ថ្ងៃនេះកម្ពុជារកឃើញអ្នកឆ្លង COVID-19 ១ ករណីថែមទៀត ទើបមកពីអាមេរិក

នៅព្រឹកនេះក្រសួងសុខាភិបាលបានប្រកាសរកឃើញអ្នកឆ្លង COVID-19 ថ្មីថែម ១ ករណីទៀតហើយ និងគ្មានអ្នកជាសះស្បើយថ្មីដែរ។

សម្រាប់អ្នកដែលរកឃើញផ្ទុក COVID-19 គឺជាស្ត្រីជនជាតិខ្មែរ អាយុ ៣៣ ឆ្នាំដែលទើបវិលត្រឡប់មកពីសហរដ្ឋអាមេរិក និងមានអាសយដ្ឋាននៅឃុំក្ដុលដូនទាវ ក្រុងបាត់ដំបង ខេត្តបាត់ដំបង។ ក្រោយចាកចេញពីអាមេរិកបានបន្តជើងហោះហើរនៅប្រទេសចិន (តៃវ៉ាន់) ហើយមកដល់កម្ពុជាកាលពីថ្ងៃ ១៦ ខែ កញ្ញា ឆ្នាំ ២០២០។ បន្ទាប់មកថ្ងៃ ១៩ ខែ កញ្ញា ឆ្នាំ ២០២០ គាត់បានចាកចេញពីរាជធានីភ្នំពេញទៅបាត់ដំបង ក្រោយលទ្ធផលតេស្តអវិជ្ជមានលើកទី១។

គួរបញ្ជាក់ថាទាល់តែថ្ងៃទី ១៣ នៃការធ្វើចត្តាឡីស័កនៅផ្ទះរបស់ស្ត្រីរូបនោះគឺត្រូវនឹងថ្ងៃ ៣០ ខែ កញ្ញា ឆ្នាំ ២០២០ ទើបរកឃើញថាមានផ្ទុកCOVID-19។ ចំណែកមិត្តភ័ក្ដិ ២ នាក់របស់ស្ត្រីរូបនោះដែលបានមកដឹកពីភ្នំពេញទៅបាត់ដំបង និងមានសាច់ញាតិគ្រួសារ ៥ នាក់ទៀតបានប៉ះពាល់ផ្ទាល់។

សរុបតួលេខអ្នកឆ្លងជំងឺ COVID-19 នៅកម្ពុជាមាន ២៧៧ នាក់ (ស្ត្រី៥៥នាក់ និងបុរស ២២២ នាក់) ក្នុងនោះព្យាបាលសះស្បើយមានចំនួន ២៧៥ នាក់ មាន ១ នាក់សម្រាកព្យាបាលនៅមន្ទីរពេទ្យបង្អែកចាក់អង្រែ ហើយ ១ នាក់កំពុងសម្រាកព្យាបាលនៅមន្ទីរពេទ្យខេត្តសៀមរាប និង ១ នាក់ទៀតសម្រាលព្យាបាលនៅមន្ទីរពេទ្យបង្អែកខេត្តបាត់ដំបង។

COVID-19