គ្រប់គ្នាដឹងរួចមកហើយ ការញ៉ាំអាហារប្រៃច្រើននឹងបង្កផលមិនល្អដល់សុខភាព។ បញ្ហាទាំងនោះគឺ នាំឱ្យយើងកើតមានបញ្ហាទាក់ទងនិងសម្ពាធឈាម ជំងឺបេះដូង និងជំងឺដាច់សរសៃឈាមក្នុងខួរក្បាលដែលជារឿងមួយគួរគប្បីយកចិត្តទុកដាក់។ ក្នុងការណែនាំពីអ្នកជំនាញនៃវិទ្យាស្ថានជាតិបង្ការជំងឺរ៉ាំរៃ និងលើកកម្ពស់សុខភាពសហរដ្ឋអាមេរិក បានលើកឡើងជារួមថា មនុស្សពេញវ័យដែលមានសុខភាពល្អ អាចមានរបបជាតិប្រៃ (ជាតិសូដ្យូម) មិនគួរលើសពី ២៣០០មិល្លីក្រាម ឬត្រឹមតែ ១៥០០មិល្លីក្រាមប៉ុណ្ណោះសម្រាប់១ថ្ងៃ។ យ៉ាងណាមិញ អ្នកជំនាញទាំងនោះក៏បានបង្ហាញពីចំណុចខ្លះ ដែលជួយឱ្យយើងចៀសវាងទទួលជាតិប្រៃច្រើនក្នុងរាងកាយ ដែលមានដូចជា៖
១. ជ្រើសយកប្រភេទបន្លែផ្លែឈើដាំតាមធម្មជាតិ
ពពួកអាហារកំប៉ុង អាហារកញ្ចប់ភាគច្រើនមានកម្រិតជាតិអំបិល(សូដ្យូម)តិច ឬច្រើនតាមប្រភេទអាហារទាំងនោះ ដូច្នេះការជ្រើសជម្រើសទិញបន្លែ ផ្លែឈើដាំតាមធម្មជាតិ មកចម្អិន ឬញ៉ាំ នឹងជួយបន្ថយហានិភ័យពីជាតិប្រៃបានខ្លះ។ ម្យ៉ាងការជ្រើសយកពពួកបន្លែ ផ្លែឈើ ធម្មជាតិតាមរដូវស្រស់ៗ ពុំមែនជាអាហារពពួកវេចខ្ចប់យូរ គឺជាជម្រើសប្រសើរផងដែរ។
២. ប្តូរទម្លាប់បន្ថែមអំបិល ឬជាតិប្រៃលើម្ហូប
ជួនកាលយើងញ៉ាំសាច់ប្រៃ តែថែមទឹកស៊ីអីវ ឬរោយអំបិលបន្ថែម ទម្លាប់នេះអាចផ្លាស់ប្តូរបាន ដោយផ្តើមពីទម្លាប់មិនបន្ថែមបន្តិចម្តងៗ ជាឧទាហរណ៍ បើយើងមានទម្លាប់មានកំប៉ុង ឬកែវអំបិលនៅក្បែរដៃ ឬតុអាហារ យើងអាចយករបស់ទាំងនោះចេញ ឬទុកក្នុងទូផ្ទះបាយដោយឡែក ដើម្បីបំបាត់ទម្លាប់បន្ថែមអំបិលក្នុងអាហារយើងញ៉ាំ។
អត្ថបទពាក់ព័ន្ធ៖
៣. មើលស្លាកកម្រិតសូដ្យូមលើផលិតផលអាហារ
ករណីមួយចំនួន ដែលយើងពុំមានពេលវេលាគ្រប់គ្រាន់ក្នុងការចម្អិនអាហារខ្លួនឯង និងត្រូវញ៉ាំផលិតផលអាហារស្រាប់ៗ គ្នាយើងក៏នៅតែអាចមានវិធីបញ្ជៀសរបបអាហារមិនឱ្យមានជាតិប្រៃ នោះគឺការចេះសង្កេតមើលស្លាកកម្រិតសូដ្យូមលើប្រអប់ ឬកញ្ចប់អាហារ។ ដូចនេះ យើងអាចថ្លឹងថ្លែង រើសរបបអាហារមួយពេល ឬពីរពេល ដោយមិនគួរលើសពីកម្រិតដូចបានបង្ហាញខាងលើ។
៤. បន្ថយគ្រឿងបន្ថែមរសជាតិប្រៃដែលមិនចាំបាច់
គ្រឿងទាំងនោះសម្តៅទៅលើ ទឹកស៊ីអីវ ដុំម្សៅស៊ុប ឬគ្រឿងទឹកជ្រលក់បន្ថែមរសជាតិសំបូរជាតិប្រៃណាដែលយើងគិតថាពុំចាំបាច់ ហើយអាចកាត់បន្ថយបានសម្រាប់សុខភាព។ បន្ថែមពីនោះ ការបន្ថយការញ៉ាំអាហារនៅខាងក្រៅ មកចម្អិនអាហារដោយវិធីបន្ថយជាតិអំបិល(សូដ្យូម)ដោយខ្លួនឯង ក៏ជាកត្តាចូលរួមចំណែកបន្ថយពីហានិភ័យខាងលើនោះផងដែរ៕