នៅកន្លែងតែមួយ អ្នកខ្លះមូសមិនខាំសោះ តែអ្នកខ្លះទៀតមូសខាំនោះខាំ មានឆ្ងល់អត់ មកពីហេតុអី? មកពីអ្នកនោះមានសាច់ស្អាត មានឈាមផ្អែមមែន?

ថ្លែងនៅក្នុងសន្និសីទ ស្តីអំពី “វិធីសាស្ត្រថ្មីៗប្រឆាំងនឹងសត្វមូស’ នៅវិទ្យាស្ថានបារាំង កាលពីយប់មិញនេះ លោក Sébasian Boyer វេជ្ជបណ្ឌិតផ្នែកបរិស្ថានសុខភាព HDR បម្រើការងារនៅវិទ្យាស្ថានប៉ាស្ទ័រកម្ពុជា ថា មានតែសត្វមូសញីប៉ុណ្ណោះដែលខាំ ព្រោះវាត្រូវការប្រូតេអ៊ីន តាមរយៈការបឺតជញ្ជក់ឈាម យកទៅចិញ្ចឹមពង មុនកើតជាសត្វមូស ហើយវាក៏ជាភ្នាក់ងារចម្លងជំងឺជាច្រើនមុខដែរ។

ចំពោះចម្ងល់រឿងអ្នកដែលមូសចូលចិត្តខាំ មកពីអ្វីនោះ? លោកថា ករណីនេះមិនដូចគ្នាទាំងអស់នោះទេ វាអាស្រ័យតាមប្រភេទនៃសត្វមូស និងទៅតាមតំបន់ផងដែរ។ ក្នុងនោះការសិក្សានៅប្រភេទហ្គាំប៊ី បង្ហាញថា ស្ត្រីមានផ្ទៃពោះដែលខ្លួនបញ្ចេញឧស្ម័នកាបូនិចច្រើន ជាប្រភពនៃការទាក់ទាញមូស ធ្វើឲ្យសត្វមូសចូលចិត្តខាំស្ត្រីមានផ្ទៃពោះជាងមនុស្សធម្មតា។

ចំពោះការសិក្សានៅប្រទេស តង់ហ្សានី និងលីប៊ីរីយ៉ា វិញ ប្រភេទមូស Anaphels gambiae ចូលចិត្តខាំអ្នកដែលមានជើងស្អុយ ស្រោមជើងកខ្វក់។

ឯអ្នកដែលមានឈាមក្រុម O ទាក់ទាញមូសច្រើនជាងអ្នកដែលមានប្រភេទឈាមក្រុម A ហើយអ្នកដែលចូលចិត្តផឹកស្រាបៀរច្រើន ក៏មូសចូលចិត្តខាំដែរ នោះបើតាមការសិក្សានៅប្រទេសជប៉ុន និងប៊ូគីណាហ្វាសូ។

អត្ថបទពាក់ព័ន្ធ៖ ក្រៅពីគ្រុនឈាម មានជំងឺមួយចំនួនសុទ្ធតែអាចចម្លងដោយសារមូសខាំ!

បើតាមអ្នកឯកខាងផ្នែកបរិស្ថានសុខភាពខាងលើ នៅទូទាំងពិភពលោកមានមូសប្រមាណជា ៣.៥០០ ប្រភេទ ឯណោះ ហើយវាអាចចម្លងជំងឺផ្សេងៗ ដូចជា ជំងឺគ្រុនឈាម គ្រុនឈិ គ្រុនចាញ់ ហ្ស៊ីកា គ្រុនលឿង ជំងឺរលាកខួរក្បាល ជាដើម។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អ្នកមានសាច់ផ្អែម មូសចូលចិត្តខាំមែនទេ?