អំឡុងពេលវីរុស COVID-19 កំពុងរាតត្បាត ការថែរក្សាអនាម័យ និងសុខភាពឲ្យបានរឹងមាំល្អ គឺជារឿងសំខាន់។ តើត្រូវធ្វើដូចម្តេចខ្លះដើម្បីពង្រឹងប្រព័ន្ធភាពស៊ាំ និងមានសុខភាពល្អ?។ បច្ចុប្បន្នមិនមានវ៉ាក់សាំងការពារយើងពីការឆ្លងវីរុសនេះទេ។ ថ្វីបើមិនមានវ៉ាក់សាំងក៏ពិតមែន តែយើងនៅតែអាចរក្សារាងកាយ សុខភាពយើងឲ្យបានល្អ និងមានអនាម័យដោយការលាងសម្អាតដៃ របបអាហារ ហាត់ប្រាណ សមាធិ គ្រប់គ្រងភាពតានតឹង និងគេងឲ្យបានគ្រប់គ្រាន់។ ត្រូវចាំថាអ្នកមានជំងឺប្រចាំកាយ ឬសុខភាពមិនល្អគឺប្រឈមនឹងហានិភ័យខ្ពស់បើសិនជាឆ្លងវីរុស COVID-19។ ដើម្បីឲ្យរាងកាយយើងរឹងមាំ និងមានសុខភាពល្អគួរអនុវត្តវិធីទាំងនេះ។
សម័យCOVID-19 ផង ចេះវិធីទាំងនេះទើបជួយពង្រឹងប្រព័ន្ធភាពស៊ាំបានល្អ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. របបអាហារ
សារធាតុចិញ្ចឹមសំខាន់ៗសម្រាប់ជំនួយដល់ប្រព័ន្ធភាពស៊ាំក្នុងការប្រឆាំងនឹងបាក់តេរី និងវីរុសមាន៖
- Beta-carotene: រាងកាយនឹងបំលែងសារធាតុនេះជាវីតាមីន A ដែលជាសារធាតុសំខាន់សម្រាប់ប្រព័ន្ធភាពស៊ាំក្នុងការប្រឆាំងនឹងជាតិពុល និងមេរោគឈ្លានពានផ្សេងទៀត។ ផ្លែឈើ និងបន្លែមានសារធាតុ Beta-caroteneមានដំឡូងជ្វា ការ៉ុត ផ្លែស្វាយ ស្ពៃពួយឡេង ផ្កាខាត់ណាខៀវ និងផ្លែត្រសក់ផ្អែម។
- វីតាមីន C៖ វីតាមីននេះជួយរាងកាយក្នុងការកំណត់ថាតើការពារបែបណាដែលរាងកាយត្រូវការ។ យើងអាចទទួលបានវីតាមីន C ពីអាហារទាំងនេះរួមមានផ្លែក្រូច ក្រូចថ្លុង គីវី ស្ត្របឺរី ម្ទេសប្លោកក្រហមនិងបៃតង ផ្កាខាត់ណាខៀវ ស្ពៃក្ដោប និងផ្កាខាត់ណា។
- វីតាមីន D៖ ការខ្វះវីតាមីន D អាចធ្វើឲ្យប្រព័ន្ធភាពស៊ាំចុះខ្សោយ និងមានហានិភ័យនៃជំងឺផ្លូវដង្ហើមបង្កដោយវីរុស។ ប្រភពវីតាមីន D មានត្រីសាល់ម៉ុន ត្រីសាឌីន ស៊ុត ទឹកដោះគោ ផលិតផលធ្វើពីទឹកដោះគោ តៅហ៊ូ និងផ្សិត។
- ស័ង្កសី៖ ស័ង្កសីជួយកោសិកាក្នុងប្រព័ន្ធភាពស៊ាំឲ្យលូតលាស់ និងមានភាពខុសគ្នា។ អាហារមានជាតិស័ង្កសីមានសណ្ដែក chickpeas lentils តៅហ៊ូ cereals គ្រាប់ធញ្ញជាតិ អយស្ទើរ ក្តាម បង្កង សាច់គោ សាច់ជ្រូក និងយាអ៊ួ។
- ប្រូតេអ៊ីន៖ ប្រូតេអ៊ីនសំខាន់សម្រាប់ការបង្កើតកោសិកាប្រព័ន្ធភាពស៊ាំ និងអង់ទីករ រួមទាំងជួយប្រព័ន្ធភាពស៊ាំក្នុងការដំណើរការទៀតផង។ ប្រូតេអ៊ីនអាចបានពីសាច់សត្វ និងបន្លែរួមមានសាច់ត្រី សាច់មាន់ សាច់គោ ទឹកដោះគោ យ៉ាអួ៊ ស៊ុត គ្រាប់ធញ្ញជាតិ និងសណ្ដែក។
- Prebiotics៖ Probiotics និងPrebiotics ជួយទ្រទ្រង់ប្រព័ន្ធភាពស៊ាំ។ ប្រភពរបស់Probiotics មានយ៉ាអួ៊ ឈីស និងគីមឈី។ រីឯ Prebiotics មានក្នុងគ្រាប់ធញ្ញជាតិ (whole grains) ផ្លែចេក ខ្ទឹមបារាំង ខ្ទឹមស ស្លឹកខ្ទឹម និងសណ្ដែក។
- ជាតិទឹក៖ អ្វីដែលសំខាន់គឺផឹកទឹកឲ្យបានគ្រប់គ្រាន់។ ស្ត្រីគួរផឹកឲ្យបាន ២,៧លីត្រក្នុងមួយថ្ងៃ និងបុរសគួរផឹក៣,៧លីត្រក្នុងមួយថ្ងៃ។ យើងក៏អាចញ៉ាំអាហារដែលសំបូរជាតិទឹកដូចជាផ្លែឈើ បន្លែ និងស៊ុបដែរ។
អត្ថបទពាក់ព័ន្ធ៖
- អ្វីជាប្រព័ន្ធភាពស៊ាំ? ហេតុអ្វីអាចទប់ស្កាត់វីរុសឈ្លានពានរាងកាយយើងបាន?
- ចេះតិចនិកញ៉ាំអាហារនេះ អាចជួយការពារខ្លួនពីជំងឺផ្សេងៗបានច្រើន
២. ការហាត់ប្រាណ
ការហាត់ប្រាណជាប្រចាំជាវិធីល្អដែលជួយគ្រប់គ្រងភាពតានតឹង និងពង្រឹងប្រព័ន្ធភាពស៊ាំ។ ការស្រាវជ្រាវបានបង្ហាញអ្នកហាត់ប្រាណជាប្រចាំមានហានិភ័យក្នុងការឆ្លងជំងឺទាបជាងអ្នកមិនហាត់ប្រាណ។ ម៉្យាងទៀតការធ្វើលំហាត់ប្រាណអាចកាត់បន្ថយហានិភ័យជំងឺរ៉ាំរ៉ៃដែលអាចធ្វើឲ្យប្រព័ន្ធភាពស៊ាំចុះខ្សោយរួមមានជំងឺបេះដូង ជំងឺទឹកនោមផ្អែម និងជំងឺធាត់។ យើងអាចហាត់ប្រាណនៅផ្ទះ ដូចជាធ្វើយ៉ូហ្គាជាដើម។
៣. ការធ្វើសមាធិ
ការសិក្សាបានលើកឡើងថាការធ្វើសមាធិអាចជួយឲ្យប្រព័ន្ធភាពស៊ាំដំណើរការបានយ៉ាងល្អ។ ស្ថានភាពតានតឹងក្នុងអំឡុងពេលវីរុស COVID-19កំពុងរាតត្បាតអាចនឹងផ្តល់ផលអវិជ្ជមានដល់ប្រព័ន្ធភាពស៊ាំ ប៉ុន្តែការសមាធិអាចជួយឲ្យយើងឆ្លើយតបនឹងស្ថានភាពតានតឹងនេះបានប្រសើរឡើង។ ដើម្បីចាប់ផ្តើមសមាធិ គ្រាន់តែយើងផ្ដោតអារម្មណ៍ទៅលើដង្ហើមរបស់យើង ហើយការអង្គុយត្រង់ខ្នងអាចជួយបាន។ ប្រសិនជាយើងមានអារម្មណ៍មិនមូល ចេះតែមានគំនិតផ្សេងមករំខាន យើងអាចត្រលប់ទៅផ្ដោតលើដង្ហើមរបស់យើងជាថ្មីវិញ។ ការសិក្សាភាគច្រើនបង្ហាញថាយើងត្រូវអនុវត្តយ៉ាងតិច ១០នាទីក្នុងមួយថ្ងៃរយៈពេល៨ទៅ១០សប្ដាហ៍ដើម្បីទទួលបានអត្ថប្រយោជន៍។ នៅពេលសមាធិ យើងគួរជ្រើសរើសពេល និងរយៈពេលសម្រាប់សមាធិឲ្យដូចគ្នា រួមទាំងទីកន្លែងដែរ។
៤. ការគ្រប់គ្រងភាពតានតឹង
ភាពតានតឹងផ្លូវចិត្តរយៈពេលយូរអាចមានផលអវិជ្ជមានដល់ប្រព័ន្ធភាពស៊ាំដោយបន្ថយសមត្ថភាពរាងកាយប្រឆាំងនឹងវីរុស និងបាក់តេរី។ បន្ថែមពីនេះ ពេលស្ថិតនៅក្នុងស្ថានភាពតានតឹង មនុស្សភាគច្រើនតែងផឹកស្រា ជក់បារី ញ៉ាំអាហារមិនល្អ និងគេងមិនគ្រប់គ្រាន់ដែលទាំងនេះសុទ្ធតែប៉ះពាល់ដល់ប្រព័ន្ធភាពស៊ាំ។
ដើម្បីសម្រួលដល់ភាពតានតឹងក្នុងចិត្ត យើងត្រូវដឹងថាភាពតានតឹង និងការថប់បារម្ភគឺជារឿងធម្មតា និងស្វែងរកវិធីសម្រួលដែលមានសុខភាពល្អ និងមានសុវត្ថិភាពសម្រាប់ខ្លួនយើង។ ការរក្សាទំនាក់ទំនងជាមួយមិត្តភកិ្តអាចជួយដល់យើងបាន។ ដោយឡែកអ្នកដែលមានភាពតានតឹង និងថប់បារម្ភខ្ពស់គួរកាត់បន្ថយការប្រើប្រាស់បណ្ដាញសង្គម និងអានព័ត៌មានដែលធ្វើឲ្យយើងកាន់តែមានភាពតានតឹង និងថប់បារម្ភ។
៥. គេងឲ្យបានគ្រប់គ្រាន់
ការគេងមិនគ្រប់គ្រាន់ក៏អាចប៉ះពាល់ដល់ប្រព័ន្ធភាពស៊ាំដែរ។ ដើម្បីពង្រឹងប្រព័ន្ធភាពស៊ាំ National Sleep Foundation ណែនាំឲ្យគេង៧ទៅ៨ម៉ោងក្នុងមួយយប់។ ប៉ុន្តែបើយើងពិបាកក្នុងការគេង ឬមិនអាចគេងគ្រប់ចំនួនម៉ោងដែលបានណែនាំទេ យើងអាចបំពេញបានដោយការគេងថ្ងៃ។ យើងអាចគេងនៅពេលព្រឹក និងពេលថ្ងៃដោយមិនឲ្យលើស៣០នាទីបាន។ ការធ្វើបែបនេះអាចជួយកាត់បន្ថយភាពតានតឹង និងផលប៉ះពាល់អវិជ្ជមានបណ្ដាលមកពីការគេងមិនគ្រប់គ្រាន់ទៅលើប្រព័ន្ធភាពស៊ាំបាន។ ប្រសិនជាយើងមិនអាចគេងពេលព្រឹក និងពេលថ្ងៃបានយើងអាចគេង២០នាទីនៅម៉ោងអាហារថ្ងៃត្រង់ ឬមុននឹងញ៉ាំអាហារពេលល្ងាចបាន។
អត្ថបទពាក់ព័ន្ធ៖
- ចង់ទទួលបានវីតាមីន D សម្រាប់រាងកាយគ្រប់គ្រាន់ អនុវត្តវិធីទាំងពីរនេះ
- កត្តាប្រាំយ៉ាងនេះ ធ្វើឲ្យអ្នកឆ្លងវីរុស COVID-19 មានស្ថានភាពខុសៗគ្នា
- ៥ចំណុច គួរធ្វើពេលសម្ងំតែក្នុងផ្ទះ អំឡុងCOVID-19 កំពុងរាតត្បាត
- ញ៉ាំទឹកអត់ចេះតែញ៉ាំតាមស្រេកទេ មានពេលល្អ គ្នាយើងគួរដឹង
- ចូលចិត្តគេងថ្ងៃត្រូវដឹងតិចនិកនេះ កុំឲ្យក្រោកឡើងរងីរងើ ឬរំខានដំណេកយប់
- ក្រៅពីក្រូច បន្លែ និងផ្លែឈើទាំងនេះក៏ជាប្រភពនៃវីតាមីន C ដែរ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម