៉ាក៏គួរចាក់វាក់សាំងនេះដែរ
– ជាទូទៅក្មេងអាយុចាប់ពី ២ឆ្នាំ ទៅអាចចាក់វ៉ាក់សាំងនេះបានហើយ តែក៏មានវ៉ាក់សាំងខ្លះអាចចាក់លើក្មេងអាយុ ៦ខែ ឬលើសពីនេះបាន។ សូមសួរគ្រូពេទ្យពីព័ត៌មានលម្អិត។
– មជ្ឈមណ្ឌលប្រយទ្ធប្រឆាំងនឹងជម្ងឺ របស់សហរដ្ឋអាមេរិក ហៅកាត់ថា CDC បានណែនាំឲ្យក្មេងអាយុចាប់ពី ៦ខែ ឡើងទៅទៅទទួលវ៉ាក់សាំងផ្តាសាយធំរៀងរាល់ឆ្នាំ។
– តាមធម្មតាក្រោយចាក់វ៉ាក់សាំងវាតែងចេញសញ្ញាក្តៅខ្លួន តែនេះជារឿងធម្មតាទេ។ បើសិនជាសញ្ញាមានកាន់តែខ្លាំង សូមទៅជួបគ្រូពេទ្យ។
ការព្រួយបារម្ភ
៥- រឿងអីខ្លះគួរបារម្ភ?
បើកូនរករឿងគេងមិនត្រូវពេលគេង ឬគេងភ្ញាក់ៗធ្វើឲ្យរំខានដំណេកយើង អាចប្រើវិធីខាងក្រោមនេះដើម្បីឲ្យអាអូនគេងលក់ស្រួលវិញបាន៖
– ឲ្យកូនគេងនៅគ្រែធំ សរសើរពេលដែលគេគេងនៅទីនោះបាន
– ស្តាប់សម្ដីកូន ជួនកាលគេចង់ឲ្យម៉ាក់ទៅគេងជាមួយ
– ថើបកូនមុនចូលគេង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម