ផ្លែត្រសក់ផ្អែម (Honeydew Melon) អាចញ៉ាំជាផ្លែស្រស់ ធ្វើជាបង្អែម សាលាដ អាហារសម្រន់ និងស៊ុបបាន។ ផ្លែនេះមានរសជាតិផ្អែម និងមានសារធាតុចិញ្ចឹមច្រើនដែលមានប្រយោជន៍ដល់រាងកាយ។
អត្ថប្រយោជន៍ ៧ យ៉ាងបានពីការញ៉ាំផ្លែត្រសក់ផ្អែម គ្រប់គ្នាមិនគួរមើលរំលង
ត្រួតពិនិត្យដោយ ទូច សុខា
សារធាតុចិញ្ចឹម
ផ្លែត្រសក់ផ្អែមទម្ងន់ ១៧៧ ក្រាមមាន៖
- កាឡូរី៖ ៦៤កាឡូរី
- កាបូអ៊ីដ្រាត៖ ១៦ក្រាម
- ជាតិសរសៃ៖ ១,៤ក្រាម
- ប្រូតេអ៊ីន៖ ១ក្រាម
- ជាតិខ្លាញ់៖ ០ក្រាម
- វីតាមីន C៖ ៥៣% សម្រាប់កម្រិតត្រូវការប្រចាំថ្ងៃ
- វីតាមីន B6៖ ៨% សម្រាប់កម្រិតត្រូវការប្រចាំថ្ងៃ
- Folate៖ ៨% សម្រាប់កម្រិតត្រូវការប្រចាំថ្ងៃ
- វីតាមីន K៖ ៦% សម្រាប់កម្រិតត្រូវការប្រចាំថ្ងៃ
- ប៉ូតាស្យូម៖ ១២% សម្រាប់កម្រិតត្រូវការប្រចាំថ្ងៃ
- ម៉ាញ៉េស្យូម៖ ៤% សម្រាប់កម្រិតត្រូវការប្រចាំថ្ងៃ។
អត្ថបទពាក់ព័ន្ធ៖ អាហារមានជាតិសរសៃ ផ្ដល់គុណប្រយោជន៍ច្រើនដល់សុខភាព
អត្ថប្រយោជន៍របស់ផ្លែត្រសក់ផ្អែម
១. បន្ថយសម្ពាធឈាម
ជាទូទៅ របបអាហារដែលសម្បូរដោយបន្លែ និងផ្លែឈើអាចជួយកាត់បន្ថយហានិភ័យសម្ពាធឈាមខ្ពស់ និងជំងឺបេះដូង។ ជាពិសេសរបបអាហារដែលមានជាតិសូដ្យូមទាប និងការទទួលបានប៉ូតាស្យូមគ្រប់គ្រាន់អាចរក្សាលំនឹងសម្ពាធឈាម។ ផ្លែត្រសក់ផ្អែមគឺជាផ្លែឈើដែលមានសូដ្យូមទាប និងមានប៉ូតាស្យូមច្រើនដែលអាចជួយរក្សាកម្រិតសមា្ពធឈាមបាន។
២. សុខភាពឆ្អឹង
ផ្លែត្រសក់ផ្អែមមានសារធាតុចិញ្ចឹមជាច្រើនសំខាន់ក្នុងការជួសជុលជាលិកាឆ្អឹង និងធ្វើឲ្យឆ្អឹងរឹងមាំ។ សារធាតុចិញ្ចឹមទាំងនោះរួមមាន Folate វីតាមីន K និងម៉ាញ៉េស្យូម។
Folate មានតួនាទីសំខាន់ក្នុងការបំបែកអាស៊ីតអាមីណូ homocysteine ។ នៅពេលកម្រិតអាស៊ីតអាមីណូច្រើនអាចធ្វើឲ្យបាត់បង់សារធាតុរ៉ែដែលមានក្នុងឆ្អឹង។ ទោះបីជាត្រូវការការសិក្សាបន្ថែមទៅលើទំនាក់ទំនងរវាង Folate និងសុខភាពឆ្អឹងក៏ដោយ ការញ៉ាំអាហារមាន Folate ដូចជាផ្លែត្រសក់ផ្អែមអាចជួយដល់សុខភាពឆ្អឹងដោយរក្សាអាស៊ីតអាមីណូ homocysteineឲ្យនៅកម្រិតធម្មតា។
ចំណែកឯវីតាមីន Kគឺមានចំណែកក្នុងការផលិតប្រូតេអ៊ីនសំខាន់ក្នុងឆ្អឹងឈ្មោះ osteocalcin។ ដូចនេះការញ៉ាំវីតាមីន K គ្រប់គ្រាន់គឺមានសារៈសំខាន់សម្រាប់ឆ្អឹង។ បន្ថែមពីនេះទៀត កោសិកាដែលមានតួនាទីបង្កើត និងបំបែកជាលិកាឆ្អឹងត្រូវការម៉ាញ៉េស្យូមដើម្បីដំណើរការត្រឹមត្រូវ។ ហេតុនេះហើយ ម៉ាញ៉េស្យូមគឺជាសារធាតុចិញ្ចឹមសំខាន់មួយទៀតសម្រាប់សុខភាពឆ្អឹង។
ផ្លែត្រសក់ផ្អែមក៏មានផ្ទុកនូវសារធាតុចិញ្ចឹមដែលជួយទ្រទ្រង់ដល់ឆ្អឹងក្នុងកម្រិតទាបដែលមានដូចជា កាល់ស្យូម ផូស្វ័រ និងស័ង្កសី។
៣. រក្សាលំនឹងជាតិស្ករក្នុងឈាម
ការសិក្សាជាច្រើនបានឲ្យដឹងថាអ្នកដែលញ៉ាំផ្លែឈើស្រស់រាល់ថ្ងៃអាចកាត់បន្ថយការកើតជំងឺទឹកនោមផ្អែម១២% បើប្រៀបធៀបទៅនឹងអ្នកដែលមិនសូវញ៉ាំផ្លែឈើ។ ក្នុងចំណោមអ្នកចូលរួមដែលមានជំងឺទឹកនោមផ្អែមស្រាប់ក្នុងពេលចាប់ផ្តើមការសិក្សាបានញ៉ាំផ្លែឈើយ៉ាងតិចបីដងក្នុងមួយសប្តាហ៍រកឃើញថាអាចកាត់បន្ថយហានិភ័យនៃការប្រឈមនឹងផលវិបាកពីជំងឺទឹកនោមផ្អែមពី១៣% ទៅ២៨%។
ទោះបីផ្លែត្រសក់ផ្អែមមានកាបូអ៊ីដ្រាតដែលអាចធ្វើឲ្យជាតិស្ករក្នុងឈាមឡើងជាបណ្ដោះអាសន្នក៏ដោយ ផ្លែនេះក៏មានជាតិសរសៃ និងសារធាតុចិញ្ចឹមផ្សេងទៀតអាចជួយក្នុងការគ្រប់គ្រងកម្រិតជាតិស្ករដែរ។
៤. សុខភាពស្បែក
ញ៉ាំផ្លែត្រសក់ផ្អែមអាចជួយទ្រទ្រង់ដល់សុខភាពស្បែកដោយសារវីតាមីន C ដែលមានក្នុងផ្លែនេះ។ ការញ៉ាំវីតាមីន C ឲ្យបានគ្រប់គ្រាន់អាចជួយដល់ការផលិត collagen ដែលសំខាន់ក្នុងការជួសជុល និងរក្សាជាលិកាស្បែក។ វីតាមីន C ក៏ជាសាធាតុប្រឆាំងអុកស៊ីតកម្មអាចការពារស្បែកខូចខាតពីកម្ដៅថ្ងៃ។
អត្ថបទពាក់ព័ន្ធ៖
- ក្តៅខ្លាំងអ៊ីចឹង បើស្រលាញ់ស្បែក ត្រូវដឹងវីតាមីនសំខាន់ៗទាំងនេះ
- វីតាមីន C លាក់កំពូលអត្ថប្រយោជន៍ អាចជួយស្បែកឲ្យស ភ្លឺរលោង
៥. ពង្រឹងប្រព័ន្ធភាពស៊ាំ
ប្រព័ន្ធភាពស៊ាំរបស់មនុស្សយើងត្រូវការសារធាតុចិញ្ចឹមច្រើនដើម្បីដំណើរការ ហើយវីតាមីន C គឺជាសារធាតុចិញ្ចឹមសំខាន់ដែលប្រព័ន្ធភាពស៊ាំត្រូវការ។ ការស្រាវជ្រាវបានរកឃើញថាការញ៉ាំវីតាមីន C គ្រប់គ្រាន់អាចជួយបង្ការ និងព្យាបាលការឆ្លងមេរោគនៅប្រព័ន្ធផ្លូវដង្ហើម និងប្រព័ន្ធផ្សេងៗទៀតដូចជា ជំងឺរលាកសួត និងជំងឺផ្ដាសាយ។
៦. សម្រួលដល់ការរំលាយអាហារ
ផ្លែត្រសក់ផ្អែមមានផ្ទុកជាតិសរសៃដែលអាចជួយឲ្យសុខភាពប្រព័ន្ធរំលាយអាហារប្រសើរឡើង។ ការញ៉ាំអាហារជាតិសរសៃគ្រប់គ្រាន់អាចពន្យឺតការឆ្លើយតបជាតិស្ករក្នុងឈាម សម្រួលដល់ការបន្ទោរបង់ឲ្យបានទៀងទាត់ និងការលូតលាស់របស់បាក់តេរីល្អក្នុងពោះវៀន។
អត្ថបទពាក់ព័ន្ធ៖ បើមិនចង់ទល់លាមក កុំញ៉ាំអាហារទាំងនេះច្រើនពេក
៧. សុខភាពភ្នែក
ផ្លែត្រសក់ផ្អែមផ្ទុកនូវសារធាតុប្រឆាំងអុកស៊ីតកម្មពីរ គឺ lutein និងzeaxanthin។ សារធាតុទាំងពីរនេះត្រូវបានគេស្គាល់ថាជាសារធាតុជួយទ្រទ្រង់ដល់សុខភាពភ្នែក និងការពារការបាត់បង់គំហើញដោយកត្តាអាយុទៀតផង។
ការស្រាវជ្រាវបានបញ្ជាក់ថា ការញ៉ាំអាហារដែលមានសារធាតុប្រឆាំងអុកស៊ីតកម្មទាំងពីរនេះដូចជាផ្លែត្រសក់ផ្អែម ទឹកក្រូចស្រស់ ផ្លែគីវី និងផ្លែទំពាំងបាយជូរជាដើម អាចជួយរក្សាដល់ដំណើរការរបស់ភ្នែកពេញមួយជីវិត។
អត្ថបទពាក់ព័ន្ធ៖
- ចង់ឲ្យភ្នែកភ្លឺច្បាស់ល្អ សាកល្បងញ៉ាំកំពូលអាហារទាំងនេះ
- ការ៉ុត មានចំណុចល្អ ៨ ដែលយើងអត់ដឹង
- របបអាហារចាំបាច់សម្រាប់យុវវ័យ
- បន្លែ និងផ្លែឈើ ដែលញ៉ាំមិនឡើងគីឡូ ហើយមានប្រយោជន៍ដល់សុខភាពច្រើនទៀត
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
ទូច សុខា
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម