ទារកនៅតូច ស្បែកក៏ស្តើង ហើយឆ្អឹងក៏ខ្ចីទៀត ពេលងូតទឹកម្តងៗពិបាកមែនទែន ឯរឿងរឹតបារម្ភនោះ ខ្លាចកូនឈ្លក់ទឹកយំ ឬទឹកចូលត្រចៀកជាដើម។ ម៉ាក់ៗខ្លះមានកូនច្រើនហើយនៅតែពិបាកងូតទឹកឲ្យកូនតូច បើស្រីៗទើបតែក្លាយម៉ាក់គេថ្មីថ្មោងច្បាស់ជារឹតតែពិបាកខ្លាំងមិនខាន។
មិនបាច់បារម្ភទេ ថ្ងៃនេះ Hello គ្រូពេទ្យ នឹងចែករំលែកតិចនិកងូតទឹកឲ្យកូនតូចទើបនឹងកើតឲ្យត្រូវតាមក្បូនខ្នាត ងាយស្រួលងូត មិនព្រួយរឿងទឹកចូលត្រចៀក ឬឈ្លក់។
ជាដំបូងយើងត្រូវលាងសម្អាតដៃជាមួយសាប៊ូ មុននឹងចាប់ផ្តើមងូតទឹកឲ្យកូន បន្ទាប់មកចាក់ទឹកត្រជាក់ចូលក្នុងប្រដាប់ងូតទឹក រួចចាក់ទឹកក្តៅឧណ្ហៗបន្ថែមឲ្យបាន១ភាគ៣ នៃផ្ទៃក្លាំងូតទឹក រួចកូរឲ្យសព្វ និងស្ទង់កម្តៅថាសមល្មម មិនក្តៅពេក ឬត្រជាក់ពេក កម្តៅប្រហែល ៣៦,៥ អង្សាសេ បើសិនជាអាចត្រូវមានទែម៉ូម៉ែត្រសម្រាប់ស្ទង់កម្តៅ និងចាក់ទឹកសាប៊ូ ២-៣ តំណក់ក្នុងទឹក រួចកូរឲ្យសព្វ។
អត្ថបទពាក់ព័ន្ធ៖ គ្រោះថ្នាក់ខ្លាំង បើកូនកើតស្អូច ឬអុតស្វាយ ត្រាំទឹករុក្ខជាតិ និងខ្ចៅខ្យងឲ្យងូត
ការងូតទឹកឲ្យកូនតូច បែងចែកជា ៣ ដំណាក់កាលដាច់ពីគ្នា៖
១- លាងសម្អាតផ្ទៃមុខ
– រុំកូនជាមួយកំណាត់ឲ្យជិត ទុកតែក្បាល និងមុខ
– ដាក់កូនឲ្យដេកនៅលើកម្រាលជ័រ
– ចាប់ផ្តើមសម្អាតមុខ ដោយយកសំឡីជ្រលក់ទឹកមកជូតថ្នមៗនៅលើថ្ងាស ថ្ពាល់ ភ្នែក មាត់ និងត្រចៀក។
២- សម្អាតក្បាល ឬកក់សក់ឲ្យកូន
– លើកបីកូនថ្នមៗ និងនិយាយជាមួយគេដើម្បីឲ្យស្និទ្ធស្នាល កូនកក់ក្តៅក្នុងរង្វង់ដៃយើង
– បាតដៃម្ខាងទ្រក្បាលកូន ឯម្រាមដៃបិទត្រចៀកកូនទាំង២ និងម្ខាងទៀតបាចទឹកដែលលាយទុកក្នុងចានមកលាងសម្អាតក្បាលកូន
– បន្ទាប់មកយកកូនមកជូតសម្អាតក្បាលកូនជាមួយកន្សែងទន់ៗ ឲ្យស្ងួត
– កូនក្មេងមិនត្រូវកក់សក់ញឹកញាប់នោះទេ ត្រឹម ១-២ដង/អាទិត្យ ដោយម៉ាក់ៗគ្រាន់តែលាងសម្អាតក្បាល និងសក់ជាមួយនឹងទឹកស្អាតប៉ុណ្ណោះ។
៣- លាងសម្អាតដងខ្លួនកូន
– ឲ្យកូនសណ្តូកខ្លួនក្នុងចានងូតទឹក រួចចាប់ទប់កូនក្រោមក្លៀកឲ្យបានល្អពេលសម្អាតខ្លួន
– លាងសម្អាតរាងកាយកូនទៅលំដាប់លំដោយពីលើចុះក្រោម ( ក ក្លៀក ខ្នង ពោះ ក្រលៀន ភ្លៅ)
– លាងសម្អាតផ្នែកខាងក្រៅនៃប្រដាប់ភេទ ពីក្រោមពោះដល់រន្ធគូថ និងគូថ
– ងូតទឹករួច ត្រូវយកកន្សែងទន់ៗមកផ្តិតថើៗ ជាពិសេសកន្លែងផ្នត់កុំឲ្យនៅសើម
– សម្អាតផ្ចិតទារក
– ចុងក្រោយពាក់កន្ទប និងខោអាវថ្មី។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
