ទាំងនេះជាប្រភេទថ្នាំ និងវិធីព្យាបាលលោកដូណាល់ ត្រាំ ក្រោយឆ្លង COVID-19
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ថ្មីៗនេះ លោកប្រធានាធិបតីសហរដ្ឋអាមេរិក ដូណាល់ ត្រាំ គឺត្រូវបានរកឃើញថាបានឆ្លងជំងឺ COVID-19 ខណៈពេលបច្ចុប្បន្ននេះ ក្រុមគ្រូពេទ្យរបស់លោកប្រធានាធិបតីបានផ្ដល់ថ្នាំ និងប្រើវិធីសាស្ត្រព្យាបាលជាច្រើនដើម្បី កាត់បន្ថយរោគសញ្ញាជំងឺ និងធ្វើឲ្យការជាសះស្បើយពីជំងឺកាន់តែឆាប់រហ័ស។ ខាងក្រោមនេះគឺជាវិធីសាស្ត្រមួយចំនួនដែលគេបានដឹង ថាត្រូវបានប្រើដើម្បីព្យាបាលលោកប្រធានាធិបតី។
១- ការព្យាបាលដោយប្រើ អង់ទីករ ម៉ូណូក្លូណាល់ របស់ក្រុមហ៊ុន Regenron
កាលពីថ្ងៃសុក្រកន្លងទៅនេះ សេតវិមានបានប្រកាសថាលោកប្រធានាធិបតី បានទទួលកម្រិតថ្នាំ ៨ ក្រាមនៃ អង់ទីករ ម៉ូណូក្លូណាល់ របស់ក្រុមហ៊ុន Regenron។ ដើម្បីផលិតអង់ទីករ ម៉ូណូក្លូណាល់នេះ អ្នកវិទ្យាសាស្ត្ររបស់ក្រុមហ៊ុនបានជ្រើសរើសយក អង់ទីករ ដែលប្រឆាំងជំងឺ COVID-19 ចំនួនពីរ ដែលត្រូវបានសម្អាតយ៉ាងល្អបំផុត យកមកធ្វើការចម្លងហ្សែនបង្កើតជាអង់ទីករ ដែលល្អជាច្រើនទៀត ដើម្បីយកមកព្យាបាលជំងឺនេះ។
យោងតាមរបាយការណ៍នៃការស៊ើបអង្កេតបានឲ្យដឹងថា ការព្យាបាលនេះ គេហៅថា REGN-COV2 គឺត្រូវបានធ្វើការសិក្សាលើមនុស្សចាប់តាំងពីខែ មិថុនាមកម្លេះ។ ក្រុមហ៊ុនក៏បានបង្ហាញពីលទ្ធផលនៃការសិក្សាដែលរកឃើញថា អ្នកជំងឺ ២៧៥ ដែលមិនបានសម្រាកព្យាបាលជំងឺ COVID-19 នៅឯមន្ទីរពេទ្យ និងបានទទួលការព្យាបាលនេះ គឺបានជា និងមានសុវត្ថិភាព ហើយកាត់បន្ថយកម្រិតរបស់វីរុស និងរោគសញ្ញារបស់ជំងឺទៀតផង។
គួរបញ្ជាក់ដែរថា ការព្យាបាលនេះ គឺនៅមិនទាន់ទទួលបានការយល់ស្របឲ្យព្យាបាល ដោយរដ្ឋបាលចំណីអាហារ និងឱសថ (FDA) របស់សហរដ្ឋអាមេរិកនៅឡើយទេ ប៉ុន្តែខាងក្រុមហ៊ុនកំពុងតែចរចាជាមួយអ្នកចុះបញ្ជីការឱសថ ដើម្បីទទួលបានការអនុញ្ញាតឲ្យប្រើប្រាស់ការព្យាបាលបន្ទាន់ (EUA)។
២- ការព្យាបាលដោយប្រើថ្នាំ REMDESEVIR
កាលពីថ្ងៃសៅរ៍កន្លងទៅ គ្រូពេទ្យម្នាក់ដែលព្យាបាលលោកប្រធានាធិបតី បាននិយាយថា លោកប្រធានាធិបតី គឺតម្រូវឲ្យប្រើថ្នាំនេះ មួយគ្រាប់ក្នុងមួយថ្ងៃរយៈពេល ៥ថ្ងៃ ដើម្បីកាត់បន្ថយរយៈពេលព្យាបាល និងបង្កើនការជាសះស្បើយឆាប់រហ័ស។
គួរបញ្ជាក់ថាថ្នាំនេះគឺត្រូវបានគេរកឃើញថាជួយឲ្យអ្នកជំងឺកាត់បន្ថយរយៈពេលព្យាបាល និងបង្កើនការជាសះស្បើយពីជំងឺ ។ក្នុងការសិក្សាព្យាបាលលើមនុស្សចំពោះថ្នាំនេះ គឺមានអ្នកជំងឺចំនួន ៦០០នាក់បានចូលរួមក្នុងការសិក្សានេះ ហើយជាលទ្ធផលគេបានរកឃើញថាក្នុងរយៈពេល ព្យាបាលចំនួន ១០ថ្ងៃ អ្នកដែលបានទទួលថ្នាំនេះ គឺបានធូរស្រាលច្រើននៅថ្ងៃទី១១ បើធៀបជាមួយអ្នកដែលមិនបានទទួលថ្នាំ។
៣-ការព្យាបាលដោយថ្នាំ Dexamethasone
កាលពីថ្ងៃសៅរ៍ដូចគ្នានេះដែរ លោកប្រធានាធិបតីក៏បានទទួលការព្យាបាលដោយថ្នាំ Dexamethasone ដែលជាថ្នាំក្នុងពពួក ករទីកូស្តេរ៉យ (corticosteroid ) បន្ទាប់ពីកម្រិតអុកស៊ីសែនរបស់លោកបានធ្លាក់ចុះ នេះបើតាមលោកវេជ្ជបណ្ឌិត Sean Coley។ ជាធម្មតាថ្នាំនេះ គឺគេអាចឲ្យអ្នកជំងឺប្រើនៅពេលដែលអ្នកជំងឺត្រូវបញ្ចូលអុកស៊ីសែន ឬត្រូវការបំពាក់ម៉ាស៊ីនជំនួយដង្ហើម (Ventilation) ប៉ុណ្ណោះ ប៉ុន្តែគេនៅមិនទាន់ដឹងថាហេតុអ្វីបានជាត្រូវផ្ដល់ជូនលោកប្រធានាធិបតីនៅឡើយទេ បើទោះជាគាត់នៅមិនទាន់ដល់ដំណាក់កាលដែលបានរៀបរាប់ក៏ដោយ។ នេះបើយោងតាមប្រសាសន៍លោកស្រីវេជ្ជបណ្ឌិត Rochelle Walensky ប្រធានផ្នែកជំងឺឆ្លងនៃមន្ទីរពេទ្យទូទៅនៃរដ្ឋ ម៉ាសាឈូសេត (Massachusetts)។
គួរបញ្ជាក់ថាថ្នាំ Dexamethasone នេះត្រូវបានប្រើនៅសហរដ្ឋអាមេរិកចាប់តាំងពីជំងឺរាតត្បាតសកលនេះចាប់ផ្ដើមកើតមានដំបូងមកម្លេះ។
៤-បំពាក់ជំនួយអុកស៊ីសែន
បើយោងតាមលោកវេជ្ជបណ្ឌិត Coley វេជ្ជបណ្ឌិតក្នុងសេតវិមាន បាននិយាយថា លោកប្រធានាធិបតី គឺមិនតម្រូវឲ្យពាក់អុកស៊ីសែននៅឡើយទេកាលពីថ្ងៃសៅរ៍ ប៉ុន្តែលោកបានបំពាក់អុកស៊ីសែនជំនួយនៅថ្ងៃអាទិត្យដោយសារតែការធ្លាក់ចុះកម្រិតអុកស៊ីសែនរបស់លោក។
គួរបញ្ជាក់ថាក្រៅពីការព្យាបាលខាងលើ លោកប្រធានាធិបតីក៏ បានទទួលជាតិស័ង្កសី វីតាមីន D ថ្នាំ Famotidin ថ្នាំ Melatonin និងថ្នាំ Aspirin ផងដែរ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម