រលាកអញ្ចាញធ្មេញ កើតឡើងញឹកញាប់ និងមានលក្ខណៈស្រួចស្រាវ បង្កឲ្យមានការរលាកអញ្ចាញ ឡើងក្រហម និងហើមអញ្ចាញ។ វាជាបញ្ហាទូទៅ ច្រើនកើតបានទាំងក្មេង មនុស្សចាស់ ហើយវាក៏មិនប្រកាន់ភេទដែរ។ មួយវិញទៀត បើមិនព្យាបាល ជំងឺរលាកអញ្ចាញធ្មេញ អាចរាលដាលទៅផ្នែកដទៃនៃរាងកាយយើងបានថែមទៀត។
រលាកអញ្ចាញធ្មេញទុកចោលយូរ អាចបង្កជាជំងឺផ្សេងទៀតលើរាងកាយ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
នៅពេលដែលមានការរលាកអញ្ចាញធ្មេញ បណ្ដាលឲ្យមេរោគងាយឆ្លង ចូលទៅតាមសរសៃឈាម និងប៉ះពាល់ដល់សរីរាង្គសំខាន់ៗដូចជា បេះដូង សួត និងបម្រែបម្រួលសរីរាង្គផ្សេងៗ។ នេះបើតាមការផ្សព្វផ្សាយរបស់មន្ទីរពេទ្យ កាល់ម៉ែត។
ជំងឺមួយចំនួនដែលអាចកើតមាន ដោយសាររលាកអញ្ចាញធ្មេញ៖
– ជំងឺបេះដូង
– ជំងឺដាច់សរសៃឈាមខួរក្បាល
– ជំងឺមហារីកមាត់ធ្មេញ
– ជំងឺទឹកនោមផ្អែម
– ជំងឺពុកធ្មេញ ក្លិនមាត់មិនល្អ និងបាត់បង់ធ្មេញ
– ជំងឺពុកឆ្អឹង
– ជំងឺរលាកសន្លាក់
– កូនកើតមិនគ្រប់ខែ ឬមិនគ្រប់គីឡូ (សម្រាប់ស្ត្រីមានផ្ទៃពោះ)។
ចំពោះជំងឺរលាកអញ្ចាញធ្មេញ បង្កដោយមូលហេតុធំចម្បងមួយ គឺពពួកបាក់តេរី មាននៅក្នុងកំណកកំបោរព័ទ្ធជុំវិញធ្មេញ ក្នុងរយៈពេលយូរនាំឲ្យមានការរលាកអញ្ចាញធ្មេញ។ មូលហេតុផ្សេងៗទៀតអាចមកពីការប៉ះទង្គិច ការប៉ះពាល់ផ្ទាល់ជាមួយសារធាតុគីមី ការដាក់ធ្មេញ ឬប៉ះធ្មេញមិនត្រឹមត្រូវតាមបច្ចេកទេសជាដើម។ ហេតុនេះហើយ គ្នាយើងគួរចេះការពារខ្លួនពីបញ្ហារលាកអញ្ចាញធ្មេញដោយ៖
១. ទម្លាប់អនាម័យមាត់ធ្មេញ ជាវិធីល្អបំផុតបង្ការជំងឺនេះហើយចំណុចសំខាន់ទាំង៣ យើងគួរចងចាំ រួមមាន ដុសសម្អាតធ្មេញយ៉ាងតិច ២ដង/ថ្ងៃប្រើអំបោះទាក់ចន្លោះធ្មេញ និងទៅពិនិត្យធ្មេញឲ្យបានទៀងទាត់។
២. ក្រៅពីនេះ ការសម្អាតធ្មេញឲ្យបានស្អាតល្អជាមួយច្រាសដុសធ្មេញ និងប្រើអំបោះទាក់ធ្មេញ ត្រូវចំណាយពេលពី ៣-៥ នាទី។ ការប្រើអំបោះទាក់ចន្លោះធ្មេញមុននឹងដុសសម្អាតធ្មេញ អាចជួយសម្អាតកម្ទេចកំទីចំណីអាហារនៅចន្លោះធ្មេញបានកាន់តែស្អាតល្អ។
៣. គួរតែទៅសម្អាតធ្មេញជាមួយទន្តពេទ្យ រៀងរាល់ ៦-១២ ខែម្ដង ហើយបើឧស្សាហ៍កើតជំងឺរលាកអញ្ចាញធ្មេញ អាចត្រូវសម្អាតធ្មេញជាមួយពេទ្យធ្មេញ ឲ្យបានញឹកញាប់ផង។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម