អ្នកជំងឺ COVID-19 ដែលជាសះស្បើយ អាចនឹងមិនមានអង់ទីករប្រឆាំងនឹងជំងឺ COVID-19 បានរយៈពេលយូរទេ នេះបើយោងតាមការស្រាវជ្រាវទៅលើអង់ទីករថ្មីដោយអ្នកវិទ្យាសាស្ត្រចិន និងអាមេរិក។

ការសិក្សានេះបានសិក្សាទៅលើក្រុមគ្រូពេទ្យនៅទីក្រុងអ៊ូហានដែលបានប៉ះពាល់ដោយផ្ទាល់ជាមួយនឹងអ្នកជំងឺនៅដំណាក់កាលដំបូងនៃការផ្ទុះវីរុសនេះកាលពីខែធ្នូ ឆ្នាំ២០១៩។ ក្រុមអ្នកស្រាវជ្រាវបានរកឃើញថាមួយភាគបីនៃសំណាក ២៣ ០០០នាក់បានឆ្លងវីរុសនេះ ប៉ុន្តែមានត្រឹមតែ៤%ប៉ុណ្ណោះដែលមានអង់ទីករគិតត្រឹមខែមេសា។

អត្ថបទពាក់ព័ន្ធ៖

ការសិក្សាថ្មីនេះបានណែនាំថាមិនមែនមនុស្សគ្រប់គ្នាដែលឆ្លងជំងឺ COVID-19 សុទ្ធតែមានអង់ទីករ ឬមានអង់ទីកររយៈពេលយូរអង្វែងទេ។ អង់ទីករនេះគឺបង្កើតដោយប្រព័ន្ធភាពស៊ាំដើម្បីភ្ជាប់ជាមួយនឹងសំបកវីរុស និងបញ្ឈប់វីរុសក្នុងការឆ្លងទៅក្នុងកោសិកា។

ការសិក្សាដដែលនេះក៏បានបង្ហាញថាអ្នកជំងឺដែលឆ្លង និងមានរោគសញ្ញាច្បាស់ ច្រើនផលិតអង់ទីករច្រើន ហើយអ្នកជំងឺផលិតអង់ទីករ IgG ២សប្ដាហ៍បន្ទាប់ពីចេញរោគសញ្ញា។ ប៉ុន្តែច្រើនជាង២០%នៃអ្នកជំងឺក្នុងការសិក្សាអាចនឹងបាត់បង់អង់ទីករនេះក្នុងរយៈពេលមួយខែ។ ម៉្យាងទៀត ការសិក្សានេះបានលើកឡើងថាការតេស្ដរកអង់ទីករអាចនឹងមិនគ្រប់គ្រាន់ឲ្យដឹងថានរណាម្នាក់បានឆ្លងទេ ហើយអង់ទីករ IgG ក៏មិនអាចផ្តល់ការការពារបានយូរដែរ។

ដោយឡែក ការសិក្សាថ្មីមួយទៀតនៅទីក្រុង Chongqing បានឲ្យដឹងថាអ្នកជំងឺជាសះស្បើយពីវីរុសCOVID-19 នៅប្រទេសចិននៅតែអាចឆ្លង COVID-19 ដែលមកពីប្រទេសក្រៅដោយវីរុសនេះបានធ្វើការប្រែប្រួលហ្សែន (Mutation) នៅលើសំបកផ្នែកស្រួចរបស់វាដែលហៅថា D614G។ វីរុសដែលមានការផ្លាស់ប្ដូរលំដាប់ហ្សេន D614G នេះចាប់ផ្តើមឆ្លងនៅទ្វីបអឺរ៉ុបកាលពីដើមខែកុម្ភៈ។ អង់ទីករដែលរកឃើញក្នុងអ្នកជំងឺដែលបានឆ្លងកាលពីវីរុសផ្ទុះឡើងដំបូងគឺមិនអាចប្រឆាំងនឹងការប្រែប្រួលថ្មីរបស់វីរុសនេះទេ។ អ្នកវិទ្យាសាស្ត្របានរកឃើញថាវីរុសដែលធ្វើការបំរែបំរួលហ្សែន (Mutation) អាចបង្កើនចំនួនសំបកវីរុស និងសមត្ថភាពក្នុងការឆ្លងទៅក្នុងកោសិកាមនុស្សខ្លាំងជាងមុន១០ដង។

ការសិក្សានេះបានឲ្យដឹងថាអង់ទីករដែលយកចេញពីអ្នកជំងឺមិនអាចបញ្ឈប់វីរុសដែលមានបំលាស់ប្ដូរនៃហ្សេនទេ។ អ្នកវិទ្យាសាស្ត្រក៏បានធ្វើការសាកល្បង ដោយឲ្យវីរុសមានលំដាប់ហ្សេនថ្មី និងវីរុសមានលំដាប់ហ្សេនធម្មតាឆ្លងទៅក្នុងកោសិកា។ គេឃើញថាវីរុសមានការផ្លាស់ប្ដូរលំដាប់ហ្សេនមានប្រសិទ្ធភាពឆ្លងទៅក្នុងកោសិកាខ្ពស់ជាងវីរុសលំដាប់ហ្សេនធម្មតា ២,៤ដង។ ដោយហេតុនេះគេបារម្ភថាវីរុសដែលមានលំដាប់ហ្សេនថ្មី D614G គឺអាចជះឥទ្ធិពលដល់ការបង្កើនវ៉ាក់សាំង។

ការសិក្សា៖ អ្នកជំងឺជាសះស្បើយពី COVID-19 អាចមានអង់ទីករត្រឹម​រយៈពេលខ្លី

ការសិក្សា៖ អ្នកជំងឺជាសះស្បើយពី COVID-19 អាចមានអង់ទីករត្រឹមរយៈពេលខ្លី