ស្រីៗគ្នាយើងអាចនឹងសម្គាល់ឃើញថាចំណង់ផ្លូវភេទរបស់ខ្លួនអាចនឹងមានការប្រែប្រួលទៅតាមវ័យ។ ប៉ុន្តែការប្រែប្រួលនេះគឺមិនមានលក្ខណៈខុសគ្នាច្រើនទេ។ នេះអាចមកពីការផ្លាស់ប្ដូរអ័រម៉ូន មានផ្ទៃពោះ និងទំនួលខុសត្រូវផ្សេងៗ។ ប៉ុន្តែចំណង់ផ្លូវភេទមានការប្រែប្រួលតាមវ័យយ៉ាងម៉េចខ្លះ?
១. វ័យ២០ឆ្នាំ
ដូចគ្នាទៅនឹងមុខងាររាងកាយផ្សេងៗដែរ ចំណង់ផ្លូវភេទក្នុងវ័យ២១-២៨ឆ្នាំគឺមានភាពសកម្មខ្លាំង។ នេះមកពីមូលហេតុមួយចំនួនដូចជាការទើបនឹងចាប់ផ្តើមទំនាក់ទំនងថ្មីៗ។ ប៉ុន្តែបើស្រីៗមានចំណង់ផ្លូវភេទទាប បញ្ហានេះអាចបង្កដោយការពន្យារកំណើត។ ផលប៉ះពាល់នៃការពន្យារកំណើតនេះមិនមែនកើតឡើងលើស្រីៗគ្រប់គ្នាទេ ប៉ុន្តែស្រីៗមួយចំនួនអាចនឹងមានការធ្លាក់ចុះនៃអ័រម៉ូនតេស្តូស្តេរ៉ូនពេលប្រើថ្នាំពន្យារកំណើតដែលនេះអាចធ្វើឲ្យចំណង់ផ្លូវភេទធ្លាក់ចុះ និងអាចបង្កឲ្យទ្វារមាសមានអាការៈស្ងួត។ យកល្អស្រីៗដែលមានបញ្ហានេះគួរទៅពិគ្រោះជាមួយគ្រូពេទ្យដើម្បីផ្លាស់ប្ដូរមធ្យោបាយពន្យារកំណើត។
២. វ័យ៣០ឆ្នាំ
ការធ្លាក់ចុះនៃចំណង់ផ្លូវភេទនៅវ័យ៣០ឆ្នាំមិនមែនជារឿងគួរឲ្យភ្ញាក់ផ្អើលទេ។ ក្នុងវ័យនេះអ័រម៉ូនតេស្តូស្តេរ៉ូនមានការធ្លាក់ចុះ ហើយការធ្លាក់ចុះនេះអាចបណ្ដាលឲ្យចំណង់ផ្លូវភេទធ្លាក់ចុះដែរ។ យ៉ាងណាមិញ នេះក៏អាចមកពីស្រីៗមានការរវល់ខ្លាំងដូចជាធ្វើការ និងទំនួលខុសត្រូវផ្សេងៗ។ ស្រីៗអាចនឹងមានភាពហត់នឿយ និងជ្រើសរើសការគេងជំនួសវិញ។ សម្រាប់ស្ត្រីដែលទើបតែសម្រាលកូនហើយក៏អាចមានបញ្ហានេះដែរព្រោះមានការប្រែប្រួលអ័រម៉ូន នៅត្រីមាសទី៣ និងអំឡុងពេលបំបៅដោះកូនក៏អាចប៉ះពាល់ដល់ចំណង់ផ្លូវភេទដែរ។ ស្ត្រេសក៏អាចធ្វើឲ្យកម្រិតអ័រម៉ូនតេស្ដូស្តេរ៉ូនថយចុះ និងធ្វើឲ្យអ័រម៉ូនករទីសូល (Cortisol) កើនឡើង ហើយនេះក៏អាចប៉ះពាល់ដល់ចំណង់ផ្លូវភេទបានដូចគ្នា។
៣. វ័យ៤០ឆ្នាំ
អ័រម៉ូនប្រែប្រួលខ្លាំងនៅអំឡុងវ័យនេះ ជាពិសេសពេលជិតអស់រដូវ។ អំឡុងពេលជិតអស់រដូវ ការប្រែប្រួលនៃអ័រម៉ូនអាចប៉ះពាល់ចំណង់ផ្លូវភេទព្រោះការផលិតអ័រម៉ូនអេស្ត្រូសែនយឺតជាងមុន។ ការធ្លាក់ចុះនៃអ័រម៉ូននេះធ្វើឲ្យជាលិកានៅទ្វារមាសស្ងួត ហើយការរួមភេទអាចបង្កការឈឺចាប់បាន។ ប៉ុន្តែសម្រាប់ស្រីៗមួយចំនួនក្នុងវ័យនេះគឺមិនមានបញ្ហានេះទេ ព្រោះពួកគេមានពេលច្រើនជាងមុនដោយទំនួលខុសត្រូវលើកូនមានការថយចុះ និងការងារក៏មានស្ថេរភាព ជាពិសេសពេលអស់រដូវ ស្រីយើងខ្លះអាចនឹងមានចំណង់ផ្លូវភេទខ្លាំងវិញ ព្រោះមិនចាំបាច់បារម្ភលើការពន្យារកំណើតទៀត។
[embed-health-tool-ovulation]
