ជាទូទៅ ស្រីៗភាគច្រើនញ៉ាំពពួកវីតាមីន រ៉ែ បំប៉នសុខភាពខ្លួន និងគភ៌ នៅពេលដឹងថាមានផ្ទៃពោះ។ តាមពិតទៅ នេះជាទម្លាប់ខុសឆ្គង តាមក្បួនពេទ្យ ស្រីៗត្រូវញ៉ាំវីតាមីន ចាប់តាំងពីខ្លួនមានគម្រោងយកកូនម្ល៉េះ មិនមែនទល់តែមានផ្ទៃពោះទើបញ៉ាំនោះទេ។ លោកស្រីវេជ្ជបណ្ឌិត ទី សុវណ្ណរដ្ឋ ឯកទេសសម្ភព និងរោគស្ត្រី នៃមន្ទីរសម្រាកព្យាបាល និងសម្ភព មាតា បានពន្យល់លម្អិតពីហេតុផលសំខាន់ៗ ដែលស្រីៗត្រូវញ៉ាំវីតាមីនមុនពេលមានកូន ថា ការញ៉ាំពពួកវីតាមីនដើម្បីបំពេញចន្លោះប្រហោងនៃពពួកវីតាមីនទទួលបានតាមរយៈចំណីអាហារ។