ម៉េចបានយប់ឡើងចេះតែរមួលក្រពើ គួរដោះស្រាយបែបណា?

គ្នាយើងយ៉ាងហោចណាស់ ក៏ធ្លាប់ជួបប្រទះអាការៈរមួលក្រពើម្តង ឬក៏ពីរដងដែរ នៅពេលយប់ ពិសេសស្រីៗកំពុងពពោះ កាន់តែងាយរមួលក្រពើថែមទៀត។ ទោះមិនមែនជាបញ្ហាធ្ងន់ធ្ងរ ប៉ុន្តែរមួលក្រពើពេលយប់ ពិតជាឈឺចាប់ខ្លាំងណាស់ ហេតុនេះគ្នាយើង គួរស្វែងយល់ពីមូលហេតុនាំឲ្យរមួលក្រពើ ក៏ដូចជាវិធីដោះស្រាយ មានក្នុងអត្ថបទ “Hello គ្រូពេទ្យ’ ខាងក្រោមនេះ។

១- អ្វីជាអាការៈរមួលក្រពើពេលយប់?

រមួលក្រពើ ជាការរមួលសាច់ដុំ សំដៅលើសាច់ដុំរមួលកំភួនជើង កើតមានឡើងនៅពេលយប់ ត្រូវគេហៅថា Nocturnal leg cramps ជាបញ្ហារមួលក្រពើពេលយប់ ។ ការរមួលនេះ តែងតែធ្វើឲ្យយើងភ្ញាក់ពីគេងភ្លាមៗ ហើយការរមួលកើតឡើងគ្រប់ពេល ទាំងយើងមិនបានធ្វើសកម្មភាពក៏ដោយ។ ក្រៅពីរមួលសាច់ដុំនៅកំភួនជើង ក៏អាចកើតមាននៅភ្លៅ ឬបាតជើងដូចគ្នា ដែលការកន្រ្តាក់សាច់ដុំ គឺឈឺចាប់ខ្លាំង អាចបណ្តាលឲ្យសាច់ដុំរងផលប៉ះពាល់ ធ្វើឲ្យយើងមានអារម្មណ៍ថាតឹង ឈឺ ឬដូចមាននរណាកំពុងមួលជើងយើង។ អាការៈ អាចមានរយៈពេលច្រើនវិនាទី ទៅច្រើននាទី ហើយភាគច្រើនកើតលើមនុស្សចាស់ អាយុលើសពី ៥០ ឆ្នាំ ប៉ុន្តែក៏អាចកើតមានលើមនុស្សពេញវ័យ និងក្មេងដែរ។

២- មូលហេតុរមួលក្រពើពេលយប់

ការសិក្សាជាច្រើនបង្ហាញថា ភាពខ្សោយរបស់សាច់ដុំ ជាមូលហេតុចម្បងនាំឲ្យរមួលក្រពើ។ ឧទាហរណ៍ មានការសិក្សាមួយទាក់ទងនឹងកីឡាករម្នាក់ បង្ហាញពីការរមួលក្រពើ ដោយសារតែការហ្វឹកហាត់ខ្លាំងពេកលើសាច់ដុំ នាំឲ្យខ្វះអុកស៊ីសែន និងកើនឡើនកាកសំណល់យើងត្រូវបញ្ចេញនៅពេលថ្ងៃ សុទ្ធតែអាចធ្វើឲ្យរមួលក្រពើ និងកន្ត្រាក់សាច់ដុំនៅពេលយប់។ មិនត្រឹមតែការហាត់ប្រាណទេ ការធ្វើចលនាខ្លាំងៗ ដូចជា ការអង្គុយយូរ ឈរយូរ ឬធ្វើការលើកម្រាលបេតុង អង្គុយមិនត្រឹមត្រូវ ក៏អាចជាកត្តារួមចំណែកដូចគ្នា។ គ្នាយើងកើតមក មានបញ្ហាមិនប្រក្រតីរចនាសម្ព័ន្ធ ដូចជាបាតជើងរាបស្មើរ ក៏អាចប្រទះអាការៈរមួលសាច់ដុំបានដែរ។

ពេលខ្លះ រមួលក្រពើពេលយប់ អាចជាសញ្ញាជំងឺមួយចំនួន ពិសេស ជំងឺប្រព័ន្ធប្រសាទ ដូចជា ជំងឺ Parkinsonism ឬជំងឺក្រពេញអង់ដ្រូគ្រីន ជំងឺទឹកនោមផ្អែម និងជំងឺ Hypothyroidism (ខ្សោយមុខងារក្រពេញទីរ៉ូអ៊ីត)។ អតុល្យភាពអេឡិចត្រូលីត្រក្នុងរាងកាយ ដោយសារខ្វះជាតិទឹក ឬលាងឈាម ក៏អាចជាមូលហេតុផងដែរ ខណៈមានថ្នាំមួយចំនួន ដូចជា ពពួកថ្នាំបញ្ចុះទឹកនោម ពពួកថ្នាំ Statin និងពពួកថ្នាំ Beta Agonists សុទ្ធតែបង្កឲ្យរមួលក្រពើ ។

ស្រីៗមានផ្ទៃពោះ ងាយនឹងរមួលសាច់ដុំនៅពេលយប់ជាងគេ ពិសេសនៅក្នុងអំឡុងត្រីមាសទី ២-៣ ដែលបណ្តាលមកពីការឡើងទម្ងន់ ខ្វះជាតិទឹក ខ្វះសារធាតុចិញ្ចឹម ពិសេសជាតិម៉ាញ៉េស្យូម ជំងឺមួយចំនួន និងថ្នាំពេទ្យ។

អត្ថបទពាក់ព័ន្ធ៖

តិចនិកងាយៗសម្រាប់អ្នកឧស្សាហ៍រមួលក្រពើ
ឧស្សាហ៍រមួលក្រពើពេលពពោះ ទាំងនេះគឺវិធីដោះស្រាយ

២- វិធីព្យាបាលអាការៈរមួលក្រពើនៅពេលយប់

ទាញសាច់ដុំ និងម៉ាស្សាជ្រៅៗ អាចមានប្រយោជន៍ជួយដល់គ្នាយើងដែលរមួលក្រពើនៅពេលយប់បាន។ ដើម្បីទាញសាច់ដុំបាន ដំបូងយើងត្រូវអង្គុយសណ្តូកជើងឲ្យត្រង់ និងបត់ម្រាមជើងមកស្មងជើងអ្នក ចាំធ្វើការម៉ាស្សាលើសាច់ដុំ ដើម្បីបន្ធូរនូវការកន្រ្តាក់។ គ្នាយើង ក៏អាចស្អំទឹកក្តៅ ឬលាបក្រែមបំបាត់ការឈឺចាប់នៅលើកំភួនជើង ដើម្បីឲ្យមានភាពធូរស្រាលផងដែរ។ គួរតែដឹងពីមូលហេតុបង្ក និងវិធីកាត់បន្ថយការរមួលក្រពើ ដូចជា ផឹកទឹកឲ្យបានច្រើន ចៀសវាងឈររយៈពេលយូរ ឬពិគ្រោះជាមួយគ្រូពេទ្យពីថ្នាំពេទ្យគួរប្រើ ឬមិនគួរប្រើ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

Editor HK

អត្ថបទដោយ ចាន់ សុខឡាង · កែ 05/09/2019