មធ្យោបាយពន្យារកំណើតមានច្រើនណាស់ តែក្នុងនោះកងដាក់ក្នុងស្បូនជាវិធីល្អមួយ និងមិនចំណាយច្រើនឡើយ ហើយមិនងាយភ្លេចហួសថ្ងៃទៀតផង។ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្រ្តីនៃមន្ទីរពេទ្យបង្អែកមិត្តភាពកម្ពុជា-ចិន សែនសុខ នឹងណែនាំស្រីៗយើងឲ្យលម្អិតពីកងដាក់ក្នុងស្បូន។

១- កងដាក់ក្នុងស្បូន ជាឧបករណ៍តូចមួយមានជាតិទង់ដែង ជាកងផ្លាស្ទិកតូច ហើយទន់ ដែលមានបន្ទះ ឬសរសៃទង់ដែងរុំជុំវិញ។

២- កងដែលគេប្រើប្រាស់ច្រើននៅកម្ពុជាបច្ចុប្បន្ន គឺ Copper T 380A មានរាងជាអក្សរ T។

៣- វិធីដាក់ គឺត្រូវធ្វើឡើងដោយអ្នកផ្ដល់សេវាមានការបណ្ដុះបណ្ដាលត្រឹមត្រូវ ដោយស៊កកងនោះបញ្ចូលទៅក្នុងស្បូនតាមទ្វារមាស និងរន្ធមាត់ស្បូន។

វិធីពន្យារកំណើត

៤- កងដាក់ក្នុងស្បូនមានសមត្ថភាពដូចជា ៖

ជំរុញការបង្កើតប្រូតេអ៊ីន និងកោសិកាដែលធ្វើឲ្យមេជីវិតឈ្មោលស្លាប់ ហើយមិនឲ្យចូលទៅក្នុងដៃស្បូន
មានឥទ្ធិពលទៅលើស៊ុតមិនទាន់បង្កកំណើតនៅក្នុងស្បូន
ធ្វើឲ្យស៊ុតមិនអាចបង្កកំណើតបាន។

៥- មានប្រសិទ្ធិភាពខ្ពស់ ស័ក្ដិសមនឹងអ្នកមមាញឹកលេបថ្នាំមិនបានទៀងទាត់ ហើយដាក់ម្ដងមានប្រសិទ្ធភាពរហូតដល់ ១០ ឆ្នាំ។

៦- មិនមានផលរំខានធ្វើឲ្យដៃគូធុញទ្រាំពេលរួមភេទ។

៧- ស្ត្រីអាចដាក់កងក្នុងស្បូនបានក្នុងអំឡុងពេល៖

ថ្ងៃទី១ ដល់ទី ១២ នៃវដ្ដរដូវ
ក្រោយពីរលូតកូន
៦ សប្ដាហ៍ក្រោយសម្រាល
នៅពេលណាក៏បានតែច្បាស់ថា មិនមានផ្ទៃពោះ។

៨- មានតម្លៃសមរម្យអាចទទួលយកបាន ស័ក្ដិសមសម្រាប់ស្ត្រីចង់ពន្យារកំណើតរយៈពេលយូរ និងមានប្រសិទ្ធភាពខ្ពស់។

៩- អាចមានកូននៅពេលយកកងចេញមកវិញ និងមិនមានការយឺតយ៉ាវ។

១០- មានធ្លាក់ឈាមច្រើនជាងមុន និងឈឺពោះពេលមករដូវ អ្នកខ្លះអាចមានធ្លាក់សតិចតួច។

សម្រាប់អ្នកចង់ប្រើមធ្យោបាយពន្យារកំណើតណាមួយ ត្រូវទៅជួបពិគ្រោះជាមួយគ្រូពេទ្យជំនាញ ដើម្បីពិភាក្សា ក៏ដូចជាស្វែងយល់ពីវិធីដទៃ ថាតើមួយណាស័ក្ដិសមនឹងយើង ព្រោះគ្រប់ស្រ្តីទាំងអស់មិនប្រាកដថាអាចដាក់កងក្នុងស្បូនទាំងអស់ឡើយ។

កងដាក់ក្នុងស្បូន ល្អកម្រិតណាចំពោះស្រ្តី?