យើងទាំងអស់គ្នាសុទ្ធតែចូលចិត្តទឹកដោះគោ ហើយពេលខ្លះក៏មានអាលែកហ្ស៊ីកើតឡើងផងដែរ ពិសេសលើកុមារនិងទារក (២ទៅ៣%លើកុមារ)។ អាលែកហ្ស៊ីទឹកដោះគោលើកុមារ គឺបណ្ដាលមកពីប្រតិកម្មខ្លាំងជ្រុលរវាងប្រូតេអ៊ីន និងប្រព័ន្ធភាពស៊ាំរបស់កុមារ។ ដូចនេះគ្នាយើងគួរដឹងពីមូលហេតុដែលនាំឲ្យមានអាលែកហ្សីនេះ និងវិធីបង្ការកូនរបស់យើងដូចខាងក្រោម៖

១. ភាពខុសគ្នារវាងអាលែកហ្ស៊ីទឹកដោះគោ និងការមិនស៊ាំនឹងជាតិឡាក់តូស

មនុស្សភាគច្រើនគិតថាវាដូចគ្នា។ សូមកុំយល់ច្រឡំ។ អាលែកហ្ស៊ីទឹកដោះគោ គឺជាប្រតិកម្មរវាងប្រព័ន្ធភាពស៊ាំរបស់កុមារទៅនឹងប្រូតេអ៊ីនរបស់ទឹកដោះគោ។ នៅពេលពេលប្រូតេអ៊ីនទឹកដោះគោត្រូវបានញ៉ាំចូលទៅហើយ វានឹងបង្កើតជាប្រតិកម្មដែលលេចចេញជាកន្ទួលរមាស់ កន្ទាលត្រអាក ស្បែកឡើងក្រហម ហើមមុខ ពិបាកដកដង្ហើម ថប់ដង្ហើម និងបាត់ស្មារតីជាដើម។ ពេលខ្លះទៀតការអាលែកហ្ស៊ីនឹងចំណីអាហារបែបនេះអាចប៉ះពាល់ដល់ជីវិតទៀតផង។

ចំណែកភាពមិនស៊ាំនឹងជាតិឡាក់តូសរបស់ទឹកដោះគោវិញ គឺគ្មានទំនាក់ទំនងជាមួយប្រព័ន្ធភាពស៊ាំនោះទេ។ មនុស្សដែលមានបញ្ហានេះគឺដោយសារមានកង្វះអង់ស៊ីមដើម្បីបំបែកជាតិស្ករក្នុងទឹកដោះគោ។ រួចវានឹងមានសញ្ញាដូចជា វិលមុខ ឈឺសាច់ដុំ ហើមពោះ និងរាកជាដើម។ វិបត្តិនេះជាកត្តាធ្វើឲ្យមានផលរំខានប៉ុន្តែមិនបង្កគ្រោះថ្នាក់ធ្ងន់ធ្ងរនោះទេ។

រោគសញ្ញាអាលែកហ្ស៊ីទឹកដោះគោ

បន្ទាប់ពីញ៉ាំទឹកដោះគោហើយកូនអាចនឹងមានអាលែកហ្ស៊ីប្រសិនបើមានសញ្ញាដូចខាងក្រោមនេះ៖

កណ្តាស់
ពិបាកដកដង្ហើម
ក្អក
ស្អកសំឡេង
តឹងណែនបំពង់ខ្យល់
ឈឺពោះ
ក្អួត
រាក
ហូរទឹកភ្នែកព្រមទាំងមានហើមនិងរមាស់
មុខឡើងក្រហម
ចេញចំណុចក្រហមលើស្បែក
ហើម
សំពាធឈាមធ្លាក់ចុះ
ឈឺក្បាល និងអាចដល់សន្លប់ទៀតផង

ដបទឹកដោះគោ

២. តើគ្រូពេទ្យធ្វើរោគវិនិច្ឆ័យដូចម្ដេចក្នុងករណីអាលែកហ្ស៊ីនេះ?

ប៉ាម៉ាក់ត្រូវស្វែងរកគ្រូពេទ្យប្រសិនបើកូនអ្នកមានសញ្ញាដូចបានរៀបរាប់ខាងលើ។ គ្រូពេទ្យនឹងសាកសួរព័ត៌មានបន្ថែមទៀតពីកូនរបស់យើង។ បន្ទាប់ពីពិនិត្យរាងកាយរួចហើយអាចនឹងត្រូវធ្វើតេស្តលាមក និងឈាមផងដែរ។ ក្នុងករណីខ្លះអាចឈានដល់តេស្តស្បែកទៀតផង។ តេស្តស្បែក គឺគេធ្វើដោយជ្រលក់យកជាតិទឹកដោះគោដាក់លើស្បែកដើម្បីមើលប្រតិកម្មវា។ ប្រសិនបើមានអាលែកហ្ស៊ីពិតមែននោះ ស្បែកដែលធ្វើតេស្តនឹងមានការហើមប៉ោង។ កូនអាចនឹងចាំបាច់ត្រូវចាក់ថ្នាំអេពីនេហ្រ្វីនដើម្បីបន្ថយអាការអាលែកហ្សីនេះ។ ក្នុងពេលបំបៅដោះ បើដឹងថាទារកមានអាលែកហ្ស៊ីហើយ ម្ដាយគួរតែចៀសវាងញ៉ាំទឹកដោះគោ និងសារធាតុដែលមានជាតិទឹកដោះគោផ្សេងទៀតដែលអាចនាំឲ្យកុមារមានអាលែកហ្ស៊ីដែរ។

ទឹកដោះគោ គឺត្រូវបានគេចាត់ទុកថាជាអាហារដែលមានអាលែកហ្ស៊ីជាងគេសម្រាប់កុមារ។ ប្រសិនបើមានរោគសញ្ញាដូចជាមុខឡើងក្រហម រាក និងសញ្ញាអាលែកហ្ស៊ីផ្សេងទៀត ម៉ាក់ៗត្រូវបញ្ឈប់ការឲ្យបៅទឹកដោះគោ និងស្វែងរកគ្រូពេទ្យជាបន្ទាន់។ បើអូនៗមិនអាចញ៉ាំទឹកដោះគោបានទេសូមជៀសឲ្យឆ្ងាយពីផលិតផលដែលមានជាតិទឹកដោះគោផ្សេងទៀតជាដាច់ខាត។

អាលែកហ្ស៊ីទឹកដោះគោ​ និង​ការ​មិន​ស៊ាំ​នឹង​ជាតិ​ឡាក់​តូសលើទារក​

១. ភាព​ខុស​គ្នា​រវាង​អាលែកហ្ស៊ីទឹកដោះគោ ​និង​ការ​មិន​ស៊ាំ​នឹង​ជាតិ​ឡាក់​តូស

២. តើ​គ្រូពេទ្យ​ធ្វើ​រោគ​វិនិច្ឆ័យ​ដូច​ម្ដេច​ក្នុង​ករណី​អាលែកហ្ស៊ី​​​នេះ?

អាលែកហ្ស៊ីទឹកដោះគោ និងការមិនស៊ាំនឹងជាតិឡាក់តូសលើទារក

១. ភាពខុសគ្នារវាងអាលែកហ្ស៊ីទឹកដោះគោ និងការមិនស៊ាំនឹងជាតិឡាក់តូស

២. តើគ្រូពេទ្យធ្វើរោគវិនិច្ឆ័យដូចម្ដេចក្នុងករណីអាលែកហ្ស៊ីនេះ?