មន្ទីរពេទ្យ កាល់ម៉ែត បន្តថា ជាទូទៅ ការបង្ករោគគឺចាប់ពីពេលឆ្កែខាំរហូតដល់ពេលចេញរោគសញ្ញា មានការប្រែប្រួលពី ៧ថ្ងៃ រហូតដល់លើសពី១ឆ្នាំ ប៉ុន្តែជាមធ្យមប្រហែលពី ១៥-៦០ថ្ងៃ។ ក្នុងករណីដែលមេរោគឆ្កែឆ្កួតរាលដាលឲ្យរលាកខួរក្បាល និងខួរឆ្អឹងខ្នងហើយនោះ អ្នកជំងឺនឹងចេញរោគសញ្ញាខ្លះៗ ដូចជា នៅមិនចេះស្ងៀម មានចលនារហូត ចេញទឹកមាត់ ញើស ឬចេញនោមអត់ដឹងខ្លួន ប្រកាច់ និងពិបាកលេបចំណីអាហារជាដើម។
ស្របគ្នានេះដែរ បើតាមរបាយការណ៍របស់អង្គការសុខភាពពិភពលោកកាលពីឆ្នាំ២០១៧ ឲ្យដឹងថា នៅលើពិភពលោក ជំងឺឆ្កែឆ្កួត ដែលបណ្ដាលមកពីឆ្កែខាំ ស្លាប់ប្រហែល ៥៩.០០០នាក់/ឆ្នាំ ជាពិសេសនៅក្នុងតំបន់អាស៊ី និងអាហ្រ្វិក។