នៅតាមខេត្ត ពិសេសជនបទឆ្ងាយៗ ការបន្តោងសេរ៉ូមពេលក្មេងឈឺពេញនិយមខ្លាំងណាស់ មិនថា ឈឺជំងឺអ្វី ឈឺល្មម ឬឈឺខ្លាំងនោះទេ ដឹងតែបន្តោងសេរ៉ូមហើយ។ តើក្មេងឈឺល្មមៗគួរបន្តោងសេរ៉ូម ឬអត់?
សេរ៉ូមជាល្បាយសូលុយស្យុងផលិតឡើងសម្រាប់បំពេញជាតិទឹក ជាតិស្ករ និងបន្ថែមជីវជាតិ ឬសារធាតុថ្នាំដែលចាំបាច់ទៅឲ្យអ្នកជំងឺ ដែលមិនអាចទទួលយកសារធាតុទាំងនោះតាមរយៈការញ៉ាំតាមមាត់បាន ដោយចាក់បញ្ចូលតាមសរសៃ។ ដូច្នេះហើយយើងមិនអាចយកសេរ៉ូមឲ្យដាក់អ្នកជំងឺគ្រប់ប្រភេទនោះទេ ពិសេសក្មេងៗដែលមានជំងឺល្មមៗ នេះបើតាមការអះអាងរបស់ឱសថការី គីម កាណែល។
ការដែលសេរ៉ូមពេញនិយមនៅតាមខេត្ត ឬជនបទឆ្ងាយៗនោះ អាចមកពីកង្វះការយល់ដឹងរបស់អាណាព្យាបាល ឬគ្រូពេទ្យមួយចំនួន ហើយការបន្តោងសេរ៉ូមខ្លះត្រូវបានចាក់បញ្ចូលថ្នាំវីតាមីនក្នុងនោះ។
សេរ៉ូមចាក់មានច្រើនប្រភេទ ប៉ុន្តែប្រភេទដែលប្រើញឹកញាប់ជាងគេមានដូចជា សេរ៉ូមប្រៃ (NaCl ០.៩%) សេរ៉ូមផ្អែម (Dextrose ៥%) និងសេរ៉ូមឡាក់តាត (Lactate ringer)។ ការប្រើសេរ៉ូមទាំងនេះ គឺតម្រូវតាមរោគវិនិច្ឆ័យ ស្ថានភាពជំងឺ និងការព្យាបាលរបស់គ្រូពេទ្យ។ ជាទូទៅការចាក់សេរ៉ូម គឺតម្រូវចំពោះអ្នកជំងឺមិនអាចញ៉ាំ ឬពិបាកញ៉ាំ និងអ្នកជំងឺដែលមានអាការៈធ្ងន់ធ្ងរប៉ុណ្ណោះ។
ឱសថការីដដែលបន្ត ក្នុងករណីដែលក្មេងមានជំងឺមួយចំនួនធ្ងន់ធ្ងរ ញ៉ាំអីមិនបាន ខ្វះជាតិទឹកធ្ងន់ធ្ងរ បាត់បង់ឈាម ឬការវះកាត់ នោះទើបតម្រូវឲ្យចាក់បញ្ចូលសេរ៉ូម ដើម្បីបំពេញជាតិទឹកក្នុងខ្លួនកុំខ្សោះ ក្មេងមានកម្លាំងកំហែងឡើងវិញខ្លះ។
អត្ថបទពាក់ព័ន្ធ៖ ត្រូវដឹង ក្មេងខ្វះជាតិទឹកមានអីសម្គាល់?
លោកថា ការដែលចាក់បញ្ចូលសេរ៉ូមក្នុងស្ថានភាពក្មេងឈឺធម្មតាមិនត្រឹមគ្មានប្រយោជន៍ ខាតបង់ពេលវេលា និងថវិកានោះទេ ថែមទាំងអាចប៉ះពាល់ដល់សុខភាពក្មេងថែមទៀត ព្រោះការចាក់សេរ៉ូមចំពោះក្មេងមិនត្រឹមតែពិបាកចាក់ និងឈឺចាប់ប៉ុណ្ណោះទេ ប៉ុន្តែអាចធ្វើឲ្យកន្លែងដែលចាក់មានរបួស ជាំ ហើម ឬមានការបង្ករោគ ប្រសិនបើការចាក់នោះមិនត្រឹមត្រូវ។ ម្យ៉ាងវិញទៀតបើក្មេងមានប្រតិកម្មជាមួយនឹងសេរ៉ូម ឬថ្នាំចាក់ណាមួយតាមសរសៃ អាចប្រឈមនឹងគ្រោះថ្នាក់ ហើយពិបាកជួយសង្គ្រោះ។ ការចាក់សេរ៉ូមក្នុងកម្រិតមិនត្រឹមត្រូវចំពោះក្មេង ក៏អាចធ្វើឲ្យចាល់ជាតិទឹកទៅតម្រងនោមដែរ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
