ប៉ាម៉ាក់សម័យនេះមមាញឹកខ្លាំងនឹងការងារខាងក្រៅ តែទោះជាយ៉ាងណា បើមានពេលក្បែរកូន យើងមិនគួរបណ្ដែតបណ្ដោយឲ្យវារំលងទៅឥតប្រយោជន៍នោះឡើយ។ ព្រោះការបង្ហាត់បង្រៀនកូនតាំងពីតូចក្រូចឆ្មារ ធ្វើឲ្យកូនចេះ និងយល់ដឹងបានច្រើន នេះបើតាមការឲ្យដឹងពីអ្នកគ្រូ សន សុចិន្តា បង្រៀននៅសាលាឯកជនថ្នាក់មតេ្តយ្យ។
១- បង្រៀនឲ្យស្រលាញ់សៀវភៅ
នៅពេលកូនតូចចេះចាប់កាន់របស់លេង អ្វីដែលគួរយកទៅឲ្យលេង គឺសៀវភៅ ព្រោះកាលណាក្មេងមានទម្លាប់កាន់ ហើយយើងជាម៉ាក់ប៉ាក៏កាន់នោះកូនប្រាកដជាស្រលាញ់ដូចគ្នាមិនខាន។ ត្រូវទិញសៀវភៅមានរូបសត្វ មានអក្សរ មានលេខ ដើម្បីអាចឲ្យក្មេងទាក់ទាញចំណាប់អារម្មណ៍ និងងាយចំណាំបានខ្លះៗ។ កាលណាក្មេងចេះស្រលាញ់សៀវភៅ នោះជំហានបង្រៀនសរសេរ និងអានពេលបន្ទាប់ គឺជាងាយស្រួលសម្រាប់យើង ហើយរឿងមិនគួរមួយទៀត គឺម្នាក់ៗខ្វល់តែជាមួយគ្រឿងអេឡិចត្រូនិក នោះកូនមិនងាយចេះអ្វីច្រើនដូចកូនគេដែលមិនមានរបស់អស់ទាំងនោះលេងទេ។
អត្ថបទពាក់ព័ន្ធ៖ ចង់ឲ្យកូនឆ្លាត ខួរក្បាលលូតលាស់ល្អ ម៉ាក់ប៉ាចាំបាច់ធ្វើរឿងទាំងនេះ
២- បង្រៀនអាន
ពេលនៅក្បែរកូន គួរតែឆ្លៀតទាញសៀវភៅផ្សេងៗមិនថាជាភាសាខ្មែរ ឬអង់គ្លេស ឬលេខឡើយ គួរតែយកមកអាន ហើយបង្រៀនឲ្យកូនតូចថាតាម។ ទោះជាមិនអាចនិយាយតាមបានទាំងអស់ ក៏កូនអាចចងចាំពាក្យមួយចំនួន ឬកត់សម្គាល់ថាពាក្យនោះមានន័យអ្វី ហើយពេលលើកក្រោយបើយើងសួរ ទោះមិននិយាយមិនចេញ តែអាចស្គាល់ និងចង្អុលប្រាប់បាន។
៣- បង្រៀនកូនឲ្យស្រលាញ់សុខភាព
កូនក្មេងប្រៀបដូចជាក្រដាសសស្អាត បើពីតូចយើងបង្រៀន និងប្រាប់ពីប្រភេទអាហារណាដែលមិនល្អ នោះធំគេនឹងចងចាំរហូត។ មិនត្រឹមតែអាហារនោះទេ ម៉ាក់ប៉ាគួរតែប្រាប់កូនថារបស់ណាគគ្រិច និងមានគ្រោះថ្នាក់ចៀសវាងលេង ឬប៉ះ យើងអាចសង្កេតមើលបាន កូនពិតជាចៀសរបស់អស់ទាំងនោះមែន។ បើយើងបង្រៀនកូនថារបស់ណាគគ្រិចហើយនោះ កូននឹងមិនលេង ឬប៉ះវាទាល់តែធំដឹងក្ដីតែម្ដង។
៤- បង្រៀនឲ្យចេះសម្អាត
កាលណាបង្រៀនកូនឲ្យស្រលាញ់សុខភាព នោះត្រូវរាប់បញ្ចូលទាំងការសម្អាត។ ហេតុផលពេលកូនស្អប់ខ្ពើមភាពគគ្រិច គឺត្រូវតែចេះសម្អាត បង្រៀនពីការសម្អាតកន្លែងគេងគេ របស់របរលេង និងជួយទុកដាក់របស់ខ្លះៗ ដែលនៅអារាត់អារាយពេញផ្ទះ។ មួយវិញទៀតគួរតែប្រាប់កូនឲ្យស្រលាញ់បរិស្ថានទាំងក្នុង ក្រៅផ្ទះ ភូមិឃុំរស់នៅ នោះទើបអាចរស់នៅបានដោយក្ដីសុខទាំងអស់គ្នាបាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
