មិន​ចង់​គ្រោះថ្នាក់​ដល់​កូន ម៉ាក់ៗ​ចៀស​ពី​ជំងឺ ៣ មុខនេះ​ឲ្យបាន​អំឡុង​ពពោះ

ដោយ ត្រួតពិនិត្យដោយ Chan Sineth.

អំឡុង​ពពោះ​ម៉ាក់​ពិបាកខ្លាំង​ណាស់ ម្នាក់ៗស៊ូទ្រាំនឹងការលំបាក ប្រយ័ត្ន​រឿង​គ្រប់​យ៉ាង ដើម្បី​កូន​កើត​មាន​សុខភាពល្អ ឆ្លាត​វាងវៃ។ ថ្ងៃនេះ Hello គ្រូពេទ្យ​មាន​រឿង​សំខាន់​មួយ​ប្រាប់​ស្រីៗ​គ្នា​យើង​ឲ្យ​ប្រយ័ត្ន​កុំ​កើតជំងឺ ៣ មុខ រួម​មាន ជំងឺស្អូច អុតស្វាយ និង កញ្ជ្រឹល អំឡុង​ពេល​មាន​បេប៊ី មិនអ៊ីចឹង​ទេ កូន​នឹង​បញ្ហា​ធំ​មិនខាន។

ស្ត្រីមានផ្ទៃពោះមានបញ្ហាសុខភាព

១- ជំងឺស្អូច
ជំងឺ​នេះ​បង្ក​ឡើង​ដោយ​វីរុស ឈ្មោះ Rubella កើត​ទាំង​លើ​កូន​ក្មេង និង​មនុស្ស​ពេញ​វ័យ។ ស្អូច​ជា​ជំងឺ​ឆ្លង​តាម​រយៈ​ការ​ដក​ដង្ហើម និង​ការ​ប៉ះពាល់​អ្នក​ជំងឺ។ ជំងឺ​នេះ​អាច​ព្យាបាល​បាន តែ​បើ​កើត​លើ​ស្ត្រី​មាន​ផ្ទៃពោះ​បង្ក​ផល​ប៉ះពាល់​ដល់​កូន​ អាច​ឲ្យ​បេប៊ី​ស្លាប់​ក្នុង​ពោះ ឬ​កើត​មក​មិន​គ្រប់​លក្ខណៈ ដូចជា​ក្បាលតូច ឬធំ ថ្លង់ មាន​បញ្ហាភ្នែក ត្រចៀក សួត បេះដូង ប្រព័ន្ធ​ប្រសាទ ជាដើម។

រោគសញ្ញាជំងឺស្អូច៖
– ក្តៅ​ខ្លួន
– ភ្នែក​ក្រហម​
– ឡើង​កូន​កណ្តុរនៅក ក្រោយត្រចៀក​
– ឈឺ​សន្លាក់​ដៃ​ជើង​
– ចេញ​កន្ទួល​ក្រហម​នៅ​លើ​ស្បែក​ ​ពី​ក្បាល​រហូត​ដល់​ចុង​​ជើង (បាត់ទៅវិញ ៣-៧ថ្ងៃ)។

វិធីបង្ការជំងឺស្អូច៖
ជំងឺ​នេះ​អាច​ការពារ​បាន​ដោយ​ការ​ចាក់​វ៉ាក់សាំង​ការពារ​តាំង​ពីក្មេង និង​មុនពេល​ចាប់​ផ្តើម​ចង់​បាន​អាអូន (ចំពោះ​ស្រីៗ)។ ក្នុង​ករណី​ដែល​ម៉ាក់ៗ​មិន​បាន​ចាក់វ៉ាក់សាំង​តាំង​ពី​ក្មេង គ្មាន​អង់ទីគ័រ​ការពារ ឬ​មុន​ពេល​មានបេប៊ី អាច​បង្ការ​ការ​ឆ្លង​ជំងឺ​ស្អូច​នេះ ដោយ​មិន​ត្រូវ​ប៉ះពាល់ ឬ​ទៅ​ជិត​អ្នក​ជំងឺ។

២- ជំងឺអុតស្វាយ
អុតស្វាយ​ជា​ជំងឺ​ឆ្លង កើត​លើ​មនុស្ស​គ្រប់​វ័យ បង្ក​ឡើង​បង្ក​ឡើង​ដោយ​វីរុស​ឈ្មោះ Varicella Zoster។ អំឡុង​ពពោះ​បើ​ម៉ាក់ៗ​កើត​មាន ឬ​ឆ្លង​ជំងឺ​អុតស្វាយ នឹង​មាន​ផល​ប៉ះពាល់​ធ្ងន់ធ្ងរ​ដល់​អាអូន​ក្នុង​ផ្ទៃ អាចរលូតកូន ស្លាប់​ក្នុងពោះ ឬ​កើត​មក​មាន​ភាព​មិន​ប្រក្រតី។

រោគសញ្ញាអ៊ុតស្វាយ៖
– ក្តៅខ្លួន
– អស់កម្លាំង
– ល្ហិតល្ហៃ
– ទន់ដៃទន់ជើង
– មានស្នាមកន្ទួលលើស្បែក
– ចេញពងបែក ឈឺពេញរាងកាយ។

វិធីបង្ការ៖
អុត​ស្វាយ​ជា​ជំងឺ​ឆ្លង​តាម​រយៈ​ពងទឹកលើស្បែក ការ​ក្អក កណ្តាស់​របស់​អ្នក​ជំងឺ ដូច្នេះ​ហើយ​ដើម្បី​បង្ការ​មិន​ឲ្យ​ឆ្លង ប៉ះពាល់​ដល់​កូន​ក្នុង​ផ្ទៃ ម៉ាក់ៗ​មិន​ត្រូវ​នៅ​ក្បែរ​អ្នក​ជំងឺ​អ៊ុតស្វាយ​នោះ​ទេ។

៣- ជំងឺកញ្ជ្រឹល
កញ្ជ្រឹល​ជាជំងឺ​ឆ្លង បង្ក​ឡើង​ដោយ​វីរុស Measles ដែល​ងាយ​កើត​ចំពោះ​ក្មេងៗ​ខ្វះ​អាហារូបត្ថម្ភ មិន​មាន​អនាម័យ​គ្រប់​គ្រាន់។ ត្បិត​តែ​ជំងឺ​នេះ​កម្រ​កើត​មាន​លើ​មនុស្ស​ចាស់​មែន តែ​បើ​កើត​កើត​មាន​ស្ត្រី​មាន​ផ្ទៃពោះ​អាច​ឲ្យ​កូន​លូតលាស់​យឺត គ្រឿង​ក្នុង​ខ្សោយ ខូច​បេះដូង ថ្លង់ ឬ​ពិការ​ផ្នែក​បញ្ញា។

រោគ​សញ្ញា​ជំងឺ​កញ្ជ្រឹល៖
– គ្រុន​ក្តៅ
– ហៀរ​សំបោរ
– ឈឺ​ភ្នែក
– ក្អក
– រាករូស
– មានកន្ទួល​ក្រហម​លើ​ស្បែក។

វិធីបង្ការ​ជំងឺ​កញ្ជ្រឹល៖
ការ​ចាក់​វ៉ាក់សាំង​ការពារ​មាន​ប្រសិទ្ធភាព​បំផុត តែ​បើ​ពុំ​បាន​ចាក់​វ៉ាក់សាំង​ការពារ​ទេ យើង​មិន​ត្រូវ​ទៅ​ក្បែ​អ្នក​ជំងឺ​កញ្ជ្រឹល​ឡើយ ព្រោះ​មេរោគ​កញ្ជ្រឹល​ងាយ​ឆ្លង​ពី​មនុស្ស​ម្នាក់​ទៅ​មនុស្ស​ម្នាក់​ទៀត តាម​ការ​កណ្តាស់ ក្អក និង​ប៉ះពាល់​អ្នក​ជំងឺ។

ស្រី​ដែល​ត្រៀម​យក​បេប៊ី​ទាំង​អស់​បញ្ចៀស​កុំ​ឲ្យ​កើត​ជំងឺ​ឆ្លងទាំង ៣ មុខ​នេះឲ្យ​បាន​ណា ត្រូវ​ចាក់​វ៉ាក់សាំង​ការពារ​មុន​ពេល​មាន​អាអូន ដើម្បី​សុវត្ថិភាព កូន​កើត​មក​មាន​សុខភាព​ល្អ ឆ្លាត​វាងវៃ។ តែក្នុង​ករណី​ម៉ាក់​សង្ស័យថា​កើត​មាន​ជំងឺ​ទាំង ៣ មុខនេះ មិន​ត្រូវ​បង្អែ​បង្អស់​ឡើយ ប្រញាប់​ទៅ​គ្រូពេទ្យ​ជា​បន្ទាន់។

អត្ថបទពាក់ព័ន្ធ៖

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ចុចស៊ែរឥឡូវនេះ

ត្រួតពិនិត្យថ្ងៃទី ខែ​មីនា 13, 2019 | កែសម្រួលចុងក្រោយ ខែ​មីនា 13, 2019

អ្នកអាចចូលចិត្ត