សម្រាលកូន គឺជាពេលវេលាដ៏រីករាយបំផុតក្នុងឆាកជីវិតរបស់ម៉ាក់ៗ ព្រោះបានឃើញមុខអាអូនជាទីស្រលាញ់ ក្រោយខិតខំពពោះអស់រយៈពេលមិនតិចជាងប្រាំបួនខែមកនេះ។
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
សម្រាលកូន គឺជាពេលវេលាដ៏រីករាយបំផុតក្នុងឆាកជីវិតរបស់ម៉ាក់ៗ ព្រោះបានឃើញមុខអាអូនជាទីស្រលាញ់ ក្រោយខិតខំពពោះអស់រយៈពេលមិនតិចជាងប្រាំបួនខែមកនេះ។
យ៉ាងណាមិញ ម៉ាក់ៗដែលសម្រាលកូនដោយវះកាត់ គឺត្រូវការចំណាយពេលក្នុងការជាសះស្បើយឡើងវិញ យូរជាម៉ាក់ៗដែលសម្រាលកូនតាមបែបធម្មជាតិ។ ដូចនេះ ដើម្បីឲ្យឆាប់ជាសះស្បើយក្រោយសម្រាលកូនដោយវះកាត់ ដោយមិនចាំបាច់ឈឺចាប់ និងហត់នឿយយូរ ក៏ដូចជាមានពេលវេលាកាន់តែច្រើន ក្នុងការបង្កើតចំណងទាក់ទងជាមួយនឹងអាអូនដែលទើបនឹងកើត ម៉ាក់ៗគួរអនុវត្តតាមវិធីដូចខាងក្រោមនេះ។
ការសម្រាលដោយវះកាត់ ក៏ជាការវះកាត់ដ៏ធំមួយ ដែលរាងកាយត្រូវការពេលវេលាយូរគួរសមក្នុងការជាសះស្បើយ។ ម៉ាក់ៗត្រូវសម្រាកនៅក្នុងមន្ទីរពេទ្យចំនួន៣ទៅ៤ថ្ងៃ ឬលើសពីនេះបន្ទាប់ពីសម្រាល និងត្រូវរង់ចាំរយៈពេល៦សប្តាហ៍ រហូតដល់រាងកាយម៉ាក់ៗបានជាសះស្បើយឡើងវិញ។
ពិតណាស់ វាមិនស្រួលប៉ុន្មានឡើយ ក្នុងការគេងនៅលើគ្រែ នៅពេលដែលអាអូនត្រូវការម៉ាក់ៗមើលថែ។ដូចនេះ ចូរសម្រាកនៅពេលណាដែលអាអូនគេងលក់ ទោះបីជាប៉ុន្មាននាទីក្តី ក៏អាចជួយឲ្យម៉ាក់បានស្រួលខ្លួនបន្តិចដែរ។
ម៉ាក់ៗគួរយកចិត្តទុកដាក់ចំពោះរាងកាយឲ្យបានដិតដល់ ទោះបីជាបានធូរស្បើយក៏ដោយ ក៏មិនគួរឡើងចុះកាំជណ្ដើរ ច្រើននោះទេ។ ចូររៀបចំសម្ភារៈចាំបាច់ទុកក្បែរៗខ្លួន ដូចជាខោទឹកនោម និងអាហារ ដើម្បីកុំឲ្យត្រូវក្រោកញឹកញាប់។ ជាពិសេស កុំលើកអ្វីដែលធ្ងន់ជាងទម្ងន់ទារក និងសុំជំនួយពីស្វាមី មិត្តភក្តិ ឬសមាជិកគ្រួសារបើចាំបាច់។ បន្ថែមពីនេះទៀត ម៉ាក់ៗគួរខ្ទប់ពោះ នៅពេលដែលកណ្ដាស់ ឬក្អក ដើម្បីការពារត្រង់បរិវេណវះកាត់។
ម៉ាក់ៗអាចត្រូវចំណាយពេលរហូតដល់៨សប្តាហ៍ ដើម្បីត្រលប់ទៅរកទម្លាប់ធម្មតាដូចពីមុនវិញ។ សូមសាកសួរគ្រូពេទ្យអំពីពេលវេលាស័ក្ដិសមក្នុងការធ្វើលំហាត់ប្រាណ ទៅធ្វើការ ឬបើកបរជាដើម។ មួយវិញទៀត ម៉ាក់ៗត្រូវរង់ចាំគ្រូពេទ្យបើកភ្លើងខៀវសិន ក្នុងការរួមភេទ ឬប្រើតាំប៉ុង។ល។
ជាមួយគ្នានេះដែរ ម៉ាក់ៗមិនត្រូវភ្លេចគិតពីសុខភាពផ្លូវចិត្តរបស់ខ្លួននោះទេ ព្រោះនៅពេលមានកូន អារម្មណ៍របស់ម៉ាក់ៗមានការប្រែប្រួលមិនទៀងទាត់។ ដូច្នេះហើយ បើមានអារម្មណ៍ហត់នឿយ កើតទុក្ខ ឬខកចិត្តណាមួយកើតឡើង ចូរពិភាក្សាជាមួយនឹងមិត្តភ័ក្ដិ ដៃគូ ឬគ្រូពេទ្យដើម្បីស្វែងរកដំណោះស្រាយ។
នៅពេលដែលម៉ាក់ៗមានអារម្មណ៍ឈឺចាប់ សូមសាកសួរគ្រូពេទ្យអំពីប្រភេទថ្នាំបំបាត់ការឈឺចាប់ ដែលម៉ាក់ៗអាចញ៉ាំបាន ជាពិសេស នៅពេលដែលម៉ាក់ៗកំពុងបំបៅដោះកូន ឬក៏អាចមានវិធីបំបាត់ការឈឺចាប់បែបផ្សេងក្រៅពីប្រើថ្នាំ ឬយ៉ាងណា។
អាហារូបត្ថម្ភមានសារៈសំខាន់ណាស់ នៅពេលដែលម៉ាក់ៗកំពុងពពោះ និងក្រោយពេលសម្រាលកូនរួច។ ម៉ាក់ៗគឺជាប្រភពអាហារូបត្ថម្ភដ៏សំខាន់ដល់កូន ចំពោះអាអូនដែលអឹមដោះ។ ដូច្នេះហើយ ចូរញ៉ាំអាហារល្អៗ ដូចជាបន្លែ និងទឹកឲ្យបានច្រើន ដើម្បីឲ្យកូនមានសុខភាពល្អ ហើយម៉ាក់ៗក៏ឆាប់រឹងមាំឡើងវិញផងដែរ។
ការដែលឈឺចាប់នៅត្រង់ស្នាមវះ ក៏ដូចជាអាចមានធ្លាក់ឈាម ឬធ្លាក់ស រហូតដល់ពេល៦សប្ដាហ៍ បន្ទាប់ពីសម្រាលដោយការវះកាត់ គឺជារឿងធម្មតាប៉ុណ្ណោះ។ ប៉ុន្តែ ប្រសិនបើយើងមានសញ្ញាណទាំងនេះ វាអាចមានមេរោគឆ្លងផ្សេងៗ ដែលទាមទារឲ្យយើងត្រូវទៅជួបគ្រូពេទ្យភ្លាមៗ។ សញ្ញាទាំងនោះរួមមាន៖
ស្នាមក្រហម ហើម ឬខ្ទុះចេញពីកន្លែងវះកាត់
ឈឺចាប់នៅត្រង់កន្លែងវះកាត់
ក្ដៅខ្លួនលើសពី៣៨អង្សា
មានក្លិនមកល្អចេញពីទ្វារមាស
ធ្លាក់ឈាមខ្លាំងចេញពីទ្វារមាស
ស្នាមក្រហម ឬហើមជើង
ពិបាកដកដង្ហើម
ឈឺដើមទ្រូង។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕