ជឿជាក់ថាម៉ាក់ៗមួយចំនួនបន្ទាប់ពីសម្រាលកូនរួចរូបរាងមិនសូវស្អាតបាត និងមានរបៀបរៀបរយដូចមុនមានកូនឡើយ។ ដើម្បីជួយជាគំនិតខ្លះៗ ដល់ស្រីៗគ្នាយើងដែលស្រលាញ់របៀបរៀបរយ ម៉ាក់ៗទាំង ៥ នាក់ខាងក្រោមនឹងមកបង្ហាញតិចនិកមួយចំនួន៖
១- ជ្រើសរើសសម្លៀកបំពាក់រលុងតិចៗ
អ្នកនាង សុន មករា បានឲ្យដឹងថា ពេលសម្រាលកូនរួច ច្បាស់ណាស់ថាគ្មាននរណាមានកម្លាំង ឬនឹកគិតចង់ស្លៀកពាក់ស្អាតៗទៀតឡើយ តែក៏មិនត្រូវបណ្ដោយខ្លួនស្លៀកពាក់រយីករយាគ អាវមិនសមអាវ ខោមិនសមខោដែរ។ ស្ត្រីវ័យ ៣០ ស្ដើងរូបនោះបានបន្តទៀតថា អ្នកសម្រាលកូនរួចគួរត្រៀមឈុត ដើម្បីឲ្យមើលទៅសមរម្យ ព្រោះក្នុងខ្លួនក៏មិនសូវស្រួលពេកដែរ ពេលសម្រាលហើយ។ ឧទាហរណ៍ ម៉ាក់ៗអាចស្លៀកពាក់រ៉ូបវែងវាលក្លៀក ហើយមានអាវដៃវែងពីក្រៅ ចៀសវាងខោចង្កេះកៅស៊ូ ព្រោះធ្វើឲ្យស្បែកពោះដែលនៅសេសសល់ទៅជាជ្រួញ។
២- សក់
សង្កេតឃើញថា អ្នកសម្រាលកូនរួចសក់ក្បាលកន្ត្រើងរ៉ើង ព្រោះចាស់ៗខ្លះមិនឲ្យកក់សក់ ឬមិនចងឡើយ ឲ្យទម្លាក់សក់រហូត។ អ្នកនាង ភាព សំនៀង បានបញ្ជាក់ថា ពេទ្យគេមិនឲ្យធ្វើបែបនោះឡើយអាចកក់សក់ និងចងបានយ៉ាងរៀបរប ហើយបើចង់ស្អាតអាចគាបសក់បានធម្មតា ព្រោះវាមិនមានផលប៉ះពាល់ណាមួយចំពោះសុខភាព។ អ្នករស់នៅភ្នំពេញរូបនេះបានបន្តទៀតថា ការតុបតែងសក់ឲ្យមានសណ្ដាប់ធ្នាប់ល្អជួយឲ្យមានអារម្មណ៍ល្អ ណាមួយវាមិនធ្លាក់ចូលភ្នែកកូន ឬកូនបោចទាញលេងមិនបាន។
អត្ថបទពាក់ព័ន្ធ៖ អត្ថប្រយោជន៍ហ្គេនរឹតក្បាលពោះ សម្រាប់ម៉ាក់ៗសម្រាលកូនរួច
៣- ពាក់អាវក្នុង
អ្នកស្រី ប៉ែន ស៊ីនួន មានជ័យក្បែរ ៥០ បានឲ្យដឹងថា កាលខ្លួនមានកូនរឿងចាំបាច់បំផុតត្រូវបិទបាំង និងធ្វើឲ្យខ្លួនមើលទៅនៅតែស្អាត គឺការពាក់អាវក្នុង ព្រោះបើមិនពាក់អាវក្នុងទឹកដោះនឹងហៀរហូរចេញមកក្រៅ ឃើញហើយមិនចង់នៅក្បែរ។ ទឹកដោះអាចបណ្ដាលឲ្យសម្លៀកបំពាក់ប្រឡាក់រហូតបោកមិនជ្រះ ហើយបើអត់អាវក្នុងដើរហើរមើលទៅក៏មិនសមភ្នែកទៀតផង។ អ្នករស់នៅក្រុងតាខ្មៅរូបនោះបានបន្តទៀតថា សម្រាប់ម៉ាក់ៗបំបៅដោះកូន ក៏គួរតែពាក់ដែរ ព្រោះសម័យឥឡូវមានអាវក្នុងសម្រាប់បកបិត ងាយស្រួលបំបៅកូន ហើយបើពាក់អាវក្នុងនៅតែមានទឹកដោះហៀរហូរមកទៀត គួរតែប្ដូរអាវទាំងក្រៅ និងក្នុង។
៤- ថែរក្សាស្បែកឲ្យមានសំណើម
ម៉ាក់ៗសម័យនេះគឺសម្រាលកូនរួចចង់បានស្បែកភ្លឺស្រស់ថ្លាវិញ ដូចនេះអ្នកនាង រ៉ាញ់ សុធីតា បានណែនាំឲ្យម៉ាក់ៗឧស្សាហ៍ខាត់ស្ក្រាប់ និងផឹកទឹកឲ្យបានច្រើន។ ស្ត្រីកូន ២ រូបនេះបានបន្តទៀតថា បើមានពេលអាចខាត់ស្បែកញឹកញាប់បានជាមួយរូបមន្តធម្មជាតិ ហើយពេលកូនធំបន្តិចចាប់ផ្ដើមលាបឡេឡើងវិញ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-ovulation]
