បន្ទាប់ធ្វើការហត់ពេញមួយថ្ងៃ គ្នាយើងច្បាស់ជាចំណាយពេលរំសាយអារម្មណ៍តានតឹង តាមចំណង់ចំណូលចិត្តរៀងៗខ្លួន។ ក្នុងវិធីសាស្ត្ររំសាយអារម្មណ៍ហត់នឿយ វិធីពេញនិយមមួយនាពេលបច្ចុប្បន្ន ពិសេសស្រីៗ ចូលចិត្តដេកត្រាំទឹកក្តៅឧណ្ហៗ ជាមួយសាប៊ូក្លិនក្រអូប គ្រាន់តែគិត អារម្មណ៍ក៏ស្រស់ស្រាយភ្លាមដែរ។ ចំពោះគ្នាយើងចូលចិត្តវិធីរំសាយអារម្មណ៍បែបនេះ “Hello គ្រូពេទ្យ’ ចង់ណែនាំថែមបន្តិចទៀត ជាមួយគ្រឿងផ្សំមួយចំនួន ធានាថាអារម្មណ៍កាន់តែអស្ចារ្យជាងមុន សុខភាព និងស្បែក ក៏ល្អខ្លាំងដែរ។

១- នំ Oatmeal

ពេលឮ “Hello គ្រូពេទ្យ’ ប្រាប់ថា យកនំ Oatmeal ប្រើជាគ្រឿងផ្សំក្នុងអាងទឹក គ្នាយើងច្បាស់ជាចម្លែកចិត្តមិនខាន! ប៉ុន្តែត្រូវដឹងថា នំប្រភេទនេះ មានផ្ទុកនូវខ្លាញ់ល្អដល់សុខភាព អាចធ្វើឲ្យស្បែកមានភាពរលោង និងជួយយស្បែកមិនមានកន្ទួល រលាក ឬស្ងួត។ នំ Oatmeal ក៏មានតួនាទីសម្អាតរន្ធញើសផងដែរ ខណៈប្រូតេអ៊ីនក្នុងនំ អាចធ្វើឲ្យស្បែកមានសំណើមបាន។

– របៀបប្រើ៖ ដាក់ Oatmeal ឆៅ ១-២ ពែងក្នុងចាន បន្ទាប់មកចាក់ចូលទៅក្នុងទឹកក្តៅ រួចលាយទឹកឃ្មុំចូល។ ទុកចោលរយៈពេល ៥នាទី ដាក់ចូលទៅក្នុងអាងងូតទឹក។

២- ទឹកឃ្មុំ

ទឹកឃ្មុំ ត្រូវគេស្គាល់ថា មានសមត្ថភាពក្នុងការព្យាបាលជំងឺជាច្រើន។ ដូចគ្នានេះដែរ ទឹកឃ្មុំមានផ្ទុកនូវបាក់តេរីល្អ ជួយការពារដល់ការឆ្លង និងព្យាបាលរបួសតូចៗនៅលើស្បែក ហើយទឹកឃ្មុំ ក៏មានសារធាតុប្រឆាំងអុកស៊ីតកម្មធម្មជាតិ អាចជួយពង្រឹងប្រព័ន្ធភាពស៊ាំ និងការពារភាពចាស់បាន។

– របៀបប្រើ៖ ដាក់ទឹកឃ្មុំ ២ស្លាបព្រាបាយ បង្ហូរតាមទឹកហូរពីក្បាលរ៉ូប៊ីណេ ចូលក្នុងអាងងូតទឹក រួចត្រាំខ្លួនក្នុងអាងរយៈពេល ១៥នាទី។ បន្ទាប់ពី ១៥នាទី ត្រូវបន្ថែមម្សៅសូដា ហើយជូតខាត់ស្បែកថ្នមៗ។ ធ្វើបែបនេះ គ្នាយើងអាចកម្ចាត់កោសិកាងាប់ៗ ដែលជាប់នៅលើស្បែក ដោយមិនបង្កឲ្យស្បែក មានការរលាកអ្វីឡើយ។

៣- ផ្កាឡាវេនឌឺ

ផ្កាឡាវេនឌឺ មានភាពអស្ចារ្យ អាចធ្វើឲ្យមានភាពធូរស្រាលនៅពេលយើងប្រើជាគ្រឿងផ្សំក្នុងអាងត្រាំទឹក។ ផ្កាប្រភេទនេះ អាចជួយឲ្យយើងមានអារម្មណ៍ស្ងប់ស្ងាត់ ធូរស្បើយ និងបំបាត់ភាពតានតឹង។ លើសពីនេះទៀតវាអាចជួយសម្អាត បន្សាបជាតិពុល សម្រាប់ព្យាបាលបញ្ហាមុន រមាស់ និងរលាក។ យើងអាចប្រើក្នុងទម្រង់ជាប្រេងជំនួយ និងក្លិនផ្កា តាមចំណង់ចំណូលចិត្ត។

– របៀបប្រើ៖ លាយប្រេងផ្កាឡាវេនឌឺ ៦-៨ តំណក់ទៅក្នុងទឹកដោះគោ និងអំបិល ទុកឲ្យវារំលាយទាំងស្រុង បន្ទាប់មកដាក់ទៅក្នុងអាងងូតទឹក។

៤- ប្រេងចម្រាញ់ពីធម្មជាតិ (Essential oil)

មានប្រេងជំនួយសំខាន់ៗជាច្រើន អាចបន្ថែមក្នុងអាងងូតទឹក ដើម្បីអាចទទួលបានបទពិសោធន៍ពីការងូតទឹកដ៏អស្ចារ្យ ដូចជា ប្រេងជីអង្កាម (Peppermint) ប្រេងផ្កា Rosemary ឬប្រេងចម្រាញ់ពីដើមប្រេងខ្យល់ (Eucalyptus) ជាដើម។ ដំបូងប្រេងទាំងនេះ អាចបំបាត់ភាពតានតឹង បន្ទាប់មកធ្វើឲ្យយើងមានអារម្មណ៍ល្អឡើងវិញ។ ប្រេងធម្មជាតិនីមួយៗ មានសមត្ថភាពខុសៗគ្នា ជាក់ស្តែង ប្រេងជីអង្កាម (Peppermint) ជួយកាត់បន្ថយការរលាក ឯប្រេងខ្យល់ (Eucalyptus) ជួយបំបាត់អាការៈឈឺសន្លាក់ និងជួយឲ្យជាសះស្បើយវិញបាន។

– របៀបប្រើ៖ វិធីប្រើប្រេងទាំងនេះ ដូចគ្នានឹងវិធីប្រើប្រេងផ្កាឡាវេនឌឺដែរ។ ត្រូវចាំថា យើងបានជ្រើសរើស យកប្រេងណា មិនបណ្តាលឲ្យយើងមានប្រតិកម្ម។

អត្ថបទពាក់ព័ន្ធ៖

ងូត ឬដេកត្រាំទឹកក្តៅពេលពពោះ ប៉ះពាល់កូនក្នុងផ្ទៃ?
ងូតទឹកក្ដៅ ត្រាំទឹកក្ដៅ ឬស្ទីមយូរ អាចងាប់មេជីវិត?

៥- ប្រេងដូង

ប្រេងដូង មានប្រូតេអ៊ីន អាចជួយឲ្យស្បែកទន់ រលោង មានសំណើម និងមានសុខភាពល្អ ព្រោះមានផ្ទុកនូវវីតាមីន C អាចប្រឆាំងនឹងភាពចាស់បានផងដែរ។

– របៀបប្រើ៖ ប្រើសាប៊ូសម្អាតខ្លួនមានផ្ទុកជាតិប្រេងដូង ឬអាចលាយប្រេងដូង និងស្ករ ដើម្បីធ្វើជាម្សៅខាត់បាន។

៦- អំបិលក្រួស

អំបិលក្រួស សម្បូរទៅដោយជាតិម៉ាញ៉េស្យូម និងស៊ុលហ្វាត អាចធ្វើឲ្យស្បែកទន់ និងរលោង អាចជួយបន្ធូរដល់ការឈឺសាច់ដុំ និងបន្ថយភាពតានតឹងផងដែរ។

– របៀបប្រើ៖ ដាក់អំបិលក្រួស ១-២ ពែងចូលក្នុងទឹកក្តៅឧណ្ឌៗ ហើយកូររហូតទាល់តែរំលាយអស់ទាំងស្រុង។ ត្រាំខ្លួនយ៉ាងហោចណាស់ ១២ នាទី។ គួរធ្វើបែបនេះ ៣ ដង/សប្តាហ៍ ហើយអាចបន្ថែមប្រេងដូង ឬប្រេងអូលីវ ដើម្បីជួយឲ្យស្បែកមានសំណើម។

៧- ផ្កាកុលាប

ផ្កាកុលាប មានលក្ខណៈសម្បត្តិជួយប្រឆាំងការរលាក និងបាក់តេរី អាចធ្វើឲ្យស្បែកមានសំណើម និងស្រស់ថ្លាឡើងវិញ ដើម្បីកុំឲ្យមានមុន និងឡើងក្រហម។

– របៀបប្រើ៖ ងូតទឹកក្តៅឧណ្ឌៗ ដោយលាយជាមួយនឹងស្លឹកផ្កាកុលាបស្ងួត ប្រេងផ្កាកុលាប ម្សៅទឹកដោះគោ និងអំបិលក្រួស។

៨- ម្សៅសូដា

ម្សៅសូដា អាចប្រើជាគ្រឿងផ្សំធម្មជាតិ សម្រាប់ខាត់ស្បែក ដើម្បីជួយឲ្យស្បែកទន់ និងរលោង។

– របៀបប្រើ៖ ដាក់សូដា ៤-៥ ស្លាបព្រាដាក់ក្នុងអាងងូតទឹក ទុកឲ្យរលាយ និងត្រាំប្រហែល ១០-២០ នាទី។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ដេកត្រាំទឹកក្តៅឧណ្ហៗជាមួយគ្រឿងផ្សំទាំងនេះ ជួយឲ្យអារម្មណ៍ល្អ និងស្បែកស្រស់ថ្លា