ក្មេងមានសុខភាពល្អ អាស្រ័យប៉ាម៉ាក់ចេះរៀបចំអាហារបានត្រឹមត្រូវ។ អំឡុងពេល ៦ ខែក្រោយសម្រាល ទារកអាចចាប់ផ្តើមទទួលអាហារបំប៉ន ដូចជា បបរខាប់គ្រប់គ្រឿង ដើម្បីទទួលបានជីវជាតិចិញ្ចឹមកាន់តែប្រសើរ។ ប៉ុន្តែនៅអំឡុងចាប់ពី ៣ ឆ្នាំឡើងទៅ ក្មេងកាន់តែត្រូវអាហារបំប៉ន ជាតិរ៉ែសំខាន់ៗ សម្រាប់ការលូតលាស់រាងកាយ និងសតិបញ្ញា ហេតុនេះ “Hello គ្រូពេទ្យ’ នឹងប្រាប់ប៉ាម៉ាក់ឲ្យដឹងអាហារបំប៉ន រួមនឹងជាតិរ៉ែសំខាន់ៗអ្វីខ្លះចាំបាច់សម្រាប់ការលូតលាស់របស់ក្មេង។
១- វីតាមីន A
វីតាមីន A រួមចំណែកយ៉ាងខ្លាំងក្នុងការលូតលាស់របស់កុមារ ដោយពង្រឹងប្រព័ន្ធភាពស៊ាំ ជួយជំរុញជួសជុលជាលិកាឆ្អឹង អភិវឌ្ឍ ធ្វើឲ្យស្បែក និងភ្នែកមានសុខភាពល្អ។ វីតាមីន A អាចរកបានក្នុងផលិតផលមួយចំនួន ដូចជា ទឹកដោះគោ ឈីស ស៊ុត បន្លែពណ៌លឿង ពណ៌ទឹកក្រូច មានការ៉ុត ឬល្ពៅ។
២- ក្រុមវីតាមីន B
វីតាមីនបានពីក្រុម B ជាពិសេស B2 B3 B6 និងវីតាមីន B12 មានតួនាទីសំខាន់ជំរុញដល់ការរំលាយអាហាររបស់ក្មេង បង្កើនការផលិតថាមពល និងជួយដល់ប្រព័ន្ធសរសៃប្រសាទ។ អាហារមានផ្ទុកវីតាមីន B មានដូចជា សាច់សត្វ ស៊ុត ទឹកដោះគោ សណ្តែក សណ្តែកសៀង និងសាច់ត្រីជាដើម។
៣- វីតាមីន C
វីតាមីន C ល្អសម្រាប់ស្បែក ជាលិកា និងការរីកលូតសាច់ដុំរបស់ក្មេងៗ ដោយវីតាមីនប្រភេទនេះសម្បូរនៅក្នុងប៉េងប៉ោះ បន្លែពណ៌បៃតង ឬផ្លែឈើមានរសជាតិជូរ។
៤- វីតាមីន D
វីតាមីន D អាចធ្វើឲ្យឆ្អឹងរឹងមាំ ព្រោះជួយរាងកាយស្រូបយកកាល់ស្យូមបានច្រើន។ ពន្លឺព្រះអាទិត្យនៅពេលព្រឹក ជាប្រភពនៃវីតាមីន D ដ៏ល្អបំផុត ហើយក្រៅពីនេះពន្លឺព្រះអាទិត្យ អាហារសម្បូរវីតាមីន D មានខ្លាញ់ត្រី ស៊ុតពណ៌ក្រហម គ្រប់ធញ្ញជាតិ និងក្រូច។
៥- កាល់ស្យូម
វីតាមីន D និងជាតិកាល់ស្យូម អាចជំរុញឲ្យឆ្អឹងលូតលាស់បានល្អ ខណៈកាល់ស្យូមមានប្រភពចេញពីទឹកដោះគោជូរ ទឹកដោះគោស្រស់ ឈីស ឬតៅហ៊ូ។
អត្ថបទពាក់ព័ន្ធ៖
- DHA ជាអ្វី? ដឹងថា ខួរក្បាលក្មេងៗត្រូវការវាជាចាំបាច់ប៉ុនណាអត់?
- បើកូនស្គមកំព្រឹង មិនឡើងគីឡូ សាកវិធីទាំងនេះ
៦- ជាតិដែក
ខ្វះជាតិដែក អាចធ្វើឲ្យសាច់ដុំ និងកោសិកាឈាមក្រហមមានបញ្ហា ព្រោះជាតិដែក មានតួនាទីសំខាន់ ពិសេសចំពោះស្រីៗពេញវ័យ ដោយសារវាមានទំនាក់ទំនងជាមួយវដ្តរដូវមនុស្សស្រី ព្រោះផលិតគ្រាប់ឈាមក្រហមបានលឿនឡើងវិញ។ គួរតែផ្តល់អាហារមានជាតិដែកឲ្យក្មេង ដូចជា មានសាច់ក្រហម មាន់ទួរគី ស្ពៃពួយឡេង និងសណ្តែក។
៧- វិធីផ្សេងដើម្បីផ្តល់សារធាតុរ៉ែចាំបាច់សម្រាប់ក្មេងៗ
ទោះបីជាវីតាមីន និងសារធាតុរ៉ែ គឺជារបបអាហារផ្តល់នូវសុខភាពល្អដល់ក្មេងក៏ពិតមែន ប៉ុន្តែមានករណីខ្លះ ប៉ាម៉ាក់អាចជ្រើសយកអាហារបំប៉នបន្ថែមបាន ហើយគួរអនុវត្តតាមគន្លឹះខាងក្រោម ដើម្បីចៀសវាងពីផលវិបាក នៅពេលប្រើវីតាមីន ឬសារធាតុរ៉ែលើសកម្រិត៖
– ត្រូវពិគ្រោះជាមួយអ្នកឯកទេស មុននឹងឲ្យកូនអាហារបំប៉នណាមួយ។ មិនត្រូវឲ្យកូនញ៉ាំថ្នាំអ្វីផ្សេងទេ ដើម្បីកុំមានឥទ្ធិពលមិនល្អដល់សុខភាពកូន។
– ក្មេងអាយុក្រោម ៤ ឆ្នាំ មិនគួរប្រើថ្នាំវីតាមីនចម្រុះ Multivitamin ដោយគ្មានការណែនាំពីគ្រូពេទ្យឡើយ។
– មិនត្រូវឲ្យកូនគិតថា ថ្នាំបំប៉នជាស្ករគ្រាប់ជាដាច់ខាត ត្រូវទុកឲ្យឆ្ងាយពីដៃក្មេង និងត្រូវឲ្យពួកគេដឹងថា ថ្នាំនេះមិនមានរសជាតិផ្អែមទេ។
– អាចឲ្យជាថ្នាំសម្រាប់ទំពា បើកូនមិនអាចលេបថ្នាំគ្រាប់ និងទឹកសេរ៉ូវីតាមីនបាន។
– ថ្នាំវីតាមីនប្រភេទ Megavitamins មិនគួរឲ្យកូនញ៉ាំទេ ពីព្រោះអាចបណ្តាលឲ្យក្មេងលើសកម្រិតបាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
