ជំងឺកញ្រ្ជឹល ៣៨៧ករណី ត្រូវបានបញ្ជាក់ថា បានកើតមាននៅក្នុងរដ្ឋចំនួន ១៥ របស់សហរដ្ឋអាមេរិក គិតពីថ្ងៃទី១ ខែមករា រហូតដល់ថ្ងៃទី២៨ ខែមីនា ឆ្នាំ២០១៩។ នេះបើតាមមជ្ឈមណ្ឌលសម្រាប់ការគ្រប់គ្រង និងបង្ការជំងឺប្រទេសនេះ។

នេះគឺជាតួលេខករណីជំងឺកញ្រ្ជឹលច្រើនជាងគេលំដាប់ទី២ ត្រូវបានរាយការណ៍នៅសហរដ្ឋអាមេរិក ចាប់តាំងពីជំងឺកញ្រ្ជឹល ត្រូវបានប្រកាស លុបបំបាត់នៅឆ្នាំ២០០០។ តួលេខករណីជំងឺកញ្រ្ជឹលច្រើនជាងគេ ត្រូវបានរាយការណ៍នៅឆ្នាំ២០១៤ ដោយមានចំនួន ៦៦៧ករណី។

កញ្ជ្រឹល ជាជំងឺប្រឈមនឹងការឆ្លងខ្ពស់មួយ ដោយវីរុស ដែលអាចរីករាលដាលតាមរយៈខ្យល់ នៅពេលអ្នកមានផ្ទុកជំងឺនេះ ក្អក ឬកណ្ដាស់ ឬប្រសិនបើមនុស្សម្នាក់ចូលទៅជជែកដោយផ្ទាល់ ឬចម្លងមេរោគ តាមរយៈការប៉ះរបស់របរ ឬផ្ទៃណាមួយដូចគ្នា។

រដ្ឋ ដែលបានរាយការណ៍ថា មានករណីជំងឺកញ្រ្ជឹល មានដូចជា រដ្ឋ Arizona, California, Colorado, Connecticut, Georgia, Illinois, Kentucky, Michigan, Missouri, New Hampshire, New Jersey, New York, Oregon, Texas និង Washington។

មជ្ឈមណ្ឌលសម្រាប់គ្រប់គ្រង និងបង្ការជំងឺ របស់សហរដ្ឋអាមេរិក បានបញ្ជាក់ថា ការផ្ទុះជំងឺនេះ គឺពាក់ព័ន្ធទៅនឹងអ្នកដំណើរ ដែលនាំជំងឺនេះចូលមកក្នុងសហរដ្ឋអាមេរិក ដោយមកពីប្រទេសផ្សេងទៀត ដូចជាប្រទេសអ៊ីស្រាអែល អ៊ុយក្រែន និងហ្វីលីពីន ដែលជាកន្លែងមានជំងឺកញ្រ្ជឹល កំពុងផ្ទុះឡើង។

អត្ថបទពាក់ព័ន្ធ៖

កាលពីសប្ដាហ៍មុន ក្នុងការខិតខំរារាំងការផ្ទុះឡើងជំងឺកញ្រ្ជឹល ដែលបានកើតឡើងចាប់តាំងពីខែតុលា ឆ្នាំ២០១៨ តំបន់ Rockland ក្នុងទីក្រុង New York បានចេញបម្រាម ហាមអ្នកពុំទទួលបានវាក់សាំង ក្រោមអាយុ ១៨ឆ្នាំ ចេញទៅទីសាធារណៈ។ គិតត្រឹមថ្ងៃទី២៩ ខែមីនា ឆ្នាំ២០១៩ តំបន់ Rockland បានរាយការណ៍ថា មានជំងឺកញ្រ្ជឹលចំនួន ១៥៣ករណី។

ជាមួយគ្នានេះ មជ្ឈមណ្ឌលគ្រប់គ្រង និងបង្ការជំងឺ របស់សហរដ្ឋអាមេរិក បានបញ្ជាក់ថា នៅឆ្នាំ២០១៨ មានជំងឺកញ្រ្ជឹលសរុបចំនួន ៣៧២ករណី។ ក្នុងនោះ មានមនុស្ស ៨២នាក់ បាននាំជំងឺនេះ ពីប្រទេសផ្សេងៗ ចូលទៅក្នុងសហរដ្ឋអាមេរិក នៅឆ្នាំ២០១៨។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

​​កញ្រ្ជឹល កំពុង​អុកឡុក​​អាមេរិក ​ ដល់​ទៅ ១៥​រដ្ឋ

កញ្រ្ជឹល កំពុងអុកឡុកអាមេរិក ដល់ទៅ ១៥រដ្ឋ