ការសម្រាលកូនដោយវិធីវះកាត់មិនមែនជារឿងងាយស្រួល ដោយឈឺចាប់ទាំងមុខរបួស បាត់បង់កម្លាំង ហើយពិបាកទាំងការទទួលទាន ព្រោះមិនអាចញ៉ាំបានភ្លាមៗ។ ក្នុងករណីសម្រាលដោយវះកាត់ តើប៉ុន្មានម៉ោងក្រោយទើបអាចញ៉ាំអាហារបាន? នេះជាចម្ងល់របស់គ្នាយើងច្រើន ហើយខ្លះថាទាល់តែ ១ ថ្ងៃក្រោយទើបអាចញ៉ាំបាន ហើយពេទ្យថាយ៉ាងម៉េចវិញ។

លោកសាស្ត្រាចារ្យវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត បានឲ្យដឹងថា ការសម្រាលដោយវះកាត់មិនអាចបង្អត់ម៉ាក់ៗមួយថ្ងៃពេញ ហើយត្រូវរង់ចាំឲ្យដើរខ្យល់នោះទេ។ លោកក៏បានបញ្ជាក់ទៀតថា ក្រោយសម្រាល ៥-៦ ម៉ោងប៉ុណ្ណោះអាចញ៉ាំបានហើយ តែជំហានដំបូងត្រូវជាអាហារទន់ៗងាយស្រួលរំលាយសិន។

ប្រធានផ្នែករោគស្ត្រី នៃមន្ទីរពេទ្យកាល់ម៉ែត រូបនេះបានបន្ថែមទៀតថា វះកាត់សម្រាលកូនគេមិនអាចបង្អត់ចំណីយូរឡើយ ព្រោះមុនវះកាត់ ៨ ម៉ោងគឺមិនទាន់បានញ៉ាំអ្វីសោះ ដើម្បីការពារមិនឲ្យក្អួត ឬឈ្លក់ ហើយបើបង្អត់រហូត ១ ថ្ងៃក្រោយទៀត នាំឲ្យម៉ាក់ៗបាត់បង់កម្លាំងកាន់តែខ្លាំង និងទឹកដោះកាន់តែខ្សោះ។

សម្រាលកូន

ករណីដែលវះ ហើយរង់ចាំឲ្យដើរខ្យល់ឡើងវិញទើបអាចញ៉ាំបាន ទាល់តែវះកាត់ផ្នែកពោះវៀន ឬប្រដាប់រំលាយអាហារទើបត្រូវការតមអាហារយូរបន្តិច ដើម្បីឲ្យចលនាពោះវៀនដើរបានស្រួលសិន។ តែសម្រាប់អ្នកវះកាត់សម្រាលកូនគឺគ្មានពាក់ព័ន្ធគ្នាឡើយ ដូចនេះយូរបំផុត ៦ ម៉ោង ហើយ ៣ ម៉ោងដំបូងអាចផឹកទឹកបានតិចៗ និងគ្មានការឈឺចុកចាប់អ្វីទាំងអស់។

ដូចនេះប្រសិនបើម៉ាក់ៗអត់អាហារយូរនាំឲ្យហេវហត់ គ្មានកម្លាំងកំហែងនឹងបំបៅដោះកូនឡើយ ហើយកូនក៏មិនអាចទទួលបានសារធាតុចិញ្ចឹមបានគ្រប់គ្រាន់ពីទឹកដោះដំបូង។

អត្ថបទពាក់ព័ន្ធ៖ ក្រោយសម្រាលរួច ស្បូនអត់កន្ត្រាក់ គ្រោះថ្នាក់ខ្លាំង តើពីមូលហេតុអី?

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

វះកាត់សម្រាលកូន ប៉ុន្មានម៉ោងក្រោយទើបអាចញ៉ាំអាហារបាន?