កូនដែលទម្លាប់ស្លៀកខោទឹកនោម ពិបាកផ្ដាច់ណាស់ ហើយទោះធំក៏នៅតែចង់ស្លៀកបន្តទៀតដែរ ព្រោះស្រួលមិនស្រួលកូននោមដាក់ខោ ឬដាក់ពូកក៏មាន។ តែបើតាមអ្នកគ្រូពេទ្យផ្នែកឆ្មប សុំ សូរិយា បម្រើការនៅមន្ទីរពេទ្យបង្អែក ស្រុកខ្សាច់កណ្ដាល បានឲ្យដឹងថា ការស្លៀកខោទឹកនោមនេះ ក៏គួរតែបញ្ចប់ត្រឹមកូនអាយុ ៣ ឆ្នាំច្រើនបំផុត។
អ្នកគ្រូពេទ្យបានបន្តទៀតថា ការបណ្ដោយឲ្យកូននៅតែស្លៀករហូតដល់អាយុ ៦-៧ ឆ្នាំអាចធ្វើឲ្យកូនមិនដឹងពីទម្លាប់បត់ដៃបត់ ដោយខ្លួនឯង ហើយជុះតែក្នុងខោ។ ករណីបែបនេះអាចប៉ះពាល់ដល់ការយល់ដឹងពីការបន្ទោបង់នៅបង្គន់។ មួយវិញទៀតកូនដែលជុះដាក់តែក្នុងខោទឹកនោម ហើយមិនបានផ្លាស់ប្ដូរចេញលឿន អាចបណ្ដាលឲ្យរលាកដោយសារកាកសំណល់ទាំងនោះក្ដៅ ហើយផ្អាប់ទុកយូរពេក។
អត្ថបទពាក់ព័ន្ធ៖ កាន់តែទំនើប! ខោទឹកនោមអាអូន មានអ៊ីនធឺណិត ជួយម៉ាក់ៗបានមួយកម្រិតទៀត
គ្រូពេទ្យនៅខាងស្រុកខ្សាច់កណ្ដាលរូបនេះបានណែនាំបន្ថែមទៀត ឲ្យម៉ាក់ប៉ាទាំងអស់មិនគួរឲ្យកូនតូចស្លៀកខោទឹកនោម ២៤ ម៉ោង/ថ្ងៃឡើយ ព្រោះវាមិនល្អចំពោះក្រលៀនទាំងសងខាងរបស់កូនឡើយ ដោយអាចកកិតរហូតរលាក រោល និងមានស្នាមជាំទៀតផង។
វិធីជួយកាត់បន្ថយការប៉ះពាល់ខ្លះៗរបស់ខោទឹកនោម ពេលកូនមានអាយុ ៤-៥ ខែ ស្លៀកឲ្យតែយប់ ទៅបានហើយ ចំណែកពេលថ្ងៃមិនចាំបាច់ស្លៀកក៏បានដោយស្លៀកតែខោសាច់កំណាត់ធម្មតា ដើម្បីការពារកូនកុំឲ្យសត្វល្អិតទិច ឬខាំ។ នៅពេលកូននោម ឬជុះយើងគ្រាន់តែផ្លាស់ប្ដូរខោមួយទៀត ដើម្បីកុំឲ្យកូនស្លៀកខោប្រឡាក់ដដែលៗ។
វិធីនេះអាចជួយកាត់បន្ថយការចំណាយច្រើនលើខោទឹកនោម ហើយអាចជួយឲ្យឆាប់ចេះដឹងរឿងបន្ទោបង់ខ្លួនឯង។ មួយវិញទៀតពេលកូនតូចមិនសូវស្លៀកខោទឹកនោម ពួកគេក៏មិនសូវមានបញ្ហាប្រឈមមួយចំនួនទាក់ទងនឹងស្បែកក្រិន ខ្មៅ ជុំវិញក្រលៀននោះដែរ។
អត្ថបទពាក់ព័ន្ធ៖ កូនកើតឫសដូងបាត ប៉ាម៉ាក់ត្រូវធ្វើម៉េច?
[embed-health-tool-vaccination-tool]
