ទារកកើតមិនគ្រប់ខែ អាចបណ្ដាលមកពីទាំងកត្តាដូចជាម្ដាយក្មេងពេក ចាស់ពេក ម៉ាក់ៗមិនប្រយ័ត្ន ឬបែកទឹកភ្លោះមុនពេលសម្រាលជាដើម។ បើទារកកើតមកមិនគ្រប់ខែ អាអូនអាចជួបនឹងបញ្ហាសុខភាពច្រើនជាងទារកធម្មតា ទាមទារការថែទាំពិសេស។
ទារកកើតមិនគ្រប់ខែមានផលប៉ះពាល់ច្រើន ម៉ាក់ៗពពោះមកដឹងវិធីបង្ការ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផលប៉ះពាល់ ពេលទារកកើតមិនគ្រប់ខែ
ជុំវិញបញ្ហានេះ លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រីបានពន្យល់ឲ្យដឹងថា កាលណាទារកកើតមិនគ្រប់ខែ ទារកនឹងប្រឈមបញ្ហាដំណកដង្ហើម ព្រោះសួតមិនទាន់ទុំល្អ តួនាទីសួត ដំណើរការស្រូបអុកស៊ីសែន និងបញ្ចេញឧស្ម័នកាបូនិចមិនល្អ។ លើសពីនេះ ទារកងាយនឹងឆ្លងមេរោគផ្សេងៗ ព្រោះប្រព័ន្ធភាពស៊ាំនៅខ្សោយ ហើយទារកក៏ប្រឈមនឹងបញ្ហាហូរឈាមក្នុងខួរក្បាល ធ្វើឲ្យមានអត្រាស្លាប់ជុំវិញកំណើតខ្ពស់។
វិធីបង្ការទារកកើតមិនគ្រប់ខែ
ដើម្បីការពារសុខភាពកូន ម៉ាក់ៗពពោះគួរតែដឹង និងអនុវត្តតិចនិកថែរក្សាខ្លួនឲ្យបានត្រឹមត្រូវតាមការណែនាំរបស់វេជ្ជបណ្ឌិតឯកទេសសម្ភព និងរោគស្ត្រី ដូចជា៖
- ពិនិត្យសុខភាពតាមការកំណត់អំឡុងពេលពពោះ
- បើអំឡុងពេលពពោះ ម៉ាក់ៗមានជំងឺប្រចាំកាយ ត្រូវតែជួបពិគ្រោះជាមួយគ្រូពេទ្យ
- រកមូលហេតុ និងព្យាបាលជំងឺពាក់ព័ន្ធ រោគស្ត្រីផ្សេងៗ ឲ្យបានជាសះស្បើយ ដែលជាមូលហេតុបង្កឲ្យទារកកើតមិនគ្រប់ខែ
- មានរបបអាហារត្រឹមត្រូវ បរិភោគអាហារសម្បូរជីវជាតិ សម្បូរប្រូតេអ៊ីន បន្លែផ្លែឈើ ញ៉ាំទឹកដោះគោ ១-២កែវ/ថ្ងៃ
- ទទួលជាតិដែកឲ្យបានត្រឹមត្រូវតាមវេជ្ជបញ្ជា
- បញ្ចុះគីឡូបើម្ដាយធាត់ពេក ព្រោះអាចប្រឈមនឹងជំងឺទឹកនោមផ្អែមអំឡុងពេលពពោះ
- សម្រាក និងថែទាំសុខភាពឲ្យបានល្អ ចៀសវាងធ្វើការងារហួសកម្លាំង
លោកវេជ្ជបណ្ឌិតបានណែនាំបន្ថែមថា ក្នុងករណីដែលម៉ាក់ៗមានរោគសញ្ញាសង្ស័យដូចជា ធ្លាក់ឈាម ក្ដៅខ្លួនខ្លាំង ចុកពោះ ម៉ាក់ៗត្រូវទៅពិនិត្យជាមួយគ្រូពេទ្យឲ្យបានឆាប់ ព្រោះវាអាចជាសញ្ញាទារកកើតមិនគ្រប់ខែ មិនអាចបន្លាយយូរឡើយ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម