មុនដល់ពេលសម្រាលកូនតាមធម្មជាតិ ស្ត្រីពពោះគួរត្រៀមខ្លួនអីខ្លះ?

ចាប់ពីមានផ្ទៃពោះ រហូតដល់ថ្ងៃត្រូវសម្រាល ទោះឆ្លងកាត់រឿងពិបាកច្រើនយ៉ាងណា ក៏ស្រីៗជាម្តាយ អាចស៊ូទ្រាំជម្នះរហូតទាល់តែកូនជាទីស្រលាញ់អាចចេញមកមើលពន្លឺព្រះអាទិត្យដោយសុវត្ថិភាព ក៏ជាពេលវេលាសប្បាយបំផុតសម្រាប់គ្នាយើងមួយចំនួនធំដូចគ្នា។ យ៉ាងណា អំឡុងពេល ៩ ខែនេះ ត្រូវសម្រេចចិត្តឲ្យហើយ សម្រាលតាមធម្មជាតិ ឬដោយវះកាត់ ហើយបើសម្រេចចិត្តសម្រាលតាមធម្មជាត គួរត្រៀមខ្លួនទុកជាមុន អ្វីគ្នាយើងគួរធ្វើមានដូចជា៖

១- ស្វែងយល់ពីដំណាក់កាលសម្រាលកូន

រឿងសម្រាលចំពោះស្រីៗ មិនដូចគ្នានោះទេ យើងក៏មិនអាចទាយថា ត្រូវចំណាយពេលយូរ ឬឆាប់ ឬយ៉ាងណានោះដែរ។ ទោះមិនដូចគ្នាក៏ពិតមែន ប៉ុន្តែរឿងសម្រាលកូន គ្នាយើងទាំងអស់ ចៀសមិនផុតដំណាក់កាលទាំង ៣ នេះដូចគ្នា។

– ដំណាក់កាលទី១៖ សាច់ដុំស្បូនចាប់ផ្តើមកន្ត្រាក់ ហើយរលាវិញ ជាហេតុធ្វើឲ្យមាត់ស្បូនរួញខ្លី និងបើក ដើម្បីឲ្យទារកអាចចេញមកក្រៅតាមទ្វារមាសបាន។ ដំណាក់កាលនេះ អាចមានរយៈពេល ២-៣ ម៉ោង ទៅដល់ ២-៣ ថ្ងៃឯណោះ។ ការកន្ត្រាក់សាច់ដុំស្បូន គឺមានចង្វាក់ទៀងទាត់ ហើយកន្រ្តាក់ជាប់ប្រហែលមួយនាទីឯណោះ។

– ដំណាក់កាលទី២៖ សាច់ស្បូនបើកអស់ហើយ ក៏ជាពេលវេលាគ្នាយើងត្រូវប្រឹងរុញកូនចេញពីស្បូនមកក្រៅ។

– ដំណាក់កាលទី៣៖ ពេលទារកសម្រាលចេញមកក្រៅរួចហើយ ស្បូននៅតែកន្រ្តាក់ទៀត ដើម្បីទម្លាក់សុកចេញមកក្រៅដែរ។

២- ត្រៀមខ្លួនសម្រាប់ការឈឺចាប់

ដើម្បីកុំឲ្យពេលសម្រាលឈឺចាប់ខ្លាំង យើងអាចចាប់ផ្តើមអនុវត្តតាមចំណូចទាំងនេះ អំឡុងពេលកំពុងពពោះ ដូចជា៖

– ម៉ាស្សាតំបន់ប្រដាប់ភេទ៖ ម៉ាស្សាថ្មមៗ និងយឺតៗ ទៅលើស្បែក ជាលិកានៅជុំវិញប្រដាប់ភេទ និងទ្វារលាមក នៅអំឡុង ៤ សប្តាហ៍ចុងក្រោយនៃការពពោះ (ឬចាប់ពីសប្តាហ៍ទី ៣៤ ទៅ)។ មានការសិក្សាជាច្រើនបានបង្ហាញថា ការម៉ាស្សាតំបន់ប្រដាប់ភេទ កាត់បន្ថយការដាច់រហែកទ្វារមាសពេលសម្រាលបានមួយចំនួនធំ។

– លំហាត់ប្រាណអាងត្រគាក (Kegel)៖ ពេលសម្រាល សាច់ដុំអាងត្រគាកធ្វើការយ៉ាងខ្លាំង ដើម្បីរុញទារកចេញពីក្នុងផ្ទៃ។ ដូចនេះ លំហាត់ប្រាណអាងត្រគាក នឹងជួយឲ្យការសម្រាលមិនសូវពិបាក។

៣- សម្អាតរោមលើថ្ងាស

ពេលមានផ្ទៃពោះ ម៉ាក់ៗភាគច្រើនតែងបារម្ភពីការកោររោមលើថ្ងាស (លើប្រដាប់ភេទ) ជាពិសេសការពពោះលើកដំបូង។ ពេលលើថ្ងាសស្អាត មិនរញ៉េរញ៉ៃ វានឹងផ្តល់ភាពងាយស្រួលដល់យើង និងគ្រូពេទ្យក្នុងការពិនិត្យ និងធ្វើទម្រង់ការផ្សេងៗ ក៏កាត់បន្ថយការបង្ករោគមួយចំនួន អាចឆ្លងពីម្តាយទៅកូននៅពេលសម្រាលទៀតផង។ ហេតុនេះហើយ មន្ទីរពេទ្យមួយចំនួន ណែនាំឲ្យស្រីៗពពោះ កោរសម្អាតរោមលើថ្ងាស មុនពេលចូលសម្រាលដើម្បីសុវត្ថិភាព និងអនាម័យ។

អត្ថបទពាក់ព័ន្ធ៖

បែកទឹកភ្លោះមុនពេលកំណត់ គ្រោះថ្នាក់អត់? ត្រូវធ្វើម៉េច?
សម្រាលកូនដោយវះកាត់ ម៉ាក់ៗមិនព្រួយរឿងឈឺពោះមែន តែជួបបញ្ហាទាំងនេះ

៤- ចូលរួមថ្នាក់ត្រៀមសម្រាលកូន

ការចូលរួមនេះ គឺដើម្បីឲ្យដឹងពីព័ត៌មានផ្សេងៗពាក់ព័ន្ធរឿងសម្រាលកូន ដើម្បីធ្វើការសម្រេច និងបន្ថយការភ័យខ្លាចរបស់ម៉ាក់ៗ។ ខាងក្រោមនេះជាចំណុចចគោលៗ នឹងបង្ហាញនៅក្នុងថ្នាក់៖

– សញ្ញាឈឺពោះសម្រាល

– ដំណើរការធម្មតានៃការឈឺពោះសម្រាល និងការសម្រាល

– វិធីសាស្ត្រដោះស្រាយអាការៈឈឺចាប់

– ប្តី អាចជួយអ្វីខ្លះពេលឈឺពោះសម្រាល

– ពេលណាត្រូវទៅរកគ្រូពេទ្យ ឬឆ្មប។

មិនថាគ្នាយើងសម្រេចចិត្តសម្រាលនៅមន្ទីរពេទ្យរដ្ឋ ឬគ្លីនិកឯកជននោះទេ ចំណុចទាំងនេះនឹងជួយឲ្យយើងបានត្រៀមខ្លួន ក្នុងការសម្រាលដោយធម្មជាតិ កាត់បន្ថយបានផលវិបាក និងការភ័យខ្លាចច្រើន។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

Editor HK

អត្ថបទដោយ Chamnan Amrith · កែ 03/02/2020

មុនដល់ពេលសម្រាលកូនតាម​ធម្មជាតិ ស្ត្រីពពោះគួរ​ត្រៀមខ្លួនអី​ខ្លះ?​

មុនដល់ពេលសម្រាលកូនតាមធម្មជាតិ ស្ត្រីពពោះគួរត្រៀមខ្លួនអីខ្លះ?