គ្នាយើងអាចធ្លាប់ឆ្ងល់ថា អ្នកខ្លះអាយុច្រើន តែសម្រស់នៅតែចាំ មិនចាស់តាមវ័យ ហើយអ្នកខ្លះទៀតដូចតារា នេះក៏ព្រោះកត្តារួមផ្សំជាច្រើន មានទាំងកត្តាពីធម្មជាតិ និងគន្លឹះថែរក្សាសម្ផស្សមួយចំនួន។

ជាមួយគ្នានេះ វេបសាយ Bright Side បានដកស្រង់គន្លឹះរក្សាសម្រស់មួយចំនួនពីអ្នកជំនាញ រក្សាសម្ផស្សផ្ទាល់ខ្លួនរបស់តារាល្បីៗជាច្រើន លើពិភពលោកមក ដើម្បីជាការចែករំលែក សម្រាប់អ្នកស្រឡាញ់ និងថែរក្សាសម្ផស្សឲ្យស្អាត ៖

១. អត្ថប្រយោជន៍ឡេការពារកម្តៅថ្ងៃ

អ្នកស្រី Mamie McDonald អ្នកជំនាញរក្សាសម្ផស្សផ្ទាល់ខ្លួន របស់តារាចម្រៀងល្បីអាមេរិក Madonna បានឲ្យដឹងថា ស្បែកស្រស់ស្អាត និងសុខភាពល្អ គឺមកពីទម្លាប់ប្រើឡេការពារស្បែកពីកម្តៅព្រះអាទិត្យ មួយភាគធំ។ ស្របជាមួយទម្លាប់ប្រើប្រាស់ល្អបែបនេះហើយ លោកវេជ្ជបណ្ឌិត Lancer ដែលជាអ្នកជំនាញថែសម្ផស្សសម្រាប់តារាផងនោះ បានណែនាំ ឲ្យប្រើឡេការពារពន្លឺព្រះអាទិត្យដែលមានកម្រិតការពារពន្លឺព្រះអាទិត្យ SPF (Sun Protection Factor) មិនតិចជាងកម្រិត៣០ ដែលមានបង្ហាញលើ សំបកផលិតផល។

២. ថែរក្សាផ្នែកត្រង់ក របស់អ្នក

ក ជាផ្នែកសំខាន់មួយនៃសម្ផស្ស ពិសេសសម្រាប់សុភាពនារី។ អ្នកជំនាញបាននិយាយថា ជារឿងសំខាន់ដែលត្រូវថែស្បែកត្រង់ផ្នែកក ដូចជាផលិតផលលាបឲ្យសស្អាត ព្រោះថា វាជួយលើកសម្រស់ និងមើលទៅក្មេងជាងវ័យ។

៣. ដុសស្បែក នឹងទឹកកក

លោកវេជ្ជបណ្ឌិតថែរក្សាសម្ផស្ស ប្រចាំនៅទីក្រុង Santa Monica រដ្ឋកាលីហ្វ័រញ៉ា សហរដ្ឋអាមេរិក បានណែនាំថា ការដុសទឹកកកលើស្បែកមុខ ត្រឹមតែពីរ-បីវិនាទី នឹងសម្អាតជាតិស្រអាប់ចេញពីស្បែក បានយ៉ាងមានប្រសិទ្ធិភាព។ ហើយវិធីសាមញ្ញនេះ ធ្វើឲ្យស្បែកអ្នកចាប់ភ្លឺរលោងស្អាតបាន។

៤. រក្សាទុកផលិតផលរក្សាសម្ផស្សឲ្យបានត្រឹមត្រូវ

លោកវេជ្ជបណ្ឌិតជំនាញផ្នែកសម្ផស្ស Debra Jaliman បានលើកឡើងថា ការចេះរក្សាទុកផលិតផលរក្សាស្បែកឲ្យបានល្អ ជាចំណែកសំខាន់មួយនៃការថែសម្ផស្សផងដែរ។ លោកបានណែនាំថា ផលិតផលណាដែលត្រូវប្រើយូរៗម្តង គប្បីទុកដាក់នៅក្នុងទូដែលមានភាពត្រជាក់ ទើបមិនធ្វើឲ្យផលិតផលនោះឆាប់ខូច។

៥. សម្អាតវត្ថុដែលយើងត្រូវប៉ះ និងស្បែកយើងឲ្យស្អាត

រាប់តាំងពី ទូរសព្ទពេលនិយាយកៀកនឹងស្បែកមុខ ស្រោមពូក ស្រោមខ្នើយ សុទ្ធសឹងតែវត្ថុប្រើប្រាស់ ដែលចាំបាច់ប៉ះពាល់នឹងស្បែកយើង ដូចនេះ គប្បីអនាម័យ សម្អាតរបស់ទាំងនោះឲ្យបានស្អាតៗ។

៦. ម៉ាស្សាមុខ ជួយកម្ចាត់ប្រឡង់ខ្មៅជុំវិញភ្នែក

អ្នកជំនាញបានលើកឡើងថា ការម៉ាស្សាមុខ ក៏ជាវិធីមួយ ធ្វើឲ្យសម្រស់នៅថិតថេរស្អាតបានផងដែរ ដោយវិធីនេះ អាចជួយបំបាត់ស្នាមជាំខ្មៅ លើប្រឡង់ភ្នែកបានទៀតផង តែត្រូវប្រាកដថា អ្នកទៅកន្លែងម៉ាស្សាដែលមានវិជ្ជាជីវៈត្រឹមត្រូវ។

អត្ថបទពាក់ព័ន្ធ៖

៧. គួរដោះអាវក្នុង(អាវទ្រនាប់) ចេញ ពេលចូលគេង

សម្រាប់សុភាពនារី អ្នកអាចនឹងព្យាយាមបង្កើតទម្លាប់នេះ ពេលដឹងពីអត្ថប្រយោជន៍របស់វា។ អ្នកជំនាញបានលើកឡើងថា ការពាក់អាវទ្រនាប់ ពិសេសពេលគេង អាចបង្កជាបញ្ហារាំងស្ទះដល់លំហូរឈាមរត់ ជាហេតុអាចបង្កជាបញ្ហាសុខភាពផ្សេងៗ។ ហើយមួយវិញទៀត ចំពោះអាវទ្រនាប់ដែលតឹងរឹប នឹងអាចបង្កឲ្យស្បែកក្រហាយ ជាំខ្មៅ ចេញជាស្នាមបានផងដែរ ដូចនេះជាដំណោះស្រាយ គប្បីដោះវាចេញ ពេលចូលគេង៕

ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

តិចនិកមិនសូវមានអ្នកដឹង ថែសម្ផស្សស្អាតដូចតារា តាមអ្នកជំនាញបង្ហាញ