ស្រ្តីគ្រប់រូបឲ្យតែពេលជិតសម្រាលកូនម្ដងៗ តែងតែមានការឈឺចាប់ និងមានភាពតានតឹងកើនឡើង ពេលនោះហើយ គឺជាពេលដែលម៉ាក់ៗជិតសម្រាលត្រូវការកម្លាំងចិត្តខ្លាំង ជាពិសេសពីប្ដីផ្ទាល់តែម្ដង។ បើមិនដឹងថាគួរជួយប្រពន្ធបានដោយរបៀបណា ខាងក្រោមនេះជាតិចនិកល្អដែលបានចែករំលែកពីអ្នកធ្លាប់ឆ្លងកាត់រឿងនេះ។

បើតាមការឲ្យដឹងពីបងប្រុស យ៉ាន វឌ្ឍនៈ ជាអ្នករកស៊ីម្នាក់នៅម្តុំផ្សារទំនើប Aeon 1 រស់នៅភ្នំពេញថា នៅពេលដែលប្រពន្ធជិតសម្រាល តួនាទីជាប្ដីគឺត្រូវតែនៅក្បែរប្រពន្ធរហូត មិនថាក្នុងពេលរៀបសម្រាល ឬសម្រាលកូនរួចទេ៖“ពេលប្រពន្ធខ្ញុំជិតសម្រាល គឺខ្ញុំនៅជិតគាត់ ជួយធ្វើសរសៃ ជួយលួងលោម ព្រោះពេលជិតសម្រាលហ្នឹង ប្រពន្ធខ្ញុំគាត់ឈឺចាប់ពោះណាស់ ទ្រាំមិនចង់បាន ឃើញមានទឹកភ្នែកផងអីផង’។

ក្រៅពីពាក្យលួងលោម និងការនៅក្បែរ ប្តីអាចជួយបន្ធូរអារម្មណ៍ប្រពន្ធបានដោយការធ្វើសកម្មភាពសាមញ្ញៗបានដូចជា៖

១. ជួយម៉ាស្សាខ្នង ក្បាល ឬច្របាច់ដៃជើង ដើម្បីកាត់បន្ថយភាពឈឺចាប់របស់ប្រពន្ធ។

២. យកកន្សែងត្រជាក់ៗ ជូតមុខ ជូតខ្លួនឲ្យប្រពន្ធ ដើម្បីឲ្យមានអារម្មណ៍ត្រជាក់ស្រួល ធូរស្រាល។

៣. ជួយប្រពន្ធផ្លាស់ប្តូរចលនា ដើម្បីត្រៀមសម្រាលបានស្រួល។

៤. ជួយលើកទឹកចិត្តប្រពន្ធ ផ្តល់កម្លាំងចិត្ត ជាដើម។

បងប្រុស បានណែនាំបន្ថែមថា ពេលខ្លះ ប្រពន្ធអាចមិនឲ្យប៉ះ ឬជួយនៅពេលធ្វើអ្វីមួយ ទោះបីជាបែបនេះក្តី ប្តីគឺត្រូវតែនៅក្បែរ និងស្ដាប់តាមអ្វីដែលប្រពន្ធចង់បាន ហើយត្រូវធ្វើចិត្តអត់ធ្មត់បន្តិច ព្រោះនៅពេលជិតសម្រាល ប្រពន្ធអាចត្អូញត្អែរច្រើន ហើយក៏ឆាប់មួរម៉ៅដែរ ដូចនេះហើយ យើងជាប្ដីត្រូវចេះយោគយល់ដល់ប្រពន្ធ។

បើតាមការអះអាងរបស់លោកស្រីវេជ្ជបណ្ឌិត ចាប់ ច័ន្ទធិតា អនុប្រធានមន្ទីរពេទ្យខេត្តកំពង់ចាម ស្ត្រីឈឺពោះសម្រាលកូន បើបានរបស់ផ្អែម២យ៉ាងនេះ ពិតជាអាចកាត់បន្ថយអាការៈឈឺពោះបានមួយចំណែកធំ។ របស់ផ្អែម២យ៉ាងនោះមាន ភេសជ្ជៈផ្អែមៗ និងពាក្យសម្តីផ្អែមៗ។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ប្តីល្អ ជួយសម្រួលអារម្មណ៍ប្រពន្ធពេលជិតសម្រាលតាមរបៀបទាំងនេះ