ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ឱសថ Xylometazoline Nasal ឬថ្នាំបាញ់ច្រមុះ Xylometazoline ជាទូទៅគឺប្រើដើម្បីព្យាបាលបញ្ហាតឹងច្រមុះដោយសារ អាលែកហ្ស៊ី រលាកច្រមុះ ឬគ្រុនផ្ដាសាយធម្មតា។ ឱសថនេះក៏អាចនឹងត្រូវប្រើក្នុងគោលបំណងព្យាបាលបញ្ហាសុខភាពផ្សេងទៀតដែលមិនបានបង្ហាញខាងលើ។
ឱសថ Xylometazoline Nasal គឺជាឱសថបំបាត់អាការៈតឹងច្រមុះ (Decongestant) ជួយធ្វើឲ្យសរសៃឈាមក្នុងរន្ធច្រមុះរួមតូចវិញ ព្រោះថាសរសៃឈាមដែលរីកក្នុងរន្ធច្រមុះអាចធ្វើឲ្យតឹងច្រមុះបាន។
សូមប្រើថ្នាំនេះតាមការណែនាំរបស់គ្រូពេទ្យ ឬតាមការណែនាំក្នុងខិតប័ណ្ណថ្នាំ។ មិនត្រូវប្រើច្រើនជាង ឬតិចជាង ឬយូរជាងកម្រិតដែលណែនាំនោះឡើយ។ការប្រើថ្នាំនេះច្រើនពេក អាចបង្កឲ្យខូចខាតទៅលើរន្ធច្រមុះ ដែលជាហេតុនាំឲ្យតឹងច្រមុះរ៉ាំរ៉ៃ។
របៀបប្រើថ្នាំបាញ់ច្រមុះ (Nasal spray)
យើងត្រូវបាញ់ចូលច្រមុះតិចៗ។ យើងត្រូវផ្ងើយក្បាលទៅក្រោយ ហើយដាក់ ចុងបំពង់ថ្នាំចូលក្នុងរន្ធច្រមុះម្ខាង រួចយកម្រាមដៃសង្កត់បិទរន្ធច្រមុះម្ខាងទៀត។ ដកដង្ហើមចូលឲ្យលឿន និងបាញ់ថ្នាំចូលក្នុងច្រមុះថ្នមៗ។ បន្ទាប់មក ចូរធ្វើដូចគ្នានឹងរន្ធច្រមុះម្ខាងទៀត។ មិនត្រូវ ញីសសំបោរ យ៉ាងហោចណាស់ក៏ពីរទៅបីនាទីដែរ ក្រោយប្រើថ្នាំបាញ់ច្រមុះរួច។ គ្នាយើងត្រូវចាំថាមិនត្រូវប្រើថ្នាំបាញ់ច្រមុះនេះ ច្រើនជាងបីដងក្នុងមួយថ្ងៃឡើយ (ត្រូវប្រើរៀងរាល់ ៨ទៅ ១០ម៉ោងម្ដង)។
ដើម្បីការពារកុំឲ្យមានការចម្លងរោគ យើងមិនអាចឲ្យថ្នាំបាញ់ច្រមុះរបស់យើងទៅអ្នកដទៃប្រើនោះទេ។
យើងត្រូវទៅជួបគ្រូពេទ្យភ្លាមប្រសិនបើរោគសញ្ញារបស់យើងមិនបានធូរស្រាលបន្ទាប់ពីប្រើបាន ៥ថ្ងៃពិតពីថ្ងៃចាប់ផ្ដើមការព្យាបាល។
កន្លែងដែលល្អបំផុតដើម្បីរក្សាទុកឱសថនេះគឺនៅក្នុងសីតុណ្ហភាពធម្មតា (មានបញ្ជាក់ក្នុងសេចក្ដីណែនាំរបស់ថ្នាំ) និងត្រូវទុកឆ្ងាយពីពន្លឺថ្ងៃនិងសំណើម។ ដើម្បីកុំឲ្យខូចថ្នាំ សូមកុំទុកវានៅក្នុងបន្ទប់ទឹកឬទូទឹកកក កន្លែងកកឲ្យសោះ។ យើងត្រូវចាំថាឱសថប្រភេទនេះ មានខ្លះត្រូវការ ការទុកដាក់ខុសៗគ្នា។ សូមពិនិត្យមើលការណែនាំនៅលើសំបកកញ្ចប់ឬសួរឱសថការីអំពីរឿងនេះ។ ដើម្បីសុវត្ថិភាព យើងទុកថ្នាំឲ្យឆ្ងាយពីក្មេងៗនិងសត្វចិញ្ចឹម។
យើងមិនត្រូវចាក់ឱសថនេះ ចោលតាមបង្គន់ ឬលូរបង្ហូរទឹកទេ លើកលែងមានការណែនាំឲ្យធ្វើដូចនោះ។ ថ្នាំដែលផុតសុពលភាពប្រើប្រាស់យើងចាំបាច់ត្រូវតែបោះចោល ឈប់ប្រើប្រាស់។ សូមទៅពិគ្រោះជាមួយឱសថការីដើម្បីដឹងពីព័ត៌មានលម្អិតស្ដីពីការបោះចោលថ្នាំប្រភេទនេះឲ្យបានត្រឹមត្រូវ។
អត្ថបទពាក់ព័ន្ធ៖
យើងមិនគួរប្រើថ្នាំនេះទេ ប្រសិនបើយើងមានប្រតិកម្មទៅនឹងថ្នាំប្រភេទនេះ។
យើងអាចសាកសួរគ្រូពេទ្យ ឬឱសថការី ថាតើថ្នាំនេះ អាចមានសុវត្ថិភាពចំពោះយើងឬអត់ បើសិនយើងកំពុងមានបញ្ហាសុខភាព ជាពិសេសមាន៖
– ជំងឺបេះដូង លើសសម្ពាធឈាម
– ជំងឺទឹកដក់ក្នុងភ្នែក (Glaucoma)
– ជំងឺថ្លើម ឬជំងឺតម្រងនោម
– ក្រពេញប្រូស្តាត រីកធំ មានបញ្ហាក្នុងការបន្ទោរបង់នោម
– ជំងឺទឹកនោមផ្អែម
– ឬមានបញ្ហាក្រពេញ ទីរ៉ូអ៊ីត
មិនមានការសិក្សារណាបញ្ជាក់ថាមានហានិភ័យលើការប្រើថ្នាំនេះ ពេលមានផ្ទៃពោះឬពេលបំបៅដោះកូននៅឡើយទេ។ សូមពិភាក្សាជាមួយគ្រូពេទ្យដើម្បីដឹងពីឥទ្ធិពល និងហានិភ័យមុនពេលប្រើថ្នាំ។ យោងទៅលើ ផ្នែករដ្ឋបាលចំណីអាហារសហរដ្ឋអាមេរិក (FDA) ឱសថនេះ ចាត់ចូលក្នុងគ្រោះថ្នាក់ប្រភេទ C (មានហានិភ័យខ្លះ) ចំពោះស្ត្រីមានផ្ទៃពោះ។
ឯកសារយោងនៃរដ្ឋបាលចំណីអាហារនិងថ្នាំខាងក្រោម៖
– A=មិនមានហានិភ័យ
– B=មិនមាន ហានិភ័យក្នុងការសិក្សាខ្លះ
– C=មានហានិភ័យខ្លះ
– D=មានភស្ដុតាងថាមានហានិភ័យ
– X=ហាមមិនឲ្យប្រើប្រាស់
– N=មិនដឹង
យើងត្រូវទៅជួបគ្រូពេទ្យភ្លាមប្រសិនបើ យើងមានចេញសញ្ញាប្រតិកម្មអាលែកហ្ស៊ីថ្នាំនេះដែលមានដូចជាចេញកន្ទាលត្រអាក ពិបាកដកដង្ហើម ហើមមុខ ហើមបបូរមាត់ ហើមអណ្ដាត ឬបំពង់ក។ ទោះបីជាគ្រោះថ្នាក់នៃផលរំខានមានកម្រិតទាប នៅពេលប្រើថ្នាំនេះ នៅក្នុងច្រមុះក៏ពិតមែន ប៉ុន្តែផលរំខាននៅតែអាចកើតមានធ្ងន់ធ្ងរ បើសិនជាថ្នាំត្រូវស្រូបចូលទៅក្នុងចរន្តឈាម។
សូមបញ្ឈប់ការប្រើថ្នាំនេះ និងទៅជួបគ្រូពេទ្យភ្លាមប្រសិនបើយើង៖
-ស្រវាំងភ្នែក
-ឈឺក្បាល វិលមុខ អារម្មណ៍ភិតភ័យ
-បេះដូងលោតញាប់ខ្លាំង
-មានអារម្មណ៍ថាស្រាលក្បាល ហាក់ដូចជាជិតសន្លប់
-ដកដង្ហើមមានលឺសូរ មានអារម្មណ៍ថាដកដង្ហើមបានខ្លីៗ ឬ រោគសញ្ញាជំងឺកាន់តែខ្លាំងទៅៗ
ផលរំខានកើតញឹកញាប់រួមមាន៖
-មានអារម្មណ៍ស្ងួត ក្រហាយ ឬរមាស់នៅក្នុងច្រមុះ
-កណ្ដាស
-ហៀរសំបោរ
មិនមែនមនុស្សគ្រប់គ្នាសុទ្ធ តែមានផលរំខានដូចនេះឡើយ ហើយប្រហែលជាមានផលរំខានផ្សេងទៀតដែលមិនបានរៀបរាប់ខាងលើ។ ដូចនេះបើយើងមានការបារម្ភពីផលរំខាន សូមពិគ្រោះជាមួយគ្រូពេទ្យនិងឱសថការី។
អត្ថបទពាក់ព័ន្ធ៖
ឱសថនេះ អាចនឹងមានប្រតិកម្មអន្តរកម្មជាមួយថ្នាំដែលយើងកំពុងប្រើ ដែលអាចធ្វើឲ្យផ្លាស់ប្ដូរសកម្មភាពរបស់ថ្នាំ ឬអាចបង្កើនគ្រោះថ្នាក់នៃផលរំខានធ្ងន់ធ្ងរមួយចំនួន។ ដើម្បីចៀសផុតពីប្រតិកម្មអន្តរកម្មថ្នាំធ្ងន់ធ្ងរ យើងគួរតែធ្វើបញ្ជីរាយនាមឈ្មោះថ្នាំដែលបានប្រើនិងកំពុងប្រើ (រួមមានទាំងថ្នាំត្រូវការវេជ្ជបញ្ជា ថ្នាំមិនត្រូវការវេជ្ជបញ្ជា និងផលិតផលឱសថបូរាណ) ហើយប្រាប់ទៅគ្រូពេទ្យ និងឱសថការី។
ដើម្បីសុវត្ថិភាព មិនត្រូវចាប់ផ្ដើមប្រើ ឬបញ្ឈប់ការប្រើ ឬផ្លាស់ប្ដូរកម្រិតប្រើ ថ្នាំអ្វីមួយដោយគ្មានការយល់ព្រមពីគ្រូពេទ្យឡើយ។ ឱសថដែលប្រើតាមមាត់ ឬចាក់ចូលក្នុងខ្លួន ហាក់ដូចជាមិនមានឥទ្ធិពល់លើឱសថ ដែលប្រើប្រាស់តាមច្រមុះនោះទេ។ ប៉ុន្តែ ថ្នាំជាច្រើនអាចនឹងមានប្រតិកម្មអន្តរកម្មរវាងគ្នា និងគ្នា។ ដូចនេះសូមប្រាប់ទៅគ្រូពេទ្យគ្រប់ឱសថដែលយើងប្រើ រួមទាំងថ្នាំដែលមានវេជ្ជបញ្ជា ថ្នាំដែលមិនមានវេជ្ជបញ្ជា និងផលិតផលពីធម្មជាតិផ្សេងៗទៀត។
ថ្នាំនេះ អាចនឹងមានប្រតិកម្មអន្តរកម្មជាមួយចំណីអាហារ ឬជាតិអាល់កុល ដោយអាចធ្វើឲ្យសកម្មភាពភាពថ្នាំប្រែប្រួល ឬបង្កើនគ្រោះថ្នាក់នៃផលរំខានធ្ងន់ធ្ងរ។ សូមពិគ្រោះជាមួយ គ្រូពេទ្យ ឬឱសថការី ពីប្រភេទអាហារ ឬ ជាតិអាលកុល ដែលអាចមានអន្តរកម្មជាមួយថ្នាំ មុននឹងចាប់ផ្ដើមប្រើថ្នាំ។
ថ្នាំនេះ អាចនឹងមានប្រតិកម្មអន្តរកម្មនឹងស្ថានភាពសុខភាពរបស់យើង។ ប្រតិកម្មនេះ អាចនឹងធ្វើឲ្យសុខភាពយើងកាន់តែធ្ងន់ធ្ងរ ឬ ធ្វើឲ្យសកម្មភាពថ្នាំប្រែប្រួល។ ជាការសំខាន់ដែលយើងត្រូវប្រាប់ទៅ គ្រូពេទ្យ និងឱសថការី រាល់ស្ថានភាពសុខភាពដែលយើងកំពុងមាន។
ព័ត៌មានទាំងនេះមិនអាចប្រើជំនួសដំបូន្មានផ្នែកវេជ្ជសាស្ត្របានទេ។ ដូចនេះមុននឹងប្រើ សូមទៅពិគ្រោះជាមួយគ្រូពេទ្យដើម្បីទទួលបានព័ត៌មានលម្អិត។
សូមប្រើឱសថនេះ តាមការណែនាំនៅលើសម្បកថ្នាំ ឬ តាមការណែនាំរបស់គ្រូពេទ្យ។ មិនត្រូវប្រើក្នុងកម្រិតច្រើនជាង ឬ តិចជាង ឬយូរជាង អ្វីដែលបានណែនាំនោះទេ។
កម្រិតប្រើទូទៅចំពោះកុមារក្នុងករណី តឹងច្រមុះ៖
ថ្នាំបាញ់ច្រមុះ Xylometazoline ០,០៥ភាគរយ៖
២ ទៅ ១២ឆ្នាំ ៖ បាញ់ ១ ទៅ ២ ឈីត ក្នុងរន្ធច្រមុះ ម្ខាងៗ រាងរាល់ ៨ ទៅ ១០ ម៉ោង មិនត្រូវលើសពី ៣ដងក្នុងមួយថ្ងៃ និងមិនត្រូវប្រើច្រើនជាង ៣ថ្ងៃ ឡើយ។
ថ្នាំនេះអាចមានក្នុងកម្រិតនិងរូបរាងដូចខាងក្រោម៖
-ស្ព្រៃបាញ់ច្រមុះ (Nasal spray)
ប្រសិនជាមានករណីគ្រោះថ្នាក់ដូចជាប្រើលើសកម្រិត សូមប្រញាប់រួសរាន់ស្វែករកការសង្គ្រោះបន្ទាន់នៅមន្ទីរពេទ្យដែលជិតបំផុត។
បើសិនជាយើងភ្លេចប្រើម្តង សូមប្រើភ្លាមពេលដែលនឹកឃើញ។ យ៉ាងណាមិញប្រសិនជាជិតដល់ពេលប្រើម្តងទៀតហើយបានយើងនឹកឃើញថាភ្លេច សូមចាំប្រើនៅពេលបន្ទាប់ទៀតចុះ។ សូមកុំប្រើថ្នាំពីរដងក្នុងពេលតែមួយឲ្យសោះ។
អត្ថបទពាក់ព័ន្ធ៖
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕