ថ្មពិលគ្រាប់តូចៗ ដែលមាននៅក្នុងរបស់របរក្មេងលេង អាចបង្កជាបញ្ហាធ្ងន់ធ្ងរបាន ពិសេសម៉ាក់ប៉ាដែលមានកូនតូចៗ គួរគប្បីស្វែងយល់។ ថ្មីៗនេះ ស្ថាប័នស្រាវជ្រាវសុខភាពសាធារណៈ ចក្រភពអង់គ្លេស NHS បានចេញផ្សាយជាសារក្រើនរំលឹកដល់ឪពុកម្តាយកូនតូច ក្រោយមានករណីក្មេងស្រីតូច២ឆ្នាំ លេបគ្រាប់ថ្មពិល បង្កគ្រោះថ្នាក់ស្ទើរតែឆក់យកអាយុជីវិតនាង។
ប្រភពព័ត៌មានពី BBC នាងតូចឈ្មោះ Sophie Skill បានលេបថ្មពិលតូចមួយគ្រាប់ ហើយជាតិអាស៊ីដដែលបានបម្លែងចេញពីគ្រាប់ថ្មពិល បានបង្កឱ្យបំពង់អាហាររបស់នាងតូចរលាក បង្កជាការឈឺចាប់ខ្លាំង រហូតស្ទើរតែបាត់បង់ជីវិត។
បើតាមម្តាយរបស់ Sophie បានឱ្យដឹងថា ក្រោយ Sophie បានលេបកូនថ្មពិលតូច នាងនៅដកដង្ហើមធម្មតា តែនាងយំខ្លាំងមែនទែន ដែលម្តាយរបស់នាងមិនដែលឃើញ Sophie យំខ្លាំងបែបនោះទេ។ បន្ទាប់ពីបញ្ជូនកូនទៅពេទ្យពិនិត្យភ្លាមៗ ក្រុមគ្រូពេទ្យបានយកនាងតូចទៅបន្ទប់វះកាត់ ដើម្បីយកគ្រាប់ថ្មពិលនោះចេញ។
ទោះបីជានីតិវិធីដំណើរការលឿនក៏ដោយ រយៈពេលពីរម៉ោងក្រោយពិនិត្យកាំរស្មី X-rayឃើញថា Sophie បានរលាកបំពង់អាហារ និងសួតនាងធ្ងន់ធ្ងរទៅហើយ ដែលតម្រូវឱ្យនាងត្រូវសម្រាកព្យាបាលជាច្រើនសប្តាហ៍រហូតជាសះស្បើយ។
គ្រូពេទ្យពេទ្យជំនាញអង់គ្លេសបាននិយាយថា ទឹកមាត់ក្នុងរាងកាយ នឹងមានប្រតិកម្មទៅនឹងថ្មពិលនោះ ហើយបានបង្កជាជាតិអាស៊ីដ ធ្វើឱ្យបំពង់អាហាររបស់ Sophie រលាក។
បើតាមលោក Stephen Powis នាយកស្ថាប័នសុខភាពសាធារណៈ ចក្រភពអង់គ្លេស NHS បានឱ្យដឹងថា ថ្មពិលគ្រាប់តូចៗ ចំពោះក្មេងៗ អាចច្រលំថាជាស្ករគ្រាប់ ដែលនេះឪពុកម្តាយគ្រប់រូបគួរយកចិត្តទុកដាក់។ វិធីបង្ការកុំឱ្យកើតមានរឿងហេតុដូចករណី Sophie នោះគឺគប្បីទុកដាក់គ្រាប់ថ្មពិលឱ្យឆ្ងាយពីដៃក្មេង ដោយឡែកប្រដាប់ប្រដាក្មេងលេងដែលមានប្រើថ្មពិលតូច ត្រូវប្រាកដថាមានសន្ទះបិទជាប់ល្អ។
អត្ថបទពាក់ព័ន្ធ៖
- កូនតូចក្តៅខ្លួន រងាខ្លាំង ហេតុអីពេទ្យហាមដណ្តប់ភួយ ឬស្លៀកពាក់ក្រាស់ៗ
- កូនតូចៗក្តៅខ្លួនខ្លាំង ម៉ាក់ប៉ាកុំស្លន់ស្លោ មកដឹងពីរឿងត្រូវធ្វើ និងមិនត្រូវធ្វើ
គួររំលឹកដែរថា ថ្មពិលគ្រាប់តូចៗ អាចមាននៅក្នុង របស់របរក្មេងលេងដូចជា មនុស្សយន្ត ពិលតូចៗ យ៉ូយ៉ូ (yo-yos) កាសស្តាប់ជាដើម៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
