អត្ថបទនេះ ជាចម្លើយសម្រាប់សំណួរ ស្រីៗគ្នាយើងជាច្រើន តែងចង់ដឹង និងសួរពេទ្យគ្រប់ពេល។ អំឡុងពេលពពោះ ប្រើថ្នាំពេទ្យ ប៉ះពាល់ដល់ម៉ាក់ៗ និងគភ៌អត់? ព្រោះអំឡុងពេលពពោះរឿងផឹកថ្នាំ គឺចៀសមិនផុតទេ ដោយសារតែបញ្ហាសុខភាពមួយចំនួន និងបម្រែបម្រួលអ័រម៉ូន ក៏ដូចជាការប្រែប្រួលក្នុងរាងកាយជាដើម។
ស្រីៗកំពុងពពោះ ប្រើថ្នាំពេទ្យ ប៉ះពាល់កូនក្នុងផ្ទៃអត់?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
“Hello គ្រូពេទ្យ’ នឹងស្រាយចម្ងល់គ្នាយើង ពីថ្នាំណាមានសុវត្ថិភាពអំឡុងពេលពពោះ និងថ្នាំគ្មានសុវត្ថិភាព ដើម្បីការពារពីគ្រោះថ្នាក់ពេលមានផ្ទៃពោះ ដូចជា រលូត កូនស្លាប់ក្នុងផ្ទៃ ឬកើតមកស្លាប់ (Stillbirth) និងផលប៉ះពាល់លើកូនពីកំណើត ជាដើម។
១- មានថ្នាំពេទ្យមានសុវត្ថិភាពទាំងស្រុងចំពោះស្រីៗពពោះដែរទេ?
ជាការពិត គ្មានថ្នាំពេទ្យណាមានសុវត្ថិភាព ១០០% ចំពោះស្រីៗមានផ្ទៃពោះនោះទេ ទោះជាថ្នាំមានវេជ្ជបញ្ជា មិនត្រូវការវេជ្ជបញ្ជា ថ្នាំបំប៉ន ឬថ្នាំបុរាណក៏ដោយ។ ជារឿងចាំបាច់សម្រាប់ស្ត្រីពពោះ ត្រូវពិគ្រោះជាមួយគ្រូពេទ្យ បើចង់ប្រើថ្នាំពេទ្យប្រភេទថ្មីណាមួយ ឬផ្លាស់ប្ដូរថ្នាំយើងកំពុងប្រើ។ យើងត្រូវប្រើថ្នាំតាមកម្រិតណែនាំពីគ្រូពេទ្យ ដើម្បីចៀសវាងពីការភ្លេចប្រើថ្នាំ ឬប្រើថ្នាំលើសកម្រិត។
២- ថ្នាំទូទៅមានសុវត្ថិភាពចំពោះស្ត្រីមានផ្ទៃពោះ
ថ្នាំទូទៅមានសុវត្ថិភាពចំពោះស្រីៗកំពុងពពោះ គឺសំដៅលើថ្នាំមានកម្រិតគ្រោះថ្នាក់ទាបបំផុត ហើយត្រូវប្រើតាមកម្រិតណែនាំ និងស្ថានភាពសុខភាពដែលត្រូវការ ខណៈថ្នាំទាំងនោះរួមមាន៖
– ថ្នាំប៉ារ៉ាសេតាមុល (Acetaminophen) ប្រើដើម្បីព្យាបាលគ្រុនក្ដៅ ផ្ដាសាយ ឈឺចាប់ ឈឺក្បាល។ មិនត្រូវប្រើថ្នាំនេះ ច្រើនជាង ៣ ថ្ងៃជាប់គ្នា ដើម្បីបន្ថយបញ្ហាគ្រុនក្ដៅ និងច្រើនជាង ១០ ថ្ងៃជាប់គ្នា ដើម្បីបន្ថយការឈឺចាប់នោះទេ។
– ថ្នាំប្រឆាំងអាស៊ីដក្រពះ (Antacids) និងថ្នាំ Simethicone ប្រើដើម្បីព្យាបាលបញ្ហាក្រហាយទ្រូងដោយសារអាស៊ីដក្រពះ (Heartburn) និងបញ្ហាក្រពះ ដូចជា ឈឺពោះ និងភើជូរ។
– ថ្នាំ Psyllium ថ្នាំ Polycarbophil (Equalactin, Mitrolan) ជាពពួកថ្នាំជាតិសរសៃបន្ទន់លាមក។
– ថ្នាំ Dextromethorphan ព្យាបាលក្អក ។
– ថ្នាំ Guaifenesin ប្រើដើម្បីកាត់ស្លេស្ម (Expectorant- ថ្នាំជួយធ្វើឲ្យបញ្ចេញស្លេស្មពីប្រព័ន្ធដង្ហើម)។ ទោះជាយ៉ាងនេះក្ដី គ្រូពេទ្យច្រើនណែនាំឲ្យស្ត្រីមានផ្ទៃពោះចៀសវាងប្រើថ្នាំនេះនៅត្រីមាសទី៣ នៃការពពោះ។
– ថ្នាំក្រែមលាបឫសដូងបាត (Hemorrhoid creams )។
– ថ្នាំងងុយគេង (Sleep aids ) ត្រូវបានណែនាំឲ្យប្រើក្នុងរយៈពេលខ្លីប៉ុណ្ណោះ។
– ថ្នាំបំប៉ន (Nutrient supplements) មានអាស៊ីដហ្វូលីក ស្រីៗពពោះ ត្រូវបានណែនាំញ៉ាំឲ្យបានច្រើន ដើម្បីការពារផលប៉ះពាល់ចំពោះគភ៌ ដូចជា អវយវៈមិនគ្រប់លក្ខណៈពីកំណើត (Birth defects) ប៉ុន្តែម៉ាក់ៗគួរចៀសវាង ញ៉ាំវីតាមីន A ច្រើនហួសហេតុ ព្រោះអាចធ្វើឲ្យពុលគភ៌បាន។
អត្ថបទពាក់ព័ន្ធ៖
៣- ថ្នាំពេទ្យមានគ្រោះថ្នាក់ចំពោះស្រីៗពពោះ
ថ្នាំពេទ្យមួយចំនួនមានគ្រោះថ្នាក់ គួរចៀសវាងប្រើអំឡុងពេលមានផ្ទៃពោះ ដោយសារតែមានភស្ដុតាងជាក់លាក់ពីគ្រោះថ្នាក់កើតឡើងចំពោះស្រីៗប្រើថ្នាំទាំងនេះ ដូចជា៖
– ថ្នាំ Aspirin ថ្នាំ Ibuprofen និង ថ្នាំ Naproxen ប្រើដើម្បីព្យាបាលគ្រុនក្ដៅ ផ្ដាសាយ ឈឺក្បាល និងគ្រុន។ ប្រើថ្នាំ Acetaminophen (Tylenol) អាចមានប្រសិទ្ធភាពជំនួសថ្នាំទាំងនេះបាន។
– ថ្នាំ Isotretinoin សម្រាប់ព្យាបាលមុន។
– ថ្នាំ Thalidomide ប្រើដើម្បីព្យាបាលជំងឺមហារីក Multiple Myloma (ជំងឺមហារីកម្យ៉ាងកើតឡើងចំពោះកោសិកាឈាមសមួយប្រភេទហៅថា Plasma B Cell) និងជំងឺស្បែកមួយចំនួន។
– ពពួកថ្នាំ Angiotensin-converting enzyme (ACE) inhibitors ប្រើដើម្បីព្យាបាលបញ្ហាខ្សោយបេះដូងពីកំណើត និងជំងឺលើសឈាម។ ថ្នាំទាំងនេះអាចប្រើនៅត្រីមាសទី១ ប៉ុណ្ណោះ និងមិនត្រូវប្រើនៅត្រីមាសទី២ និងទី៣ នោះទេ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។
Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម