ខ្យល់ពុលនៅតាមបណ្តាទីក្រុង នឹងកើនឡើងប្រមាណ២០% នៅអំឡុងពេលថ្ងៃធ្វើការ បើធៀបនឹងថ្ងៃចុងសប្តាហ៍។ នេះបើតាមរបាយការណ៍ពីនាយកដ្ឋានកិច្ចការបរិស្ថាន ចំណីអាហារនៃចក្រភពអង់គ្លេសបង្ហាញកាលពីពេលថ្មីៗនេះ។

អ្នកជំនាញសិក្សាខាងផ្នែករោគសើស្បែក លោកស្រីវេជ្ជបណ្ឌិត Jinah Yoo មកពីគ្លីនិក SKN ដ៏ល្បីនៅចក្រភពអង់គ្លេស បានឲ្យដឹងថា កខ្វក់ខ្យល់ទាំងនោះនឹងបណ្តាលឲ្យស្បែកវិវត្តឆាប់ចាស់ តែលោកស្រីបានបញ្ជាក់ថា យើងក៏អាចមានវិធីបង្ការមួយចំនួនផងដែរ ដើម្បីទប់ស្កាត់មិនឲ្យស្បែកជ្រីវជ្រួញ ឆាប់វិវត្តហួសមុនវ័យ ដូចខាងក្រោម៖

១- ចៀសឲ្យបាន ពីកន្លែងដែលជាបណ្តុំផ្សែងពុល

បើអាចចៀសបាន គួរចៀសចេញពីកន្លែងដែលមានផ្លូវមមាញឹកច្រើនដោយឡានម៉ូតូ ព្រោះកន្លែងទាំងនោះជាប្រភពសំខាន់ដែលធ្វើឲ្យមុខមាត់រាងកាយអ្នករងប្រតិកម្មបង្កស្បែកឲ្យឆាប់ចាស់។ លោកស្រីក៏បានបន្ថែមថា បើមិនអាចចៀសបាន ក៏គួរកុំយកដៃប៉ះពាល់មុខ ហើយពេលមកដល់កន្លែងសមគួរ ក៏គួរលុបលាងមុខ និងស្បែកឲ្យបានស្អាត ចៀសវាងទុកចោលមិនសម្អាត។

២- មានទម្លាប់លុបលាងមុខ សម្អាតស្បែករៀងរាល់យប់

ពេញមួយថ្ងៃ មុខ និងស្បែកយើង ប្រមូលផ្តុំស្អិតជាប់ដោយធូលី ជាតិពុលផ្សេងៗ ដូចនេះការលុបលាងសម្អាតមុខ ព្រមទាំងងូតទឹក ដុសសម្អាតស្បែក ជារឿងដែលគួរគប្បីធ្វើ។ បើដូចមិនដូច្នោះ យើងក៏ត្រូវប្រឈមមុខនឹងបញ្ហាឡើងមុន ស្បែកចាស់ជ្រីវជ្រួញ មិនអាចប្រកែកបាន។

៣- កុំប្រើអេប៉ុងផាត់មុខយកមកសម្អាតមុខ

រវល់ពេញមួយថ្ងៃ មកដល់ផ្ទះវិញ ងូតទឹកសម្អាតខ្លួន ប៉ុន្តែក៏កុំច្រឡំថា យកទ្រនាប់ផាត់ម្សៅ (អេប៉ុង) ជាពិសេសគ្នាយើងស្រីៗ មកជូតសម្អាតមុខ ព្រោះថា សារធាតុកង្វក់ជាប់ទ្រនាប់ម្សៅដែលយើងមើលមិនឃើញ ក៏នឹងចូលរួមចំណែកឲ្យស្បែកយើងឆាប់ចាស់ទៅវិញ ដូចទៅនឹងការមិនសម្អាតដែរ។

ស្បែកមុខ

៤- ប្រើផលិតផលជំនួយខ្លះ

ក្រោយសម្អាតកម្ចាត់ជាតិពុល សារធាតុកខ្វក់ចេញពីស្បែកមុខ យើងអាចបន្ថែមក្រែម (ឡេ) ដែលមានវីតាមីន C និងវីតាមីន E ឬឡេផ្តល់ជាតិសំណើមដល់ស្បែកមុខ ដែលមានការទទួលស្គាល់ត្រឹមត្រូវ។ លាបលើផ្ទៃមុខបន្តិច វានឹងជួយយើងឲ្យចាកឆ្ងាយពីភាពចាស់ជាងអាយុបានផងដែរ។

៥- ញ៉ាំទឹកឲ្យបានគ្រប់គ្រាន់

ស្តាប់មើលសាមញ្ញ តែវាពិតជាជួយបាន។ ពេលស្បែកខ្វះជាតិទឹក ជាតិសំណើម ស្ងួត ប្រាកដណាស់យើងត្រូវការទឹកដើម្បីជំនួយ។ អាចប្រើរូបមន្តញ៉ាំទឹក ៨ លើ ៨ មានន័យថា ក្នុង១ថ្ងៃ យើងអាចញ៉ាំឲ្យបាន ៨ កែវ គិតមកដល់ត្រឹមម៉ោង ៨ យប់។

អត្ថបទពាក់ព័ន្ធ៖

៦- ពិគ្រោះជាមួយគ្រូពេទ្យ

ទម្លាប់ថែរក្សាស្បែក យើងនឹងទទួលផលបានស្បែកល្អស្អាត មិនឆាប់ចាស់។ យើងអ្នកក៏អាចទៅពិគ្រោះយោបល់បន្ថែមជាមួយគ្រូពេទ្យឯកទេសស្បែក ដើម្បីពួកគេអាចណែនាំចំបញ្ហាស្បែកដែលយើងកំពុងមាន ឬផ្តល់ជាគន្លឹះរក្សាស្បែកស្របតាមបរិស្ថានដែលយើងរស់នៅ៕

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ខ្យល់​ទី​ក្រុង​ធ្វើ​ឲ្យ​យើងឆាប់​ចាស់ តែ​អ្នក​ជំនាញ​ប្រាប់របៀបទប់ទល់

ខ្យល់ទីក្រុងធ្វើឲ្យយើងឆាប់ចាស់ តែអ្នកជំនាញប្រាប់របៀបទប់ទល់