ចូលខែភ្លៀង សម្បូរមូស ទាំងក្មេងទាំងចាស់ ងាយប្រឈមនឹងជំងឺគ្រុនឈាម ក្នុងស្រ្តីពពោះក៏ត្រូវប្រយ័ត្នដែរ ព្រោះបើកើតជំងឺគ្រុនឈាមពេលនេះ កូនក្នុងផ្ទៃនឹងមានបញ្ហាធ្ងន់ធ្ងរ។
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ចូលខែភ្លៀង សម្បូរមូស ទាំងក្មេងទាំងចាស់ ងាយប្រឈមនឹងជំងឺគ្រុនឈាម ក្នុងស្រ្តីពពោះក៏ត្រូវប្រយ័ត្នដែរ ព្រោះបើកើតជំងឺគ្រុនឈាមពេលនេះ កូនក្នុងផ្ទៃនឹងមានបញ្ហាធ្ងន់ធ្ងរ។
បើតាមការលើកឡើងរបស់លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ ស្ត្រីមានផ្ទៃពោះដែលឆ្លងជំងឺគ្រុនឈាម អាចចម្លងវីរុសនេះទៅទារកក្នុងផ្ទៃក្នុងអំឡុងពេលមានផ្ទៃពោះ ឬពេលសម្រាលកូន។ លោកវេជ្ជបណ្ឌិតបានបន្តថា ម្តាយដែលកើតជំងឺគ្រុនឈាមមិនត្រឹមប៉ះពាល់ដល់សុខភាពខ្លួនឯងប៉ុណ្ណោះទេ កូនក្នុងផ្ទៃក៏រងផលប៉ះពាល់ធ្ងន់ធ្ងរដែរ ដូចជាកូនកើតមកមិនគ្រប់គីឡូ កូនកើតមិនគ្រប់ខែ ករណីធ្ងន់ធ្ងរធ្វើឲ្យទារកក្នុងផ្ទៃស្លាប់។
ចំពោះស្ត្រីពពោះដែលឆ្លងជំងឺគ្រុនឈាម លោកវេជ្ជបណ្ឌិតថា នឹងមានចេញរោគសញ្ញាដូចអ្នកឆ្លងធម្មតា គឺមានក្ដៅខ្លួន ឈឺក្បាល ឈឺសន្លាក់សាច់ដុំ ឈឺក្នុងភ្នែក ឡើងកន្ទួលក្រហមលើស្បែក ឬចេញឈាមច្រមុះ។
ស្រ្តីពពោះដែលឆ្លងជំងឺគ្រុនឈាម អាចនឹងជាសះស្បើយក្នុងរយៈពេល១សប្តាហ៍ បើសិនជាព្យាបាលបានត្រឹមត្រូវ តែក្នុងករណីធ្ងន់ធ្ងរ រោគសញ្ញាមាន ក្អួតចង្អោរ ចុកពោះខ្លាំង ពិបាកដកដង្ហើម មានការហូរឈាមតាមច្រមុះ អញ្ចាញធ្មេញ តាមបាត ឬនៅពីក្រោមស្បែក និង អាចមានគ្រោះថ្នាក់ដល់ជីវិត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕